Jérémie 7 - Ma Zhiklè

Njè ma te gi Zhiklè

¹ Ma man Ndo nzi pèc pècèk a gaɗa na Jérémie:

² Zlatsa a ntamagi Zhiklè! A pa, ka njè ma haha a ka gaɗa: Va-tsena ma Ndo nzi pèc pècèk, kin ndohi Juda tèlèba, man kin dè a gi haha, a kin tsi ri a Ndo nzi pèc pècèk.

³ Zhiklè bi mbiaʼa, Zhiklè Israel, a goɗ ar haha: Va-tila civèɗ kinè va-tila maya nshèffè kinè, a kin nzi dai te kokwar haha.

⁴ Kin fu gèɗ a ma nʼngwèdè ndo haha ɓai, man kin gaɗa: Gi Zhiklè, gi Zhiklè! Na haha gi Zhiklè!

⁵ Man kin tila civèɗ kinè, va-tila maya nshèffè kinè! Sei kin gi kita nzuraʼa te ndev ndohai,

⁶ kin ga ta matakwan a ndohi mbrokihi a kra dikai a ngwoz mazi ɓai, kin keɗa ndo man nʼnga mali ɓi ɓai, kin dzodzor zhiklè mbèh skwi ɓai, kin gedassa va kinè a vna ɓai;

⁷ kin da nzi a kokwar haha, te kokwar man i va ta babhi kinè halaʼa a mèdèp.

⁸ Aman na haha kin gshè va a ncèkèl-ma, man a takaha kinè azɓai.

⁹ Mè? Kin gi metsar, kin keɗ ndo, kin gi mphömè, kin mbèɗè ambalai, kin va na skwi a Baal, kin jèjèr zhiklèhi ngiɗè man kin sen ta ɓai;

¹⁰ te deɓaʼa kin shkè, a kin zlècè a sam ga te gi haha, man ta bèhè nzlembaɗ ga, a kin gaɗa: Nga mbel nga!

¹¹ Gi man ta baha na gi Zhiklè, nʼngwoda na a gi metsar a sam kinè dè? I ba i rkaʼa, Ndo nzi pèc pècèk a gaɗa.

¹² Vo-do a sam ga nkezlaʼa te Silo, man i nza a pa halaʼa, a kin rka skwi man i gu a pa a géɗ mali Israel, ndohi ga.

¹³ A géɗ man kin gi skwi haha tèlèba, Ndo nzi pèc pècèk a gaɗa, a kin woy a kin tsena ma ga ɓai, ko i gèɗè a prèk, ko i gèɗè a dakwaɗ, ko i baha kinè, kin mbeɗay a pa azɓai,

¹⁴ a sam gi man ta baha na a nzlembaɗ ga, man kin gso va a vna, sam ga nkezlaʼa man i va kinè, a i va ta babhi kinè, i gia lèmèlèmè ara Silo.

¹⁵ I woya a i dzam kinè auda a sam di ga, ara man i dzam ta kramamhi kinè tèlèba. Verzi ndohi Ephraim tèlèba, man i kwol ta.

Zhiklè a woy ntsi ri a géɗ Jérusalem dai

¹⁶ Zhiklè a ngaɗa na Jérémie: Aman ka, ka tsu ri a géɗ ndohi haha ɓai, ka gu mbuh mbuh a géɗ tenga ɓai, ka tsu ri kam kam ɓai, i cè ntsi ri ngaya azɓai.

¹⁷ Ka rka skwi man ta gu te kokwar Juda, a civèɗ Jérusalem ka ɓi dè?

¹⁸ Wudahi ta pèr shègwa, babhi ta ta kèl vogwa, ngwozi ta shidè a ta ta na movar a ngwoz man ta sla na zhiklè, a ta va ta skwi nsai a zhiklèhi mbèh skwai, a ta pokoy gèɗ ndav auda a vna.

