Jérémie 51 - Ma Zhiklè

¹ Ndo nzi pèc pècèk a goɗ ar haha: Na haha i bahka na kozlar man a gedassa Babylone a ndohi Chaldée.

² Te deɓaʼa i da zlinde ta ndohi mpèvè dau a kokwar Babylone, a ta pèvè skwai; ta ndeda herkeda a ma a sam tèlèba, a pats matakwan.

³ Va-lata lèkèɗ a ndo man a lata lèkèɗ na, a ndo man a fi va, man skwi var a va. Va-bazla golahi na, va-ndevda ndohi var nengaʼa tèlèba!

⁴ Ndohi mbazlaʼa ta zhè te kokwar Chaldée, ndohi man tsakwal a ntez ta, ta zhè te kokwar Babylone.

⁵ Aman Zhiklè Israel a Juda, Zhiklè bi mbiaʼa, a jèkeda kokwar ta a gèɗ ta ɓai, ko herkeda tengaʼa nʼndha a malai a sam Zhiklè Israel nkezlaʼa.

⁶ Va-hu kinè te ndev Babylone, staɗ staɗ tèlèba da mbelda nshèffè na, man ɓai kin da zi kinè te mali Babylone; aman pats kita Ndo nzi pèc pècèk. A da ga na ara skwi man a gau.

⁷ Babylone te va nasa, kokwi guro te ri Ndo nzi pèc pècèk, a ngu a zom a nkeɗa herkeda tèlèba. Ndohi herkeda ta sau zom te pa; gar haha gèɗ ta nza.

⁸ Tsam-tsam Babylone nkalahai, mʼmbeɗ na. Vo-ngoy va a géɗèʼa, vo-co madzaf a géɗ skwi ndzi na, wa ngiɗè ba a da mbél na!

⁹ Nga va na madzaf a Babylone, a mʼmbela ɓai. Sèi nga jèkeda, staɗ staɗ tèlèba do do a kokwar na, aman kita nengaʼa a ndikè a zhiklè ma, a ndikè a va vani ma.

¹⁰ Ndo nzi pèc pècèk a nʼngreda ngi-zura nga auda; vo-washkè, ngo-njokoy te Sion, skwi man Ndo nzi pèc pècèk, Zhiklè nga, a ngau.

¹¹ Va-tasla sulom, va-hul gambar! Ndo nzi pèc pècèk a mpoko ta gèɗ auda a bihi te Médie, aman a nhur maya, a woya a ngedassa Babylone. Nasa kita Ndo nzi pèc pècèk, skwi mpil gèɗ, man a jhèɗè a géɗ gi na.

¹² Va-zlatseda bata a géɗ zlazlar Babylone, va-pu ndohi a vaʼa, va-pe ta ndohi mɓer kokwar a pa, va-ɗizla kwa, aman skwi man Ndo nzi pèc pècèk a huro, a nhodko ma a géɗ ndohi Babylone, a giaʼa.

¹³ Ka man ka nza a ma woyam mbiaʼa, man skwi mèshèlè ngaya a ndev ɓai, nʼndikèma ngaya a mshkè ma, mali ngaya nrufa ma!

¹⁴ Ndo nzi pèc pècèk a mʼmbaɗa a ma na: A vava, i da ndha kokwar ngaya a ndohi ara dzarai, a ta da gi nguzli var a géɗ ngaya.

Zhiklè man a gau skwi tèlèba

¹⁵ Zhiklè a ngau herkeda a wuɗi na, a mpau herkeda a maya na, a mwuzhè giɗfek a nshin maya na.

¹⁶ Aman a gèɗè, iyam tʼhwaɗ giɗfèk a kuɗai. Nengaʼa a bahka ta vanihai te verzi herkeda, a gi a iyam a tsai, a iyam a gai, a bahka na kozlar auda a sam nʼnzi na.

¹⁷ Ko wawa a rzl na a sam maya man a suna, ngwozlazlihi tèlèba ta gi hori a géɗ skwi mbèh skwi man ta gau. Te man skwi mbèh skwai, skwi ncèkèlma genè, nshèffè a te pa ɓai.

¹⁸ Skwi ambalai, skwi nʼngwèdè ndo, ta zi ta a pats kita.

¹⁹ Zhiklè Jacob az arsa ɓai. Aman nengaʼa a ngau skwi tèlèba, nengaʼa a ngau herkeda. Israel, verzi ndohi man ta ndi gi nengaʼa. Nzlembaɗ na Zhiklè bi mbiaʼa.

Babylone ndumaʼa

²⁰ Ka züdo te ri ga, skwi var man i bazl ta ndohi herkeda a vna;

²¹ a ka i gedassa kokwar-bihai. A ka i keɗa plèsh a ndo plèsh nengaʼa; a ka i pasla kikai, a nengaʼa man a nza te pa.

²² A ka, i bazla nda nguraʼa a ngwoz; a ka i bazla nda babgai a kra. A ka i bazla nda gola a bidalai.

