Job 15 - Ma Zhiklè

Ma Eliphaz macecèwaʼa

¹ Eliphaz te Théman a hüno a ngaɗa:

² Ndo maya a gèɗ ma ambali ɗè?

³ A ngatsa ta maya a ndohai a ma ambalai, a ma man a tèkè a ndo azɓi dè?

⁴ Ka gedassa zlau Zhiklè, ka gedassa ntsi ri a Zhiklè.

⁵ Mali ngaya a njoko ka ma auda a dengai. Ma ngaya a ngwoda ka ma a gèɗ.

⁶ Ma ngaya a fa ka mali a gèɗ, i ka ɓai. Tapiɗaf ma ngaya a ngwoda ka va a gèɗ.

⁷ Ka nshèlèkur ndo dè, ka ga dai, ga za dè?

⁸ Kos ka ndo man kin nza a Bi Zhiklè gedza-gedza dè, ka ceda maya a va ngaya tèlè dè?

⁹ Skwi man ka suna, a nga, nga sun ɓai, a zhi dè? Skwi man ka tsenaʼa, a nga, nga tsena ɓai, a zhi dè?

¹⁰ Ko te va nga ba, ndo man mokozlar te gèɗ, ndo nhalaʼa, a zhè, a fena mvi bab ngaya.

¹¹ Man Zhiklè a bid ka, a slra ka ɓi dè? Ma maya man a gaɗa ka a gumai, ambaha ka ɓi ɗè?

¹² Ndav ngaya nʼngwod na, a ka ɓeslè di èhèmè?

¹³ Aman ka vèdè htsan a géɗ Zhiklè, a ma ambaɓai ar haha a shkè auda te ma ngaya, èhèmè?

¹⁴ Ndo wa man a nzi ara ndo mpanaʼa? Kra man ngwoz a myau, ndo nzuraʼa dè?

¹⁵ Na haha Zhiklè a fi gèɗ a golahi nengaʼa azɓai, ko giɗfèk nlizhèʼa a sam di na,

¹⁶ holholaʼa ndo man ambaɓai, ngedassaʼa, man a gi malai, ara iyam man a si a hwaɗ.

¹⁷ I woy a i gaɗa ka; fu zlembaɗ! Skwi man i rkaʼa, i ngra ka.

¹⁸ Skwi man ndohi maya ta ngotso te ri babhi ta, ta ngheda ɓai.

¹⁹ Ta kwor herkeda staɗgenè, ndo mbrok az a sam ta di ɓai.

²⁰ Ndo nderɗe Zhiklè a gi zlau te pats nshèffè nengaʼa tèlèba. Ndo ambaɓiaʼa a vi a vata azɓai.

²¹ Ma man a tsena na a zlembaɗ, a pra na zlau a va; man a nza a gumai, ndo ngedassa-ndo a kala na va.

²² A hur a gada i da shkè a deɓa te ruva ɓai, a hur a gada ta da kedyè a tsakwal.

²³ A hèsh skwi nʼndai – a ngècè tema? A suna, skwi ambaɓiaʼa a da ga na.

²⁴ Pats ruva a pa na zlau a gèɗ, zlau mʼmetsai a gshèʼa, ta kala na va ara bai man ntila a ma var.

²⁵ A géɗ man a cè ri a gèɗ a Zhiklè, a Sala na va a di a Zhiklè Bi-wuɗai,

²⁶ A gudko deɓa a hai, a hakaɗai, aman a ntsiaʼa, a gambar nɗukoʼa diɓ-diɓaʼa.

²⁷ Bazlazlam nengaʼa a nhubata mbav-mbavaʼa, géɗ godor nengaʼa kerpètikti-kaʼa,

²⁸ a nza te kokwar man ta jèkeda, a dikai.

²⁹ A nda a ndo mèshèlè ɓai, skwi man a ɓicaʼa a nzi azɓai, dau a te wov na ɓai.

³⁰ A mbelkoɗauda te ruva azɓai, vogwa a nʼndeda wud ri nengaʼa a ma, a kozlar a ksarda nyi nengaʼa.

³¹ Da fu gèɗ a va nengaʼa mbav-mbavaʼa ɓai, nga suna, skwi ambalai.

³² Man a ye di ɓai, ngwora ma, a godozlom a tsi te deɓaʼa asaɓai.

³³ Mpi wofaʼa, a husl na, nwurzhè nengaʼa a wush na ara nwurzhè tsna.

³⁴ Ndohi man ta woy Zhiklè ɓai ta slaha ta gi skwi ngiɗè azɓai, vogwa a nʼndeda gi ndohi metsarhi a ma.

³⁵ Skwi man ambaɓi te ndav ta, a yi malai; skwi man a shkè auda te tengaʼa, a ngwèdè ndo.