Jérémie 5 - Ma Zhiklè

Jérusalem a sassaya di na

¹ Vo-do a hwaɗ kokwar a civèɗ Jérusalem tèlèba, vo-wora: Kin ngècè ndo staɗ man a gi zuraʼa dè, man a woy ma nzura dè, a i da pra na mali na.

² Ta gaɗa: Ko Ndo nzi pèc pècèk a zhè, ta mbèɗè a ta cèkèl ma.

³ Ndo nzi pèc pècèk, di ngaya a woy ncèkèlma ɗè? Ka tse ta, a dzaha ta azɓai. Ka zler ta a sak, ta woy a ta tsena ɓai. Ta shfa di ta a fena kwa, ta woy a ta ngwoda ndav ta ɓai.

⁴ A i hur i gaɗa: Mbelaw ndohai, ta rzla, a géɗ man ta sun civèɗ Ndo nzi pèc pècèk ɓai, ta sun kita Zhiklè tengaʼa ɓai.

⁵ I woy a i dè a sam ndohi mbibihiaʼa a i gaɗa ta, te man tengaʼa ta sun civèɗ Ndo nzi pèc pècèk, ta sun kita Zhiklè tengaʼa. Aman tengaʼa ba ta proslko wof nkelawa auda te daʼai, ta pra teɓa.

⁶ A géɗ nengaʼa marizhèlè te dak a cizl ta, kda dak a nde ta ma, kokoya a pi va te deɓ kokwar ta. Ndo man a dè auda te kokwar, ta cizl ta. Te man mali ta a zhè kumba, ta men ta a deɓa dra.

⁷ Zhiklè a gaɗa: Ar i pra ka mali èhè-mè? Wudahi ngaya ta jèkyè, ta mbaɗa, aman a nzlembaɗ Zhiklè ka ɓai. I va ta skwi a ta ngezaʼa, a to do a ta gu mphömè, ta sawala te gi fali ngwozai.

⁸ Ta gu ara mari plèshi mpertataʼa, man mi ngwoz a keɗ ta, staɗ staɗ tèlèba a kuɗi a géɗ ngwoz nslamagi na.

⁹ I gi ndzoan a pa azɓi dè? Ndo nzi pèc pècèk a gaɗa. Ndohi herkeda aranta ta pil gèɗ azɓi dè?

¹⁰ Va-teva a zlazlar ta, va-gedassaʼa, aman kin ndeva tèlè ɓai! Va-slɗd ri wofhi ambaɓihiaʼa auda, man a Ndo nzi pèc pècèk ka ɓai!

¹¹ A géɗ man a vava ndohi Israel a ndohi Juda ta gay ri a gèɗ, Ndo nzi pèc pècèk a gaɗa.

¹² Ta cèkèl ma a géɗ Ndo nzi pèc pècèk, ta gaɗa: Zhiklè azɓai. Matakwan a da ga nga azɓai. Tsakwal a mai a da ga nga azɓai.

¹³ Ma ndohi nhadka ma, ma ambalai, a gi azɓai. Ta gèɗè ma Zhiklè azɓai.

Ndohi ngedassa kokwar Jérusalem

¹⁴ Gar haha Zhiklè bi mbiaʼa a goɗ aranta: A géɗ man kin goɗ ar haha, i gi aman ma ga te ma ngaya a gi ara vogwa, a ndohi ta ndi ara shègwa, a vogwa a ndiaʼa.

¹⁵ I bahka ta ndohi ngiɗè dra, a ta da kala kinè a va, kinè ndohi Israel, Ndo nzi pèc pècèk a gaɗa. Ndohi nhalahiaʼa, ndohi man zlèzlèa ta zhè, ndohi man ka sun ma tengaʼa ɓai, ka tsena daʼai tengaʼa ɓai,

¹⁶ godoma tengaʼa, mʼmetsi te pa, tèlèba ngul ndohai.

¹⁷ Ta da ndi skwi man ka ɓicaʼa, movar ngaya; ta da ndev ta wudahi a dalahi ngaya; ta da ndi tambakihi a zlèhi ngaya, a wof barassa a wof kslor ngaya; ta da gedassa kokwar ngaya nʼngala te pa a tsakwal, kokwar man ka gso va a vna.

¹⁸ Aman ko a pats nasa i woy a i ndev kinè tèlè ɓai, Ndo nzi pèc pècèk a gaɗa.

¹⁹ Aman kin da gaɗa: Ndo nzi pèc pècèk, Zhiklè nga, a ga nga skwi aranta tèlèba èhèmè? I gaɗa kinè: Ara man kin jèkyè, a kin dzodzor zhiklèhi mbèh skwai te kokwar kinè, lèmèlèmè kin da gi mizlinè ndohi ngiɗè man verzi ta tsaɗ, te kokwar man kokwar kinè ka ɓai.

Israel a ngwèdè rai

²⁰ Va-njè ta ndohi Juda aranta, vo-boho te Juda, va-gaɗa ta:

²¹ Kinè ndohi nrzlaʼa, man maya kinè azɓai, va-tsena ma haha! Di kinè a zhè, kin rka ɓai; zlembaɗ kinè a zhè, kin tsena ɓai.

²² Kin gi zlau ga azɓi dè? Ndo nzi pèc pècèk a gaɗa. Kin gudzi a sam ga azɓi dè? I pu wyak a kuma woyam mbiaʼa, kuma a mèdèp; a slaha a ntawaɗa ɓai. Iyam a hi a wuɗai, a slaha hai. A gi tskuduf-tskuduf, a slaha a nhi auda azɓai.

²³ Ndohi haha ta gi mèdègèɗ, ta kiɗèhɗè va, ta ngwodkay deɓa, ta kal ta.

²⁴ Ta hérè ar haha ɓai: ngo-gokoy zlau Ndo nzi pèc pècèk, Zhiklè nga; nengaʼa man a gi iyam blèkwai, iyam nzlekai a iyam man a da gi aman nga ɓicè skwi ma, tiɗè samaʼa tiɗè samaʼa.

²⁵ Mphömè kinè a ndzakaɓa skwi haha; a géɗ mali kinè, mpshè ma azɓai.

²⁶ Aman te va ndohi ga, ndohi ambaɓihiaʼa ta zhè. Ta pi votok a hai, ara ndohi man ta gshè ɗiak, Ta gi gadda a hai, aman ta gshè ndo.

²⁷ Gi tengaʼa ara gojègwèr, nʼndha a ɗiakihai. Aranta ta ngots skwi ta te nʼngwèdè rai.

²⁸ Aranta ta ge ta a ndohi mbibihiaʼa, a ndohi mèshèlè. A ta tawaɗaha ma kita, ta takaha kra diki azɓai, ta nza na a deɓa a ngwoz mazi azɓai.

²⁹ I gi ndzoan a pa azɓi ɗè? I ga ta kita a ndohi ar haha, a ta pil gèɗ, azɓi dè? Ndo nzi pèc pècèk a gaɗa.

³⁰ Skwi man mwuɗitpa, skwi horai, a gu te kokwar;

³¹ Ndohi nhadka ma ta hodko ma ta tsakal ma. Ndohi mvi skwi a Zhiklè ta takaha ta te pa. Ndohi ga, ambaha ta. Aman te deɓ nengaʼa, kin da gi mè?