Jérémie 50 - Ma Zhiklè

Babylone

¹ Ma man Ndo nzi pèc pècèk a goɗ a géɗ Babylone, a géɗ kokwar Chaldée, te ma Jérémie, ndo nhadka ma:

² Va-njo a sam ndohi herkeda, va-ngreda, va-zlatseda bata, va-ngreda, kin ngheda ɓai! Vo-goɗa: Babylone, nduma ma, Bel a nʼngots hori a dai, Merodac mʼmbeɗ na, skwi mbèh skwi nengaʼa klèng, mblomhi nengaʼa ta mbeɗ ta.

³ Aman ndohi herkeda te man a géɗèʼa ta shkè a ta gi var a Babylone, ta da gédèshè kokwar na, ndo a nzi a pa azɓai, ko ndo, ko skwi dak, tèlèba ta hu ta, to do ta.

⁴ A pats nasa, te ndev nasa, Ndo nzi pèc pècèk a gaɗa, ndohi Israel a ndohi Juda ta da shkè a sam nstaɗ, ta da shkè, a ta kuɗai, a ta woy Ndo nzi pèc pècèk, Zhiklè ta.

⁵ Ta da jhèɗèʼa: Sion tema? Ta da pi di a civèɗ na. Vo-washkè, ngo-humdokoy va a Ndo nzi pèc pècèk, a nderzlè-ma nengaʼa a pca nga a gèɗ te deɓaʼa asaɓai!

⁶ Ndohi ga ara rèwè tambakihai man ta zlak ta. Ndohi mɓer skwi tengaʼa ta zlakede ta te za, to do a géɗ za, rèwè skwi ta mpca ta a gèɗ.

⁷ Ko wawa man a ngats ta, ta nde ta ma, ndohi mayamhi ta, ta gaɗa: mali nga ka ɓai; a géɗ man ta gu mali a sam Zhiklè, sam nʼnzi ngi-zuraʼa, a sam Ndo nzi pèc pècèk, man babhi ta ta zhèrèʼa.

⁸ Va-hu auda te Babylone, va-jèkeda kokwar Chaldée, va-gu ara drok a ma tambakihai.

⁹ Aman i bahka ta ndohi rè-dèdèʼa, ndohi herkeda mbibihiaʼa te man a géɗèʼa, a ta gi var a Babylone. Ta da dèhè va a sam na, a ta dumda ma. Sulom tengaʼa, sulom ndo man a sun var, man a kèlèhi ambali azɓai.

¹⁰ Kokwar Chaldée a kuɗi ma, tengaʼa man ta dumaʼa ta da ngézhè, Ndo nzi pèc pècèk a gaɗa.

¹¹ Kinè man kin duma skwi nʼndi gi ga, va-wuffa, va-gu langlangaʼa, va-nzevau ara dem zlè te ndev mandai a kin kuɗi ara plèsh ndzagara;

¹² mam kinè, gèɗ ndza-kaɓa, hori a dai, ntabawaʼa te va ndohi herkeda, hèshèkèɗ, herkeda ngworaʼa, tazli hèshèkèɗ.

¹³ A géɗ ndzoan Ndo nzi pèc pècèk, ndo a nzi a pa azɓai, ngedassa tèlè. Ko wawa man a bizhè auda a kokwar Babylone, a rzl na, ta pèrè a pa, a géɗ mblè nengaʼa tèlèba.

¹⁴ Va-ɗaha va a kin gu var a Babylone a sam tèlèba, kinè man kin lata lèkèɗ. Va-ɓor a sulom, kin ngheda sulom ɓai, te man a ngu malai a sam Ndo nzi pèc pècèk!

¹⁵ Va-guzlu var a géɗ nengaʼa a sam tèlèba! Nengaʼa a gidè rai, sak gi nengaʼa mʼmbeɗ na, zlazlar nengaʼa nzlina; nasa kita Ndo nzi pèc pècèk. Vo-dzhoɗo skwi mpil gèɗ a sam na, va-ga na lèmèlèmè ara man nengaʼa a gau!

