Jérémie 9 - Ma Zhiklè

Ndohi ngi rai

¹ I woya a i kuɗai a pats a vaɗ a gèɗ ndohi ga man ta bazl ta, ko gèɗ ga nwalaɗ na, ko kuɗa a hezlamay dai.

² Nda vay gèjèk dak tʼhèshèkèɗ wa? A i jèke ta ndohi ga a pa, a i dè ga; ta tèlèba ndohi mphömè, ndohi ngi rai.

³ Nèʼèn ta mwosla a ncèkèlma, skwi nzura ka ɓai a gi bi te kokwar. Ta gu mali a ma ma, a ta senyè ɓai, Ndo nzi pèc pècèk a gaɗa.

⁴ Staɗ staɗ te ndev kinè, da gsa va a mandai na ɓai, da fu gèɗ a kramam na ɓai! Aman kramamhi tèlèba ta gi ara Jacob; mandalahi tèlèba ta ngre kinè.

⁵ Ta tèlèba ta ngwoda mandai ta, ta gèɗè ma nzuraʼa azɓai, ta slebau ncèkèlma, ta gi malai a ta jèkeda azɓai.

⁶ Ta gi skwi a wuɗi a ma ma, ta cèkèl ma a ma ma, ta woy a ta senyè ɓai, Ndo nzi pèc pècèk a gaɗa.

⁷ Gar haha Zhiklè bi mbiaʼa a gaɗa: I woya a i wosl ta ara züdo, a i jkede ta. I slaha a i gi skwi ngiɗè a géɗ ndohi ga dè?

⁸ Nèʼèn tengaʼa nara sulom man a ɓèr ndo; nèʼèn tengaʼa a cèkèl ma. Ta gèɗè ma gumai a nslamagi ta, aman te ndav tengaʼa ma nʼngwèdè ndo.

⁹ A géɗ skwi haha i gi kita tengaʼa azɓi dè? Ndo nzi pèc pècèk a gaɗa. Ndohi aranta ta pelay gèɗ azɓi dè?

¹⁰ I hinè nkuɗi za, i hinè ntsi nguzlah a géɗ sam nɗaʼa. A nde na hèshèkèɗ, ndo a bizhè a pa azɓai, kuɗ skwa a te pa ɓai; ɗiakihi a skwi dak tèlèba ta venda gèɗ ta ma.

Juda ngedas na

¹¹ I da mbeɗɗa Jérusalem a hai, a i ndeda a gi skwi dak. I ndeda kokwar Juda a hèshèkèd, a ndo a nzi a pa azɓai.

¹² Ndo man maya na zhè wa, man a sun verzi skwi haha, a Ndo nzi pèc pècèk a ngaɗa na te ma na: herkeda ngedas na, nʼndeda hèshèkèɗ a ndo a bizhè a pa azɓai, a géɗ mè?

¹³ Ndo nzi pèc pècèk a gaɗa: A géɗ man ta kwola ma kita ga, man i va ta, ta fa gèɗ a ma ga ɓai, ta dzadzara ɓai,

¹⁴ aman ta dzodzor ndav ta nsassayaʼa, ta dzodzor Baal man babhi ta ta senda ta.

¹⁵ Gar haha Zhiklè bi mbiaʼa, Zhiklè Israel, a gaɗa: I woya a i ga ta madzaf a skwi nʼndai, a i va ta dèrè a iyam.

¹⁶ I da ksar ta a va ndohi herkeda man ta sen ta ɓai, ko tengaʼa ko babhi ta, a i zlinda ta tsakwal a verzai, ha i ndev ta tèlèba.

Wobau te Sion

¹⁷ Va-huro, va-baha ta ngwozi man ta tsi nguzlah, va-baha ta ngwozi ncèkèslè nguzlah, a ta shkè.

¹⁸ Sèi ta vèsh va a ta hinè ntsi nguzlah a géɗ nga, a nga kuɗi sraffsraffaʼa.

¹⁹ Wobau a tsenkaɗi te Sion. Nga gedassa! Hori a di nga! Sèi nga jèkeda kokwar, gi nga ngedassaʼa.

²⁰ Kinè ngwozai, va-tsena ma Ndo nzi pèc pècèk, va-fu zlembaɗ a ma man a shkè auda te ma na, va-slebda ta ntsi lalau a dalahi kinè, ngiɗè da slebda na ntsi nguzlah a ngiɗè.

²¹ Mʼmetsai a mwucka nga a va nvakavar, a mshkè a gi nga, a zeda wudahi man ta mbèhwali a civèɗ, a golahi a luma.

²² Goɗa! Ndo nzi pèc pè-cèk a gaɗa: Nckondohi ta zhè zlerzleraʼa ara ksof, ara bak pandar te deɓ ndo ntsi dau, man ndo a ɓicè azɓai.

Ndo man a woya a nfi va

²³ Ndo nzi pèc pècèk a goɗ ar haha: Ndo maya da fu va a géɗ maya na ɓai! Ndo wuɗai da fu va a géɗ wuɗi na ɓai! Ndo mèshèlè da fu va a géɗ skwi mèshèlè nengaʼa ɓai!

²⁴ Aman ndo man a woya a nfi va, da fu va a géɗ skwi haha: aman a hér maya, aman a senyè. Aman iyè i vi pombai, i gi kita nzuraʼa a géɗ herkeda. Aman skwi haha ambahayè, Ndo nzi pèc pècèk a gaɗa.

²⁵ Na haha patsa a di a shkè, Ndo nzi pèc pècèk a gaɗa, aman i da gi kita a géɗ ndohi nʼngela ngwon, aman ndav ta ntil ɓai:

²⁶ a géɗ Egypte, a géɗ Juda, a géɗ Edom, a géɗ ndohi Ammon, a géɗ Moab, a géɗ ndohi man ta ngala gèɗ a ta zhè tʼhèshèkèɗ. Aman ndohi herkeda tèlèba ta lèmèlèmè, ndohi nʼngela ngwon ara ndohi man ta ngela ngwon ɓai; ndohi herkeda tèlèba a ndohi Israel tèlèba, ta tila ndav ta ɓai.