Job 11 - Ma Zhiklè

Ma Tsophar nshèlèkuraʼa

¹ Tsophar te Naama a hüno a ngaɗa:

² Ndo man a nju ma kumba ar haha, ka ngela na ma a pa az dè? Ndo man a tsa tsaval ambalai da hur a ngaɗa i goɗ a nzura ɓai!

³ Nga ndohi makar, nga nzi tètèʼa a sam tsaval ngaya man ka tsiaʼa haha dè? Ka livè ndo, a ndo a ga ka ndzoan a géɗèʼa azɓi dè?

⁴ Ka gada: Njè-ma ga zuraʼa. Iyè ndo nzuraʼa a sam di Zhiklè.

⁵ Ar a woy Bi Zhiklè da goɗa, da winè ma na a gèɗ ngaya.

⁶ A ngra ka maya man nʼngheda, maya man ara nrkedai. Te deɓaʼa ka da suna, Bi Zhiklè a dzhaɗ ka a géɗ mali ngaya.

⁷ Ka slaha ka shin nhinkaɗ Bi Zhiklè, a ngi na ɗè? Ka slaha ka sun Bi-wuɗai man nga a jè-lèlèʼa dè?

⁸ A dè a géɗèʼa, a fena giɗfèk nte zhiklè te géɗèʼa: Ka da gi kè? A dè a godok, a fena a ndikè a vèvèɗ a sam mʼmetsai: Ka da shinè kè?

⁹ A wuzhè kerpaʼa, a dè dra a fena verzi herkeda, a fena woyam mbiaʼa.

¹⁰ Aman a dè a ngshè ndo, a bèhè a kita – nwoya a nza na a ma wa?

¹¹ Nengaʼa a sun ndohi nʼngwèdè ndo, a rka maharam, a pi diaʼa.

¹² Aranta ndo man mangarasl a te gèɗ ɓai a slaha a ngècè maya genè, ko a gi mèdègèɗ ara ngur kɗèh.

¹³ Aman antanta ka til ndav ngaya, a ka tsi ri a Zhiklè,

¹⁴ ka wusheda mali aussa te ri ngaya, mali da nza a gi ngaya ɓai!

¹⁵ Te deɓaʼa ka da pi di a Zhiklè, ka ndzwoɗaɗa ma, ka nza taraʼa, ka gi zlau azɓai.

¹⁶ Te deɓaʼa matakwan a pca ka a gèɗ, ka hérèʼa azɓai, ara iyam man a she na.

¹⁷ Te deɓaʼa nshèffè ngaya mʼmbela ma, nʼnga ara pats man a zlatsa, ruva a nʼngwoda na a skwi nhél sam.

¹⁸ A géɗ skwi man ka zhèrè a dai a ka fi gèɗ a vna, ka nza, ka nzhunè, ka gi zlau azɓai.

¹⁹ Ka mènèhai, skwi ngiɗè a pa ka zlau a gèɗ azɓai. Ta kumba ta ngalde ka.

²⁰ Aman ndohi nderɗa Zhiklè ta pi di a civèɗ he-lèslèʼa, sam man ta hi a pa azɓai. Skwi man ta zhèrèʼa, mʼmetsai.