²³ A ka i keɗa ndo mɓer skwai a rèwè na; a ka i keɗa ndo mpizhè a nda zlèhi na. A ka i bazla bihai a ndohi mbibihiaʼa.

²⁴ I da ngwoda ta skwi ambaɓiaʼa tèlèba man Babylone a ndohi Chaldée ta ga na Sion, a gèɗ, a sam di kinè, Ndo nzi pèc pècèk a gaɗa.

²⁵ Na haha, nga a ka ma, za ngédèshè skwai, Ndo nzi pèc pècèk a gaɗa. Ka man ka gedassa herkeda tèlèba! I geda ri ga a géɗ ngaya, i gudumbal ka a hai te za, i da ge ka a za man vogwa a shkè auda te pa,

²⁶ a ndohi ta cè kwa verzi gai a sam ngaya asaɓai. Ka gedassa a mèdèp, Ndo nzi pèc pècèk a gaɗa.

²⁷ Va-zlatseda bata te kokwar! Va-tsu tolom te ndev ndohi herkeda! Va-til ta ndohi herkeda, va-bahka ta kokwar-bihai a sam na: Ararat, Minni a Ashkenaz! Va-ɓicka ta bihi a sam na, va-zlinda plèshi kumba ara dzarai a pa!

²⁸ Va-tila ndohi herkeda, a ta dè a sam na; bihi Médie, ndohi nengaʼa mbibihiaʼa, bihi sojè na a kokwar tèlèba man nte ri na.

²⁹ Aman Ndo nzi pèc pècèk a ga na Babylone skwi man a nhuro, herkeda a gi zlau, a gudzai, aman a ndeda kokwar Babylone a hèshèkèɗ, a kokwar man ndo a te pa ɓai.

³⁰ Ndohi var te Babylone ta jèkeda var, ta nza te gi ndakmaʼa. Wuɗi ta a ndev na, ta ara ngwozai. Vogwa a nʼndeda gihi ta a ma, skwi mɓèr gi mpasla.

³¹ Ndohi a ɗèlèwèr te rai, ta zli gèɗ, ndohi sak ta zli va auda a tsagai, aman ta da njè na bi Babylone, ara man kokwar na ndumda ma, a tsagi kokwar tèlèba,

³² ara man civèɗ asaɓai, vogwa a nʼndeda skwi var a ma, a ndohi var ta gi zlau.

Kita a géɗ Babylone

³³ Aman Zhiklè bi mbiaʼa, Zhiklè Israel, a goɗ ar haha: Kokwar Babylone nara hedak a pats man ta kizlè dau te pa. Njèkè kètè, a pats mɓicè skwi na a mshkè ma.

³⁴ Kokwar Sion a gaɗa: Nebucadnetsar, bi Babylone, a ndiyè a ma, a ngedassyè, a ngyè ara shidèf man skwa a te pa ɓai, nara kedam man a ngerɗyè a hwaɗ, a nʼndha hwaɗ na a skwi ga mbelaʼa, a ndzamyè.

³⁵ Shèwa man ta gayè a ta ga na va ga, da ngwoda na va a gèɗ a Babylone. Jérusalem a gaɗa: Pombaz ga da ngwoda ta va a gèɗ a ndohi Chaldée.

³⁶ Gar haha Ndo nzi pèc pècèk a gaɗa: Na haha, iyè i nza ka a deɓa, i da ngatsa ka skwi mpil gèɗ. I da gwora iyam mbiaʼa, a nlèlè na a she na.

³⁷ Babylone a da mbéɗ na; sam nʼnzi barkda, hèshè-kèɗ man ta ngwèshè a pa, ndo a nzi a pa azɓai.

³⁸ Tèlèba ta da kuɗi ara marizhèlèhai, ta kuɗi ara wud marizhèlè.

³⁹ Nté-tékè a keɗ ta, i da va ta zom a nda keɗ ta, a ta gi ngolala; te deɓaʼa ta nzhun ta a mèdèp, ta pidèkwe ta asaɓai, Ndo nzi pèc pècèk a gaɗa.

⁴⁰ I de ta a sam nzli ta, ara tambakihai, ara drokihai a mazawalhai.

⁴¹ Aikwa! Ta ceda Shéshac a ma! Nengaʼa man nʼnjèl na nʼndha herkeda tèlèba, ta cedama! Aikwa! Ta ceda Babylone a ma, ngedas na te ndev ndohi herkeda!

⁴² Iyam mbiaʼa a nzeda Babylone, a nzeda gèɗ Babylone a pa.

⁴³ Kokwarhi nengaʼa ta nde ta a hèshèkèɗ, a herkeda ngworaʼa, a tazli hèshèkèɗ, a herkeda man ndo a nzi a pa azɓai, ndo a bizhè a pa azɓai.

⁴⁴ I gi kita a géɗ Bel, te Babylone, i ngézlè skwi te ma na, man a gerdè a hwaɗ. A ndohi herkeda ta haya a sam na asaɓai. Ko zlazlar Babylone mʼmbeɗ na!

