Job 12 - Ma Zhiklè

Job a mbeɗa na ma a Tsophar

¹ Job a hüno a ngaɗa:

² A vava ndohi ngiɗè ngar kinè azɓai. Aman kinè azɓai, maya a ze na.

³ Aman i ba, maya ga a zhè lèmèlèmè ara kinè. Mba kinè a iyè ka ɓai. Ndo man a sun skwi haha ɓi wa?

⁴ Iyè man i tsi ri a Zhiklè, a mbeɗkay a ma, mandal ga a livyè, ta ngwossahayè, i ndo nzuraʼa.

⁵ Ndo mwèl va a hérèʼa: ngedèshè a da bezay a va ma? Ndohi man skwa a slafadama ta sak, ta zler ta a vaʼa a sak.

⁶ Gi ndohi metsarhai ta nza amba. Ndohi man ta poko na gèɗ ndav auda a Zhiklè ta hér gèɗ zlau azɓai, ta fi wuɗi ta a zhiklè ta.

⁷ Dzhoɗo skwi ndzham, da senda ka. Ɗiakihi tʼhwaɗ giɗfèk da slebda ka!

⁸ Skwi dak da ngatsa ka maya! Klèfi te iyam da njè ka!

⁹ Te va skwi haha tèlèba, di man a sun ɓai, ngiɗè a zhi ɗè? Ta suna, Zhiklè a ngau skwi haha tèlèba.

¹⁰ Nshèffè ndohi tèlèba te ri na, mèzhèɓ ndohi tèlèba te ri na.

¹¹ Zlembaɗ a ɗèl ma tsaɗ tsaɗ ka bi dè? Vèvèɗ daʼai a dèl njèn skwi tsaɗ tsaɗ ka bi de?

¹² Maya a zhè a sam babgihai. Ndohi man ta vu kumba, ta sun skwai.

¹³ Zhiklè, maya na zhè, wuɗi na zhè, a slaha nʼngra ka, a sun skwai.

¹⁴ Aman nengaʼa a mbeɗda skwi a hai, a nrèmè a pa za wa? Man a mpizleda ndo a gai, nda winkoɗauda za wa?

¹⁵ A ndè na ma iyam a pa, a skwi a gwèr na, a dzurvko iyam kumba a gedassa herkeda.

¹⁶ Wuɗi na zhè, a gi skwi a maya maya; ndo man a zlakeda va na, a ndo man a zlakede ta ndohi ngiɗè, ta te ri na.

¹⁷ A ndede ta ndohi ncèmma tʼherkeda a ndohi nrzlaʼa, a ndohi kita a madaɗauhai.

¹⁸ A wusheda bihi auda te bai, a dzaw ta.

¹⁹ A gi aman ndohi ncèsl skwai ta dè a daf sak ambalai. Ndohi man wuɗi ta zhè a wushedeka ta auda.

²⁰ A cèma ta ma auda te ma ndohi nzuraʼa, a helama ta nhér gèɗ a babgihai a ta slaha ta cèmma asaɓai.

²¹ A pa ta hori a di a ndohi mbibihiaʼa, a prama na skwi man a dzawa va a vna a ndo wuɗai.

²² Skwi nʼnghedaʼa te ruva, a ngredè auda, a gudkoɗi ruva auda a sam nhelaʼa.

²³ A ge ta ndohi herkeda a mbiaʼa, te deɓaʼa a zede ta. A zlazlama ta ndohi herkeda, te deɓaʼa a ndev ta ma.

²⁴ A cèma ta maya auda te gèɗ a bihi kokwar, a zlakede ta a ndev hèshèkèd, man civèɗ a te pa ɓai.

²⁵ Ta tètèmè va te ruva, skwi nhél sam azɓai. Ta gi dzaw-dzawaʼa ara ndohi zom.