Jérémie 52 - Ma Zhiklè

Sédécias, bai

¹ Mvi Sédécias 21, aman ta feda a bai. A ngu bi te Jérusalem mvi 11. Nzlembaɗ mam na Hamuthai, dem Jérémie, te Libna.

² A ngau skwi man ambaɓai a sam di Ndo nzi pèc pècèk, lèmèlèmè ara Jojakim.

³ Skwi a ngau te Jérusalem, te Juda, aranta a géɗ ndzoan Ndo nzi pèc pècèk, man a nkwol ta dra a sam di na. A Sédécias a nslambaɗa na va a bi Babylone.

Ta gso Sédécias

⁴ Te deɓaʼa, man a ngu bai te mvi macüɗaʼa, a ki 10, mʼmèn 10, Nebucadnetsar, bi Babylone, a ndohi var nengaʼa tèlèba ta shkè a ta gi var a Jérusalem. Ta nza na ma, a ta dizla kwa a maʼa, a ta tèuda pa.

⁵ Ta nza na ma a kokwar, ha mvi Sédécias te bi 11.

⁶ A ki 4, mʼmèn 9, mi mbiaʼa te kokwar, movar ndohi kokwar asaɓai.

⁷ A ta zlün zlazlar kokwar, a ndohi var tèlèba ta hu ta. Ta jèkeda kokwar a pa a vaɗ, a ci vèɗ ntamagi te ndev zlazlar cèw, a tsagi gi lak bai; ndohi Chaldée ta tèuda kokwar a pa; a to do a civèɗ hèshèkèɗ.

⁸ Ndohi var Chaldée ta hu a verzi hai. Ta ngots Sédécias tʼhèshèkèɗ Jéricho, a ndohi var nengaʼa tèlèba ta ksar ta auda a sam na.

⁹ Ta gso hai, a ta daʼa a sam bi Babylone, a kokwar Ribla, a kokwar Hamath, a nengaʼa a mbazla kita na.

¹⁰ Bi Babylone a nzlama ta daʼai a wudahi Sédécias a sam di na. A nzlama ta daʼai a wud bihi Juda te Ribla.

¹¹ Te deɓaʼa a ntuzkona na di auda a Sédécias, a ndzawaʼa a cèlèlèu, a bi Babylone a nɗaʼa a kokwar Babylone, a mfeda a gi dangai, ha pats man a mʼmets na.

Jérusalem ngedas na

¹² A ki 5, mʼmèn 10, mvi 19 man Nebucadnetsar, bi Babylone, bai, Nebuzaradan, bi ndohi sojè, nengaʼa man a zhè a tsagi bi Babylone, a ndo a kokwar Jérusalem,

¹³ a nfa na vogwa a gi Zhiklè, a gi bai, a gi te Jérusalem tèlèba. A nfa ta vog-wa a gihi mbibihiaʼa tèlèba.

¹⁴ Ndohi var Chaldée tèlèba man ta zhè a nda bi ndohi soje ta mbeɗa zlazlar man a tèuda Jérusalem a pa.

¹⁵ Aman mbelaw ndohai, a njèkèɗi ndohi kokwar, man ta nza te kokwar, ndohi man ta hu ta a bi Babylone, njèkèɗi ndohi mizlinè, Nebuzaradan, bi sojè, a nhel ta a ɓèlè.

¹⁶ Aman Nebuzaradan, bi sojè, a njèkè ta mbelaw ndohi kokwar, tengaʼa man ta slaha ta gi gi lak a ta pizhè.

¹⁷ Ndohi Chaldée ta mbeɗa sak gi züdo a sam gi Zhiklè, a verzi gai, a sam mpèn va, man a zhè te gi Zhiklè, a ta heldama tèlèba a kokwar Babylone.

¹⁸ Ta hul shiɗèf, a kizlèɗ, a gwèsh, a magats, a tassa a kolongwi züdo man ta gu mizlinè a vna tèlèba.

¹⁹ Bi ndohi sojè a nhul tassa a shidèf a magats a kizlèd a skwi nfi vog-wa, a tassa a kokwai, skwi guro tèlèba, a skwi verzhègenè tèlèba.

²⁰ Sak gi cèw, sam mpèn va, zlèhi 12 man ta zhè a pa, verziaʼa, man Salomon a gau a géɗ gi Zhiklè, kolongwi haha tèlèba, ndo a slaha a nlivè verzhègenè matsa azɓai.

²¹ Sak gai, ngurèʼa a tsi ri 18, sak gai staɗ staɗ tèlèba, man teɓa a tèuda pa, a tsi ri 12, ndazl nengaʼa ara ndazl wud ri 4, vèvèɗ tʼhwaɗaʼa.

²² Ma a géɗèʼa: ngurè maʼa a tsi ri 5. Zlèzlè a pa, a sam maʼa, a skwi ndèlèlkaʼa man a tèuda a pa tèlèba. Lèmèlèmè sak gi macecèwaʼa.

²³ Skwi ndèlèlkaʼa a gi 96 te tsagi ngiɗè te tsagi ngiɗè. Skwi ndèlèlkaʼa tèlèba, a gi 100 a deɓ zlèlè man a tèuda.

²⁴ Te deɓaʼa bi ndohi sojè a nco Seraja, ndo mvi skwi a Zhiklè mbiaʼa, a Sophonie, ndo mvi skwi a Zhiklè mbegédèʼa, a ndohi mɓer ntamagi makar.

²⁵ A nco ntokotasl bai staɗ te kokwar, a nvi a tsuvom ndohi var, a ndohi ngiɗè 7 te va ndohi a ma gi bai, man ta zhè te kokwar. A nco ndo mwindè ɗèlèwèr, man a bi ndohi var, man a mwindè ndohi kokwar, a ndohi kokwar ngiɗè 60.

²⁶ Tenga tèlèba, Nebuzaradan, bi sojè, a hel ta a sam bi Babylone, a kokwar Ribla.

²⁷ A bi Babylone a mbazl ta, a mbazl ta te Ribla, te kokwar Hamath. Aranta Juda a ndo a ngu ɓèlè, dra a sam herkeda na.

Ndohi man to do ɓèlè

²⁸ Na haha ndohi man Nebucadnetsar a nhel ta a ɓèlè: Te mvi matsaraɗaʼa: ndohi Juda 3.023.

²⁹ Te mvi man Nebucadnetsar a ngu bi mvi 18: te Jérusalem, ndohi 832.

³⁰ Aman Nebucadnetsar a ngu bi mvi 23, Nebuzaradan, bi ndohi sojè, a nhel ta ndohi Juda a ɓèlè: 745. Tèlèba 4.600.

Ta slébèrdè Jojakim te Babylone

³¹ Te deɓaʼa, mvi 37, man Jojakin, bi Juda, te ɓèlè, a ki 12, mʼmèn 25, Evil-Merodac, bi Babylone, man a gu bi mvi nshèlèkuraʼa, a nslambaɗda na gèɗ a Jojakim, bi Juda, a mpra auda te ɓèlè.

³² A ngaɗa na ma amba amba, a nʼnzala sam nʼnzi nengaʼa, a géɗ sam nʼnzi bihi tèlèba man ta zhè a nda nengaʼa te Babylone.

³³ A mva na maslaka ngiɗè, maslaka dangai ka ɓai, a Jojakin a nʼndau skwi a sam na pèc pècèk, ha a mʼmets na.

³⁴ Bi Babylone a nwara na di pèc pècèk, a pats nshèffè na tèlèba, ha a mʼmets na.