Job 10 - Ma Zhiklè

¹ Nshèffè ga a ndarayè. I woy a i gèɗè wobau ga auda, a i gèɗèʼa, ara man ndav a dzayè ɗekeɗekeʼa.

² I woy a i gaɗa na Bi Zhiklè: Ka gay kita a gèɗ ɓai! Ngrayè, ka gi ndav a géɗ ga èhè-mè?

³ Ka da ngècè te pa mè, aman ka gay matakwan? – a ka kwola skwi man ri ngaya a ngau, a ka va ta civèɗ a ndohi ambaɓihiaʼa a ta gi skwi man ta hérèʼa.

⁴ Di ngaya di ndo ɗè? Ka rka skwi lèmèlèmè ara di ndo dè?

⁵ Patshi ngaya lèrnèlèmè ara patshi ndo dè? Mvi ngaya lèmèlèmè ara mvi ndohi dè?

⁶ A ka hèsh maharam ga, a ka njénjèr mali ga,

⁷ ko ka suna, mali ga azɓai, ndo mprekay auda te ri ngaya azɓai.

⁸ Ri ngaya a nramkayè dzaf tèlè, te deɓaʼa ka gedassyè a mèdèp.

⁹ Huro, ka nramkayè a rɓasl, a ka da mendyè a deɓa a va mberfenèk dè?

¹⁰ Ka badyè aussa ara iyam, ka ɓutsyè ara wa zlè.

¹¹ Ka mbè vatasl ga a hutèɗ a zluèɗ va a pa, ka ngay vatasl a va ga a mar te va ga.

¹² Ka nvay nshèffè a wuɗi nshèffè a va ga, ka waray dai a ka ɓer nshèffè ga.

¹³ Skwi man ka ngheda a ndav ngaya, i suna ka hur te ndav ngaya arsa.

¹⁴ Aman i gi malai, ka suna – ka pray mali ga azɓai.

¹⁵ Aman mali a géɗ ga, wobayè! Ko i zuraʼa, i gre gèɗ ga azɓai. I ngeza a hori man a kedyè, a nlèyè man a keɗay va a hai.

¹⁶ I kala tʼhi ma, ka hi a verzi ga ara kokoya. Ka gi ndav a géɗ ga a ma ma.

¹⁷ Shèwa man ka gi a iyè a dè a ma ma. Ka gi ndav a géɗ ga a ma ma, a ndedyè a ɓèlè a ma ma.

¹⁸ Ka yekayè auda tʼhwaɗ mam ga èhèmè? Dara man i da mets ga, ar ndo a nrkayè a di ɓai.

¹⁹ A gakaɗ arsa, iyè ara ndo ka ɓi klèk ba, a ta riyè a vèvèɗ daga man iyè a ma husloɓ.

²⁰ Njèkè nshèffè ga a ma kètè genè, a i metsi ga. Jèkyè, a ngay langlangaʼa kètè.

²¹ Ga i dè a sam man i menkaɗa deɓa te pa azɓai, sam ntèɗèɗikɗikaʼa, herkeda man ruva te pa,

²² a sam mʼmadzaʼa ara vaɗ, ruva, man skwi nhel sam asaɓai.