Job 1 - Ma Zhiklè

¹ Ndo ngiɗè a zhè te kokwar Uz, nzlembaɗ na Job; ndo nzuraʼa, a ngu skwi amba amba tèlèba, a gi zlau Bi Zhiklè, a woy skwi ambaɓiaʼa ɓai.

² A nyu wudahi 7 a dalahi 3.

³ Skwi kudom nengaʼa, tambaki 7.000, zlugumihi 3.000, zlèhi 1.000, kɗèhi 500. Ndohi mizlinè nengaʼa ta zhè kumba. Job a mfena ndohi te man a verzi gi tèlèba.

⁴ Pats ngiɗè pats ngiɗè wudahi nengaʼa ta gu do a gi ngiɗè, do a gi ngiɗè, a ta gi ngolala, ta venu nvenai. A ta baha ta dalahimamhi ta makar a pa, a ta ndi skwai a ta si skwai a nda ta.

⁵ A pats man skwi nʼndi ngolala klèng, Job a mbaha ta, aman a tila ndav ta. A prèk te gai, a nʼndara na skwi a Zhiklè a géɗ staɗ staɗ tèlèba. Job a nhuro: Wa ngiɗè ba, wudahi ga ta da gu malai, ta durɗo Bi Zhiklè te ndav ta. A Job a ngu arsa pèc pècèk.

Mɓicè-va a sam Zhiklè

⁶ Pats ngiɗè, golahi Zhiklè ta shkè a ta zlatsa a sam Ndo nzi pèc pècèk. Madzagi ba a zhè te va tengaʼa.

⁷ A Ndo nzi pèc pècèk a ngaɗa na madzagai: Ka shkè tema? Madzagi a ngaɗa na: I shèwèlè a géɗ herkeda tèlèba, i bizhè a ndev kokwar tèlèba.

⁸ A Ndo nzi pèc pècèk a ngaɗa na madzagai: Ka rka Job, ɓèl ga, ɗè? Ndo ngar nengaʼa tʼherkeda azɓai. Ndo man amba zuraʼa, a gi amba amba tèlèba, a gi zlau Bi Zhiklè, a woy skwi amaɓiaʼa ɓai.

⁹ A madzagi a mʼmbeɗa na a ma Ndo nzi pèc pècèk: Job a gi zlau Bi Zhiklè ambali dè?

¹⁰ Ka ɓerèʼa, nengaʼa a gi nengaʼa a skwi nengaʼa tèlèba. Ka pshè na ma te mizlinè nengaʼa tèlèba, a rèwè skwi nengaʼa a grè a mènè te kokwar tèlèba.

¹¹ Aman gudo ri ngaya a ka lama na skwi nengaʼa man a ngotso tèlèba, a i gada ka a vava, a da derde ka.

¹² A Ndo nzi pèc pècèk a ngaɗa na madzagai: Na haha, skwi nengaʼa man a ngotso tèlèba, i pa ka a ri a ka. Aman géɗ va nengaʼa ka lama na ɓai. Te deɓaʼa madzagi a ndo na auda a sam Ndo nzi pèc pècèk.

Skwi Job a ze na

¹³ A pats ngiɗè wudahi a dalahi nengaʼa ta ndi skwi a ta si skwi te gi kramam tengaʼa, tsuvomaʼa.

¹⁴ A ndo sak a shkè a sam Job, a ngaɗa: Zlèhi ta pizhè, a kɗèhi ta ndi mandai a tsagi ta, a ndohi Sabée ta shkè a ta bazl ta ndohi mɓer ta a tsakwal,

¹⁵ a ta helda skwi a ma. I staɗ i mbelkaɗ ga a i hakaɗai a i da ngra ka.

¹⁶ Ngèd na, ngiɗè a nshkè a ngaɗa: Vogwa Bi Zhiklè a nkalkaɗai a nʼndau tambaki a ndohi mɓer ta. I staɗ i mbelkaɗ ga a i hakaɗai a i da ngra ka.

¹⁷ Ngèd na, ngiɗè a nshkè, a ngaɗa: Ndohi Chaldée ta poko nʼngélè makar, ta kala ta va a zlugumihi ngaya, a ta helda ma, a ta bazl ta ndohi mɓer ta a tsakwal. I staɗ i mbelkaɗ ga a i hakaɗai a i da ngra ka.

¹⁸ Ngèd na, ngiɗè a nshkè, a ngaɗa: Wudahi a dalahi ngaya ta si skwi a ta ndi skwi te gi kramam tengaʼa, tsuvomaʼa,

¹⁹ a kozlar mbiaʼa a nshkè tʼhèshèkéɗ, a mʼmbeɗa ta gi a gèɗ dezlèm tèlèba, a ta bazl ta. I staɗgenè i mbelkaɗ ga a i hakaɗai a i da ngra ka.

²⁰ Te deɓaʼa Job a nslambaɗa, a nkuratseda maslaka nengaʼa aussa, a nsha gèɗ, a nkalda va na a hi a herkeda, a ntsu rai, a ngaɗa:

²¹ I shkè auda tʼhwaɗ mam ga adai, i dè minè a deɓa adai. Ndo nzi pèc pècèk a mvayè, Ndo nzi pèc pècèk a mco. Sèi da slubordo nzlembaɗ Ndo nzi pèc pècèk!

²² Te skwi haha tèlèba Job a nʼnga mali ɓai, a ngaɗa ma ambaɓiaʼa a géɗ Bi Zhiklè ɓai.