¹⁹ Aman ta pokoy gèɗ ndav auda a iyè dè? Ndo nzi pèc pècèk a gaɗa. Ta gayè a iyè dè? Ta gu skwi ta a va ta, ta ngècè hori a di ta.

²⁰ Gar haha Bi Zhiklè Ndo nzi pèc pècèk a goɗ ar haha: I gi ndzoan ga mbiaʼa a géɗ sam haha, a géɗ ndohai, a géɗ skwi kuɗom, a géɗ wof te dak, a géɗ skwi man a ftskaɗauda tʼher-keɗa, ndzoan worworaʼa man a mbècè azɓai.

Israel a gi mèdègèɗ

²¹ Ndo nzi pèc pècèk, Zhiklè Israel, a goɗ ar haha: Va-ndor skwi a vaʼa, va-zloho skwi a vaʼa, va-ndau zluèɗèʼa!

²² Aman i helka ta babhi kinè auda te Egypte, i dzhaɗa man a ta ndarayè a ta zlahayè skwi ɓai.

²³ Sèi skwi haha man i dzhaɗ ta: Va-tsena ma ga; i da gi a Zhiklè kinè, a kin gi a ndohi ga, a kin dè a civèɗ man i njè kinè tèlèba, a kin nzi amba amba.

²⁴ Aman ta gu mèdègèɗ, ta fa zlembaɗ a ma ga ɓai, ta dzodzor ndav tengaʼa man ambaɓai, ta ngwodkay deɓa, ma ka ɓai.

²⁵ Daga pats man i helka ta babhi kinè auda te kokwar Egypte, ha patsna, i zlinde ta ɓèlèlihi ga tèlèba, ndohi nhadka ma, a prèk ba, a dakwaɗ ba.

²⁶ Aman ta tsena ɓai, ta fa zlembaɗ ɓai, ta sassaya ndav ta, ta gu malai a fena babhi ta.

²⁷ Gada ta ma haha tèlèba; aman ta da cinè azɓi genè. Ka da baha ta; ta da mbeɗa ka a ma azɓi genè.

²⁸ Ka da gaɗa ta; na haha ndohi herkeda man ta woy a ta tsena ma Ndo nzi pèc pècèk, Zhiklè tengaʼa ɓai, ta cè azɓai man a ngatsa ta maya. Ma nzuraʼa azɓai, ma nzuraʼa a te ma ta ɓai.

Skwi mʼmbèh skwai

²⁹ Shè gèɗ ngaya, a ka wusheda gwots aussa, a ka gu wobau! Aman Ndo nzi pèc pècèk a nkwol ta ndohi man ta poko na gèɗ ndav auda.

³⁰ Ndohi Juda ta gu skwi man ambahayè ɓai, Ndo nzi pèc pècèk a gaɗa. Ta feda skwi mbèh skwi hori ta a gi ga, man ta baha na a nzlembaɗ ga, a ta derɗaʼa a vna.

³¹ Ta gu sam mvi skwi a zhiklè a gèɗ za te Topheth, te slrats Ben-Hinnom, aman ta bezde ta wudahi a dalahi a ndev vogwa, skwi man i gaɗa ta ɓai, a i hur ɓi pal ba.

³² Gar haha pats a shkè, Ndo nzi pèc pècèk a gaɗa, ta baha na Topheth asaɓai, ta baha na slrats Ben-Hinnom asaɓai; ta baha na slrats mbèzl ndo, a ta da ri ndo a Topheth, a géɗ man sam ngiɗè a slra ɓai.

³³ Ɗiakihai a skwi dak ta ndeda nckondo ndohi haha a ma, a ndo a dzam ta auda a pa azɓai.

³⁴ I da zede dimèsh mwuffè a lalau mwuffè a mwuffè ntsima, a mwuffè medemai te kokwar Juda, a civèɗ Jérusalem; kokwar a ndi na hèshèkèɗ.