¹⁶ Va-ndeva te Babylone ndo man a zlekai, ndo man gwodza te rai a pats mɓicè skwai. Ko wawa da men na a deɓa a sam ndohi na, da hu a kokwar na, te ri tsakwal man a gédèshè skwai.

¹⁷ Israel nara tambak man a zlak na, man marizhèlèhai ta dzamaʼa. Bi Assyrie a nʼndedama nshèlèkuraʼa, a Nebucadnetsar, bi Babylone, a mpaslama na vatasl te deɓaʼa.

¹⁸ Gar haha Zhiklè bi mbiaʼa, Zhiklè Israel, a gaɗa: Iyè i gi kita a géɗ bi Babylone, a géɗ kokwar nengaʼa, lèmèlèmè ara man i gu kita a géɗ bi Assyrie.

¹⁹ Te deɓaʼa i da helka ta ndohi Israel a deɓa a sam nʼnzi ta. Ta da ndi mandai te Carmel, te Basan, te za Ephraim, te Galaad, a ta da ngeza hwaɗ.

²⁰ A pats nasa, te ndev nasa, Ndo nzi pèc pècèk a gaɗa, ta da woy mphömè Israel; aman nʼasaɓai. Ta da woy mali Juda; ta da ngècè asaɓai, te man i da pre ta, a njèkèɗi man i jèka ta.

²¹ Do a ka gu var a kokwar Merathaim! Do a ka gu var a nengaʼa, a ndohi Pekod! Gedas ta, zede ta njèkèɗi tèlèba, Ndo nzi pèc pècèk a gaɗa. Gau tèlè ara man i njè ka a gèɗ.

²² Nguzli var te kokwar tèlèba; skwi ngédèshè mbiaʼa.

²³ Züdo man a tsi herkeda tèlèba, ngedas na, mpasla te ri mè? Babylone ngedas na te va ndohi herkeda a maya mè?

²⁴ I nga ka ɓalai a hai, iyè ngse ka arsa, Babylone! Ka sun ɓai, aman ta ngats ka; ta gs ka langa, a géɗ man ka gu var a Ndo nzi pèc pècèk.

²⁵ Ndo nzi pèc pècèk a winè gi skwi var na, a nhulkoɗi skwi var ndzoan nengaʼa auda; aman mizlinè Bi Zhiklè, Zhiklè bi mbiaʼa, a zhè tʼherkeda Chaldée.

²⁶ Vo-washkè a sam na te verzi herkeda tèlèba, va-winè wov na, va-tsam ta ara nkèl dau, va-ndevda, kin jèkaha ɓai!

²⁷ Va-zlaha marihi nengaʼa tèlèba, va-hel ta a sam nzli ta. Wobau a géɗ tengaʼa, aman a patsna pats kita tenga a mshkè ma!

²⁸ Va-tsena kuɗ ndohi man ta hi ta, man ta mbel ta auda te kokwar Babylone; aman ta da njè kita Ndo nzi pèc pècèk, Zhiklè nga, kita gi Zhiklè nengaʼa te Sion.

²⁹ Va-bahka ta ndohi lèkèɗ, tèlèba man ta sun mɓèr skwai a lèkèɗ, a kokwar Babylone. Va-nza na ma a sam tèlèba, aman ta slaha ta hi auda azɓai. Va-ga na ara maya nengaʼa man a gau, va-ga na lèmèlèmè ara man nengaʼa a gau. Aman nengaʼa a grè gèɗ a sam Ndo nzi pèc pècèk, Zhiklè Israel nkezlaʼa.

³⁰ A géɗ nengaʼa golahi nengaʼa ta bazl ta a civèɗ, a ndohi var nengaʼa ta ndev ta a pats sa, Ndo nzi pèc pècèk a gaɗa.

