Job 13 - Ma Zhiklè

¹ Halau, skwi haha tèlèba i rka a di ga. Zlembaɗ ga a ntsenaʼa, i suna.

² Skwi man kin suna, i ba i suna, kin fenyè azɓai.

³ Aman iye, i woy a i gaɗa na Zhiklè Bi-wuɗai, i woy a i goɗko di man a ga auda a sam Zhiklè.

⁴ Amán kinè, kin cèkèlma, kin tèlèba kinè ara ndohi madzaf nzura ka ɓai.

⁵ Aman agassa kin nzi tètèʼa, ar maya kinè a zhè.

⁶ Ani haha, va-tsena ma ndzoan man i ga kinè, va-tsena ma man i gèɗèʼa!

⁷ Kin cèkèlma a gèɗ Zhiklè a ma ncè-kèlma dè?

⁸ Kin woy a kin da na va dè? Kin woy a kin jhèɗè skwi te di man a Zhiklè dè?

⁹ Aman a war kinè, a nʼngats kinè, kinè amba dè? Man bai, kin woy a kin ngwèdèʼa ara man kin ngwèdè ndo dè?

¹⁰ A da ga kinè kita a gèɗ, aman kin pèr ndo mpèrè.

¹¹ Ngi bi nengaʼa a pra kinè zlau a va azɓi dè? Kin gi zlau nengaʼa azɓi dè?

¹² Ngèlègèɗ ma kinè, ma zi ambalai. Ma man kin mbeɗa nga a pa, ma wotsakai.

¹³ Va-nza tètè, va-vay civèɗ a i gèɗèʼa, ko skwi mèmè man a da gay te deɓaʼa ba.

¹⁴ I ɓer va ga a ri ga, i gshè nshèffè ga a ri ga.

¹⁵ Aman a kedyè, i gudzi azbai. Civèɗ man i bizhè a pa, i nghédè azɓai a sam na.

¹⁶ Na haha ma, skwi man a mbelyè: Ndo man a woy Zhiklè ɓai, a zlècè a sam na azɓai.

¹⁷ Va-tsena ma ga mbelembela, va-fu zlembaɗ a ma ga!

¹⁸ I goɗko di man a ga auda, i suna, i gaɗda di na.

¹⁹ Nslaha a nverslè a iyè wa? Ar a nasa nasa i mbeɗi a ma azbai, a i metsi ga.

²⁰ I jhèdè te ri ngaya skwi cèw. Te deɓaʼa i da nghédè va ga a sam ngaya azɓai.

²¹ Ka gay matakwan bai, skwi ngaya man wuɗitpa da pray zlau a va ɓai.

²² Te deɓaʼa bahkayè, a i mbeɗa ka a ma. Man ɓai i gèɗèʼa, a ka da mbeɗkay a ma.

²³ Maharam ga a mali ga ta gi ngama? Ngray mphömè ga a mali ga!

²⁴ Ka ngheda di ngaya èhèmè? Ka fiyè a ndo mayam ngaya èhèmè?

²⁵ Ka woy a ka hèsh vah man kozlar a hèdèʼa, ka woy a ka hi a verzi kuza man kozlar a hèdèʼa dè?

²⁶ A ka gay skwi ambaɓiaʼa, a ka fay mali man i goko te gola a gèɗ.

²⁷ A ka pay shèla a sak, ka pay va a civèɗ ga tèlèba, ka zeɓi sam sak ga,

²⁸ a nshèffè ga a huf na ara wof man nhurtsotsom a ndiaʼa, ara maslaka man fafar a ndiaʼa.