Jérémie 49 - Ma Zhiklè

Ammon

¹ A géɗ ndohi Ammon: Ndo nzi pèc pècèk a gaɗa: Wudahi Israel klèng dè, ndohi ngi gi tʼazɓi dè? Malcom a nʼngots Gad a skwi nʼndi gi èhèmè? Ndohi nengaʼa ta nzi te kokwar nengaʼa dè?

² Gar haha pats a di a shkè, Ndo nzi pèc pècèk a gaɗa, aman ta da cinè nguzli var a géɗ Rabbath ndohi Ammon, a ngi a dikai mʼmbeɗaʼa. Vogwa a nʼndeda dalahi nengaʼa a ma. Israel a da dzam ta ndohi man ta dzama nengaʼa, Ndo nzi pèc pècèk a gaɗa.

³ Hesbon, ngoy va, te man Ai ngedas na. Dalahi Rabbath, va-kuɗau, va-feda maslaka sam kuɗa a va, va-gu wobau, va-gots tʼhwaɗ zlazlar, a géɗ man Malcom a dè ɓèlè, a nda ndohi mvi skwi a Zhiklè, a wud bihi nengaʼa.

⁴ Ka fu va a géɗ slrats ngaya; slrats ngaya mʼmbeɗ na, ka kokwar man ka tsena gèɗ ɓai! Ka man ka pu ndav a skwi mèshèlè ngaya! Nda slahay wa?

⁵ Iyè, i slaha ka, a i pra ka zlau a va, Bi Zhiklè bi mbiaʼa a gaɗa. Ndohi tèlèba man ta tèuda ka a pa, ta da pra ka zlau a va, ta jèm ngiɗè, ta jèm ngiɗè, staɗ staɗ tèlèba te ndev kinè, ndo mɓica ndohi man ta hi ta azɓai.

⁶ Aman te deɓ nengaʼa i da helka ta ndohi ɓèlè Ammon a deɓa, Ndo nzi pèc pècèk a gaɗa.

Edom

⁷ A géɗ Edom: Zhiklè bi mbiaʼa a goɗ ar haha: Maya klèng te Théman dè? Ndohi maya, kita a yakadama ta gèɗ dè? Maya tengaʼa nʼngwoda na dè?

⁸ Va-hu kinè, va-ngwoda deɓa, va-rau vèvèɗ, a kin nza a pa, ndohi Dedan! Aman i gedassa Esau a pats man i ga na kita.

⁹ Aman ndohi mpèr nyi wof ta dè a sam ngaya, ta jèkeda nyi wof a pa kètè. Aman metsarhi ta dè a sam ngaya a vaɗ, ta hil skwi a metsar ara man ta slaha.

¹⁰ Aman iyè, i gi a Esau a nzi adai, i ngreda sam man a ngheda auda, a slaha a nghédè va asaɓai. Wudahi nengaʼa, kramamhi nengaʼa, nslamagihi na, ta zi ta. Nengaʼa klèng, asaɓai.

¹¹ Njèkèdi wud diki ngaya, i da va ta nshèffè; a ngwozi mazi ngaya da pu ndav ta a iyè!

¹² Aman Ndo nzi pèc pècèk a gaɗa: Tengaʼa man a matsa ta si kokwi kita azɓai, sèi ta sia ndèzl. Ka, ka ngècè kita azɓi dè! Aʼai, i jèkè kita a géɗ ngaya azɓai. Ka, ka da siaʼa a vava!

¹³ I mbaɗa te ma ga, Ndo nzi pèc pècèk a gaɗa: Botsra a da gedas na, a da gi a skwi horai, a mbeɗ na, a gi a skwi mphomdaʼa, a kokwarhi nengaʼa ta nzi a diki a mèdèp.

¹⁴ I tsena ma mɓuaʼa, a sam Ndo nzi pèc pècèk, a nzlinde ndo sak a sam ndohi herkeda: Va-ɓica va, vo-do va-gu var a nengaʼa! Va-slambaɗa a var!

¹⁵ Na haha i da manda ka gèɗ a hai te va ndohi herkeda; ka phomda te va ndohai!

¹⁶ Zlau man ka pra ta va a ndohi ngrè gèɗ ngaya, a nfi va te ndav ngaya, ta zlakede ka. Ka man ka nza te slrats za, ka man ka nza a géɗ za. Aman ka da geda gi ngaya te géɗèʼa ara mangayak, i da cka ka a hai, Ndo nzi pèc pècèk a gaɗa.

¹⁷ Edom a da gédèsh na. Ko wawa man a da bizhè auda a sam na, a rzl na, ta pèrè a pa, ta tsi drengasl a géɗ mblè nengaʼa tèlèba.

¹⁸ Lèmèlèmè ara Sodome a Gomorrhe a kokwar man a tsagiaʼa, man ta gedas ta, Ndo nzi pèc pècèk a gaɗa, ko ndo staɗ a te pa ɓai, ko staɗ a nzi a pa azɓai.