⁴⁵ Ndohi ga, vo-washkè auda te pa, staɗ staɗ tèlèba da mbela nshèffè na, da hu na a sam ndzoan Ndo nzi pèc pècèk mbiaʼa!

⁴⁶ Ndav kinè da gudzu ɓai, kin gu zlau ɓai, a géɗ ma man kin tsena te kokwar, ma man kin tsena a vi na, a vi ngiɗè ba: skwi mwuɗitpa a zhè te kokwar, bi mwuɗitpa a mena na gèɗ a bi mwuɗitpa ngiɗè.

⁴⁷ Aman pats ngiɗè a di a shkè, i da gi kita a géɗ skwi mbèh skwi te Babylone. Herkeda tèlèba a ngècè horai a dai, ndohi ta bèzl ta te ndevaʼa.

⁴⁸ Giɗfèk a herkeda a skwi te pa, ta da gi wobau a géɗ Babylone, aman ndohi ngédèshèʼa ta da shkè a sam na te man a géɗèʼa, Ndo nzi pèc pècèk a gaɗa.

⁴⁹ Babylone ba a da kè-lèhai, a géɗ kinè ndohi Israel mbazlaʼa, lèmèièmè ara man ndohi a géɗ herkeda tèlèba ta bazl ta a géɗ Babylone.

⁵⁰ Kinè man kin hi kinè auda a sam tsakwal, vo-do, kin zlatsahi ɓai. Aman kinè dra, va-hur Ndo nzi pèc pècèk; Jérusalem da pca kinè a gèɗ ɓai!

⁵¹ Aman nga tsena, ara man ta dérɗèʼa, a nga gu horai, hori a di nga; aman ndohi verzi tsaɗ ta shkè a sam nkezlaʼa, a gi Zhiklè.

⁵² Gar haha, patsaʼa a di a shkè, Ndo nzi pèc pècèk a gaɗa, aman i da gi kita a skwi mbèh skwai tʼherkeda nengaʼa tèlèba. Ndohi mbazlaʼa ta ngèy va.

⁵³ Ko man Babylone a grè gèɗ ha ndè a giɗfèk, man ndo a slaha a ndikè a sam gihi nengaʼa ndakmaʼa azɓai, ndohi ngédèshè skwai man i da zlinde ta, ta da ndikè a sam na, Ndo nzi pèc pècèk a gaɗa.

⁵⁴ Kuɗa a cinè auda te Babylone, kuɗa a wobau mbiaʼa te kokwar Chaldée,

⁵⁵ aman Ndo nzi pèc pècèk a ngedassa Babylone. A tseda ta ma a pa, aman nhè-zlèwè nengaʼa a ga a mbiaʼa ara kuɗ iyam mbiaʼa.

⁵⁶ Halau, ndo ngédèshèʼa a shkè a sam na, a kokwar Babylone, a dzaw ta ngul ndohai, a pasla lèkèɗ ta; aman Ndo nzi pèc pècèk Zhiklè man a va na ndo staɗ staɗ lèmèièmè ara man a gau, a pela ta.

⁵⁷ I gi a zom a keɗ ta wud bihai a ndohi maya nengaʼa, mbibihiaʼa te pa, bihi na a ndohi var na. A ta da nzhun ta a mèdèp, ta da pidèkwè asaɓai. Bai, man nzlembaɗ na Zhiklè bi mbiaʼa, a ngoɗa.

⁵⁸ Zhiklè bi mbiaʼa a gaɗa: Zlazlar Babylone mbiaʼa ta da mbeɗ ta hai. Ntamagi nengaʼa mbiaʼa, vogwa a da ndiaʼa.

Jérémie a Seraja

⁵⁹ Ma man Jérémie, ndo nhadka ma, a ngaɗa na Seraja, kra Nérija, kra Machsé-ja, aman a ndo a kokwar Babylone a nda Sédécias, bi Juda, te ngi bi na, mvi mafadaʼa. Seraja, ndo mɓer gi na.

⁶⁰ Jérémie a mwindo matakwan tèlèba man a da ga na Babylone, a ɗèlèwèr: Ma haha a nhodkoɗa a géɗ Babylone, man a mwindo.

⁶¹ Jérémie a ngaɗa na Seraja: Aman ka da ndikè a kokwar Babylone, ka da jèngè ma haha, a ka gèɗèʼa:

⁶² Ndo nzi pèc pècèk, ka ka goɗ a géɗ sam haha, ka da zeda, a ndo a da nzi a pa azɓai, ko ndo, ko skwi dak, aman hèshèkèɗ a mèdèp.

⁶³ Aman ka jongo ɗèlèwèr haha klèng ma, ka da manda kwa a pa, a ka da kalda a woyam Euphrate.

⁶⁴ Te deɓaʼa ka da gaɗa: Lèmèièmè Babylone ba, matakwan man i da zlinda na, a da zeda na gèɗ a pa, a da slèmbèɗè te pa te deɓaʼa asaɓai. Ma Jérémie tar nta.