Jérémie 8 - Ma Zhiklè

¹ Te ndev nasa, Ndo nzi pèc pècèk a gaɗa, ta da rokoɗi vatasl nckondo bihi Juda, a vatasl wud bihai, a vatasl ndohi mvi skwi a Zhiklè, a vatasl ndohi nhadka ma Zhiklè, a vatasl ndohi Jérusalem auda te gi dzavai.

² Ta da wuzheda a di pats, a di kia, a di bantihai, man ta woy ta, man ta tsu ri a tengaʼa, man ta gu mizlinè ta, man ta dzhaɗ ta a ta gurɓahi a sam ta. Ta da ɓic ta vataslhi te deɓaʼa azɓai, a ta ri a gi dzavi azɓai; a gi a mongoɓa te gi dau.

³ Njèkèdi verzi ndohi ambaɓihia haha, ta da woy mʼmetsai a fena nshèffè, a sam tèlèba man i dzam ta a pa, Ndo nzi pèc pècèk a gaɗa.

Zhiklè a woya a ndev ta ndohai

⁴ Zhiklè a ngaɗa na Jérémie: Ka da gaɗa ta: Ndo nzi pèc pècèk a goɗ ar haha: Ndo man a kèlèhai, a slèmbèdè asaɓi dè? Ndo man a nʼndo na, a menkaɗa deɓa asaɓi dè?

⁵ Ndohi haha ta men ta a deɓa èhè-mè? Jérusalem a mʼmen na a deɓa a mèdèp èhèmè? Ta ghsè va a ncèkèlma, a ta woy a ta ngwèdè ndav azɓai.

⁶ I fu zlembaɗ, i tsenaʼa: aman ta cèkèl ma. Ndo man a nhur shèwa na, a gaɗa: i ga mè! nʼazɓai. Ko wawa a hi a ma ara plèsh man a hi a var.

⁷ Ko ngalawai a sun man tiɗè sama ma; tèlègwai a mbékbèkèu ta sun pats man ta menkaɗa deɓa. Aman ndohi ga ta sun ma nkwèr Ndo nzi pèc pècek ɓai.

⁸ Kin gèɗ ma mè? Nga ndohi maya, ma nkwèr Ndo nzi pèc pècèk a zhè a sam nga; aman ndohi mwindè ɗèlèwèr ta ngwoda a ncèkèlma.

⁹ Ndohi maya ta ngots hori a dai, ta gs ta, ta ga ta kita, ta ngwoda ma Ndo nzi pèc pècèk; kos maya ta maya mè?

¹⁰ Gar haha i da pa ta ngwozi ta a ndohi ngiɗè, gi dau ta a ndohi ndum ta, te man tèlèba ta woy sulai, ko nkèshèʼa ko mbiaʼa, ko ndohi nhadka ma, ko ndo mvi skwi a Zhiklè, ta gi ri tèlèba.

¹¹ Ta woy a ta fa na kwa a gèɗ mali ndohi ga, a ta gaɗa: Gumi a zhè, gumi a zhè aman gumi azɓai.

¹² A woy ta gi horai a gèɗ man ta gau skwi man ambaɓai; aman ta sun hori ɓai, hori a keɗ ta azɓai. Gar haha ta kèlèhai a nda ndohi ngiɗè man ta kèlèhai. A pats man i da gi kita ta, ta da kèlèhai, Ndo nzi pèc pècèk a gaɗa.

¹³ I da ndev ta, Ndo nzi pèc pècèk a gaɗa. Nyi wof azɓai te gi lak, nyi kslor a te pa ɓai, vah a wush na, i da va ta a ndohi man ta bizhè a tsagiaʼa.

¹⁴ Nga nza ɓlussaʼa kè! Ngo-hokoya, a kokwar nʼngalaʼa, a nga zi nga a pa! Te man Ndo nzi pèc pècèk, Zhiklè nga, a zede nga, a va nga iyam dèrè a nga siaʼa, a géɗ man nga gu mali a sam na.

¹⁵ Nga zhor skwi mʼmbél nga – aman skwi man amba a shkè azɓai. Nga hur pats mʼmbél nga – aman na haha, zlau!

¹⁶ Te Dan a tsenko kuɗ plèshihi na, nhèzlèwè ndohi plèsh nengaʼa a gudzeda herkeda tèlèba. Ta da shkè a ta ndeda kokwar a skwi na tèlèba a ma, kokwar a ndohi te pa.

¹⁷ Na haha i pra kinè zhɗzhok a va, zhɗzhok man dèrè te ma, a kin ngècè madzaf dakwal zhɗzhok azɓai, a ta je kinè, Ndo nzi pèc pècèk a gaɗa.

Jérémie a kuɗai

¹⁸ Nlèyè ga a ndèlè azɓai, ndav a dzayè!

¹⁹ Fu zlembaɗ, kuɗ ndohi ga a cinè dra! Ndo nzi pèc pècèk nte Sion ka ɓi dè, bi na nte pa ka ɓi dè? Ta pokoy gèɗ ndav auda a mʼmbèh skwi tengaʼa èhèmè? A mʼmbèh skwi te kokwar ngiɗè man a takaha ta azɓai?

²⁰ Skwi mɓica klèng, nyi wof mpara klèng, skwi mʼmbel nga asaɓai.

²¹ Matakwan ndohi ga a gay matakwan a iyè ba; i lèyè, zlau a ngsyè.

²² Mbar mʼmèn mblè a te Galaad ɓi dè, ndo madzaf a te pa ɓi dè? Mblè ndohi ga a pkwè azɓi èhèmè?