³¹ Na haha i tara ka ri a dai, ka man ka fi va, Bi Zhiklè Ndo nzi pèc pècèk a gaɗa; pats kita ngaya a mshkè ma.

³² Nengaʼa man a fi va, a da kèlèhai, ndo a slèmbèɗdè azɓai. I da fa na vogwa a kokwarhi nengaʼa, a nʼndeda samaʼa, a sam a tsagiaʼa, a ma tèlèba.

³³ Zhiklè bi mbiaʼa a goɗ ar haha: Ndohi Israel a ndohi Juda ta tʼhai, ta ga ta matakwan. Ndohi tèlèba man ta hel ta a ɓèlè, ta gs ta hai, ta woy a ta pre ta ɓai.

³⁴ Aman ndo nsumka ta a deɓa, wuɗi na zhè, nzlembaɗ na Zhiklè bi mbiaʼa, a sun nʼnza ta a deɓa, aman a vi gumi a herkeda, a pra ta zlau a va ndohi Babylone.

³⁵ Tsakwal a va ndohi Chaldée! Ndo nzi pèc pècèk a gaɗa. A va ndohi Babylone, a wud bihi na, a ndohi maya nengaʼa!

³⁶ Tsakwal a va ndohi ntsi tsaval, man gèɗ ta nza! Tsakwal a va ngul ndohai, a ta gi zlau!

³⁷ Tsakwal a va plèshihi a kiki var nengaʼa, a va ndohi tèlèba a sam na; da ngwode ta, a ta gi zlau ara ngwozai Tsakwal a va skwi mèshèlè, a ta heldama!

³⁸ Iyam nengaʼa da gwor na, da she na! Aman kokwar haha, kokwar mʼmbèh skwai, skwi horai a pa ta a pa a ndav.

³⁹ A gèɗ nengaʼa kda dak a da nzi a pa a nda kokoyahai; zhèrèu a da nzi a pa; ndo a da nzi a pa azɓai a mèdèp. Te verzi verzi ndo, ndo a da nzi a pa azɓai.

⁴⁰ Kita Zhiklè lèmèlèmè ara Sodome, Gomorrhe, a sam man a tsagiaʼa, Ndo nzi pèc pècèk a gaɗa; ndo a da nzi a pa azɓai, ndo azɓai man a da gi gi a pa.

⁴¹ Na haha ndohi herkeda ta shkè te man a géɗèʼa, ndohi herkeda mbiaʼa, a bihi kumba, ta da slèmbèdè te verzi herkeɗa.

⁴² Lèkèɗ a zhèngèzhè te rai, wuɗitpa, ndo a se ta te va azɓai, daʼai tengaʼa nara kuɗ iyam. Ta a deɓ plèsh, ta ʼdaha va a var, ara ndo staɗ a gèɗ ngaya, kokwar Babylone.

⁴³ Bi Babylone a ntsena ma mɓuaʼa haha, a wushedama na ri nengaʼa; zlau mʼmetsai a ngso, a gudzi ara ngwoz man a ɗish kra.

⁴⁴ Ara marizhèlè a shkè auda a dzah woyam Jourdain, a sam nʼnzi nengaʼa te va nhèyè wof. Tsam-tsam i dzam ta. A i da fi nengaʼa man i ngotskoɗauda a bi nengaʼa. Ngar iyè wa? Nʼnjèy ma a gèɗ, wa? Bi man a salay va a gèɗ, wa?

⁴⁵ Gar haha va-tsena ma man Ndo nzi pèc pècèk a goɗ a gèɗ Babylone, a skwi man a nhur a woya a ngiaʼa a sam ndohi Chaldée. Ta da zlama ta daʼai a wud tambakihi nhezakaʼa, ta da gedassa sam nʼnzi ta, a vava.

⁴⁶ Aman Babylone a kèlèhai, herkeda a gudzai. Wobau a cinè te va ndohi herkeda.