Jérémie 6 - Ma Zhiklè

Wobau Jérusalem!

¹ Ndohi Benjamin, va-hu auda te Jérusalem, va-tsu tolom te Tekoa, va-zlatseda lamba kinè te Beth-Hakkérem! Aman skwi mwuɗitpa a shkè te man a géɗèʼa, skwi ngédèshè ndo mbiaʼa

² a shkè a géɗ kokwar Sion, dem mbelaʼa man ka preda na verzi a pa.

³ Ndohi mɓer skwai a nda rèwè tengaʼa ta shkè a ta tèu-da na gi a deɓa, staɗ staɗ a wèr skwi na a pa.

⁴ Va-tila va a var a géɗ kokwar haha! Va-slambaɗa, ngo-dokona var a géɗ pats! Woba nga, pats a kèlèhi ma, sam a pizlè ma.

⁵ Va-slambaɗa, ngo-dokona a vad, a nga gedassa gi bihai!

⁶ Aman Ndo nzi pèc pècèk, Zhiklè bi mbiaʼa, a gaɗa: Va-ngelda wof Jérusalem a hai, va-ɗizla na kwa a ma kokwar! Wobau a géɗ kokwar man nʼndha a ncè-kèlma, man ta gi skwi te pa a wuɗai.

⁷ Ara iyam a hakaɗauda te nlèlè nengaʼa, mali a hakaɗauda te kokwar na. Ta gèɗè ma wuɗai, ma metsar te pa, pèc pècèk mblè a va ta, ta tsi ndo a sam di ga.

⁸ Jérusalem, co man i ngatsa ka maya; man ɓai i da kwol ka, man ɓai i ndede ka a hè-shèkèd, a herkeda man ndo a nzi a pa azɓai.

⁹ Zhiklè ndohi var a goɗ ar haha: Ta da pèr njèkèdi ndohi Israel, ara ndo mpèr nyi wof, man a pèr vezhèzhèm nyi wof slèw-slèwaʼa.

¹⁰ I gaɗa na ma wa, i gi malwuɗi a sam ngè, a ta fi géɗèʼa? Zlembaɗ tengaʼa nʼndèʼa, ta tsena ɓai. Ma Ndo nzi pèc pècèk ambaha ta ɓai, ta ngwossaha.

¹¹ Ndav ga nʼndha a ndzoan Ndo nzi pèc pècèk; i slaha a i gshè a hi ɓai. Sèi i ga na a va kra ngiɗè a civèɗ, a va golahi tè-lèba man ta ɓica va, ko ngurhi a ngwozai, ko babgihai, ko ndohi nhalaʼa, i ga ta a va.

¹² Gihi tengaʼa, ndohi ngiɗè ta da ngè-cèʼa, a gi lak ba, a ngwozi ba, aman a vava i gidè ri ga a géɗ ndohi kokwar, Ndo nzi pèc pècèk a gaɗa.

¹³ Ta woy sulai, ko nkèshèʼa, ko mbiaʼa, ko ndo nhadka ma, ko ndo mvi skwi a Zhiklè, ta gi ri tèlèba.

¹⁴ Ta woy a ta fa na kwa a gèɗ a mali ndohi ga, a ta gaɗa: gumi a zhè, gumi a zhè! Aman gumi azɓai.

¹⁵ A woy ta gi hori a géɗ skwi man ta gau, skwi man ambaɓai; aman ta sun hori ɓai, hori a keɗ ta azɓai. Gar haha ta kèlèhai a nda ndohi ngiɗè man ta kèlèhai. A pats man i da gi kita ta, ta da kèlèhai, Ndo nzi pèc pècèk a gaɗa.

Zhiklè a kwola ndohi na

¹⁶ Ndo nzi pèc pècèk a goɗ ar haha: Va-zlatsa a civèɗ, va-rkaʼa, va-dzhoɗ civèɗ nhalaʼa: civèɗ mʼmbel ndo tema? va-beza a pa, a kin ngècè nshèk va te ndav kinè. Aman ta gaɗa: Nga woya mbizhè a pa ɓai.

¹⁷ Te deɓaʼa i gaɗa: I va kinè ndohi mɓer kinè. Va-gu maya, aman tolom a tsai! Aman ta gaɗa: Nga woy a nga gi maya ɓai.

¹⁸ Gar haha, kinè ndohi herkeda, kinè ndohi mɓicaʼa, va-tsena skwi man a da ga ta.

¹⁹ Herkeda, fu zlembaɗ! I ngwoda ta matakwan a gèɗ a ndohi haha, a géɗ man ta kwolyè, ta woy a ta cè ma ga ɓai, ta derɗa ma kita ga.

²⁰ Skwi man ta ndarayè, aman a zhkè ara burdi te Saba, te kokwar dra, i gia kè? Skwi man kin ndarayè, ambahay ɓai; a skwi man kin zlayè, i wuffè a géɗèʼa azɓai.

²¹ Gar haha Ndo nzi pèc pècèk a gaɗa: Na haha i pa ta kwa a civèɗ ndohi haha, a tsama ta sak, a ta kèlèhai. Babhi a wudahi ha, ndohi a ndohi man ta a nslamagi ta, ta da zi ta.

Ndohi a lèkèɗ a tsakwal te rai ta shkè

²² Ndo nzi pèc pècèk a goɗ ar haha: Na haha ndohi kokwar ta shkè te civèɗ man a géɗèʼa, ndohi rèdèdèa ta shkè te verzi herkeda.

²³ Lèkèd a tsakwal te rai; ndohi mwuɗitpa, ndo a se ta te va azɓai. Ta hakaɗai ara iyam mbiaʼa, ta a deɓ plèsh, skwi var a va, a géɗ ngaya, kokwar Sion.

²⁴ Aman nga tsena ma nengaʼa, a wushedama nga rai, zlau a dza nga, nga ɗish va ara ngwoz man a yi kra.

²⁵ Kin do dak ɓai, kin nzahi a civèɗ ɓai, aman tsakwal mayam a civèɗ; zlau a sam tèlèba!

²⁶ Dem ndohi ga, feda maslaka sam kuɗa a va, a ka manahi a va mèrwèc. Gu wobau ara man ka kuɗi kra ngaya ngu-raʼa staɗgenè. Tsu lalau! A nasa nasa ndo ngedassa ndo a kala nga va.

²⁷ Zhiklè a ngaɗa na Jérémie: I ge ka a ndo njkeda ndohi ga, a ka suna, a ka jkeda maya nshèffè ta.

²⁸ Ta tèlèba, ta nderkèzhè ndohai, ta woy ma, ta ngre ndo, ta shfa ara züdo, ara gaɗa züdo, ta gedassa skwi tèlèba.

²⁹ Hemaz a ftè vog-wa, aman a vècè vogwa ambalai; skwi man a shkè auda te vogwa, zia genè, züdo te pa ɓai. Ndohi ambaɓihiaʼa ta shkè auda te va ndohi ngiɗè azɓai.

³⁰ Va-baha ta ndohi ga ‘verzhègenè mwoslɓiaʼa’, te man Ndo nzi pèc pècèk a nkwol ta.