¹⁹ Na haha ara marizhèlè a shkè auda a dzah woyam Jourdain, a sam nʼnzi nengaʼa te va nhèyè wof. Tsam-tsam a gi a Edom a hi na. A i da fi nengaʼa man i ngotskoɗauda a bi nengaʼa. Ngar iye wa? Nʼnjèy ma a gèɗ, wa? Bi man a salay va a gèɗ, wa?

²⁰ Gar haha va-tsena ma man Ndo nzi pèc pècèk a goɗ a gèɗ Edom; a skwi man a nhur a woya a ngiaʼa a sam ndohi Thé-man. Ta da zlama ta daʼai a wud tambakihi nhezakaʼa, ta da gedassa sam nʼnzi ta, a vava.

²¹ Aman ta da kèlèhai, herkeda a gudzai. Kuɗ tengaʼa a cinè a wud woyam mbiaʼa.

²² Na haha, a hi a géɗèʼa ara mangayak, a tsi kelpasl a gèɗ Botsra; a pats nasa ndav ngul ndohi Edom lèmèlèmè ara ndav ngwoz man a ɗish kra.

Damas

²³ A gèɗ Damas: Hamath a Arpad ta mbeɗ ta. Ta tsena ma ambaɓiaʼa; ta gudzai, ara iyam man a nzi géɓitèʼa azɓai.

²⁴ Damas, wuɗi azɓai, a woya a nhi na, zlau a ngso, zlau mʼmetsai a matakwan a ngso ara ngwoz man a ɗish kra.

²⁵ Kokwar nʼnzalaʼa, kokwar mwuffè ga, i jèkeɗa azɓi dè!

²⁶ Golahi nengaʼa ta bazl ta a dai kokwar, a ndohi var nengaʼa ta zi ta a pats nasa, Ndo nzi pèc pècèk a gaɗa.

²⁷ I da fi vogwa a zlazlar Damas, a nʼndeda gi bi te Ben-Hadad a ma.

Ndohi Arabe

²⁸ A géɗ Kédar, kokwar-bihi Hatsor, man Nebucadnetsar, bi Babylone, a gu ngulaʼa, Ndo nzi pèc pècèk a gaɗa: Va-slambaɗa, vo-do, va-gu var a Kédar, va-dum ta ndohi te civeɗ mvèng pats!

²⁹ Va-helda gi tengaʼa a skwi tengaʼa a gorombi ta a kolongwi ta a ma! Va-helda zlugumihi tengaʼa a ma, va-gu wobau a géɗ tengaʼa.

³⁰ Va-hau, va-hau a wuɗi kin tèlèba, va-rau vèvèɗ a kin nza a pa, ndohi Hatsor! Ndo nzi pèc pècèk a gaɗa. Aman Nebucadnetsar, bi Babylone, a nhur skwi ambaɓiaʼa a géɗ kinè, a vhè ma a géɗ kinè.

³¹ Va-slambaɗa, va-kala ta va a ndohi herkeda man ta nza a gumai, man skwa a ga ta azɓai, Ndo nzi pèc pècèk a gaɗa. Ntamagi Hatsor azɓai, skwi mɓèr ntamagi na azɓai, ta nzi a dala.

³² Va-helda zlugumihi tengaʼa a ma, rèwè tengaʼa rèdèdèʼa, va-dumaʼa! I da ksar ta ara kozlar tèlèba, tengaʼa man bozozom nshaʼa. I da baha na skwi ngedas ta te verzi herkeda tèlèba, Zhiklè bi mbiaʼa a gaɗa.

³³ Hatsor a da gi a vèvèɗ kokoya, a hèshèkèɗ a mèdèp. Ndo a da nzi a pa azɓai, ndo a da gi gi a pa azɓai.

Elam

³⁴ Na haha ma man Ndo nzi pèc pècèk a ngaɗa na Jérémie, ndo nhadka ma, a géɗ Elam, te va man Sédécias, bi Juda, a nhüno a ngi bai.

³⁵ Zhiklè bi mbiaʼa a goɗ ar haha: Na haha i pasla lèkèɗ Elam, nshè-lèkur skwi wuɗi ta.

³⁶ I da bahka ta kozlarhi faɗ te verzi herkeda faɗ, a ta kala na va a Elam. I da ksar ta a kozlar sa, ndohi herkeda azɓai man ndohi Elam ta hu ta a pa ɓai.

³⁷ Ndohi Elam ta da gudzi te ri mayamhi ta, man ta woy a ta zede nshèf-fè ta. I da ga ta matakwan, a ndzoan ga mbiaʼa, Ndo nzi pèc pècèk a gaɗa. I prè tsakwal a verzi ta, ha man i da ndev ta.

³⁸ Te deɓaʼa i da til sam nʼnzi bi ga te Elam, i da zede bihai a wud bihai te pa, Ndo nzi pèc pècèk a gaɗa.

³⁹ Aman te deɓaʼa, a pats ndikèma skwai, i da helka ta ndohi ɓèlè Elam a deɓa, Ndo nzi pèc pècèk a gaɗa.