Jérémie 48 - Ma Zhiklè

Moab

¹ A géɗ Moab: Zhiklè bi mbiaʼa, Zhiklè Israel, a goɗ ar haha: Woba Nebo, aman ta dumda ma! Kirjathaim, hori a dai, ta cedama. Misgab, hori a dai, nkalatʼhi ma.

² Nʼnjèl Moab klèng. Hesbon a zi na. Ngo-do, ngo-zedokoy auda te va ndohi herkeda! Ka ba, Madmen, ta da gedas ka; tsakwal a verzi ngaya.

³ Wobau a tsenkaɗ auda te Choronaim. Nkeɗa ndo, skwi ngédèshè mbiaʼa.

⁴ Moab mʼmbeɗ na, wudahi ta kuɗai,

⁵ ta dè za Luchith a kuɗa a ma. Za Choronaim, ndohi mayamhi ta shkèhi a nguzli var.

⁶ Va-hau, va-mbelda nshèffè kinè, va-nza ara mbelaw ndo tʼhèshèkèɗ.

⁷ A géɗ man ka pu ndav a skwi man ka gau, a skwi mèshèlè ngaya, ka ba ta gs ka: Kemosh a ndohi mvi skwi a Zhiklè, a wud bihi nengaʼa, ta dè ɓèlè.

⁸ Ndo ngedassa kokwar a shkè a kokwar tèlèba. Kokwar azɓai, man a mbél na. Slrats a zi na, vara a gédèsh na.

⁹ Nasa man Ndo nzi pèc pècèk a ngoɗa: Va-tsa na kelpasl a va Moab, aman a slaha a nhi na, te man kokwarhi nengaʼa ta mbeɗ ta, a géɗ man ndo a te pa ɓai.

¹⁰ Ndo man a gi mizlinè Ndo nzi pèc pècèk a falai, mphomda! Ndo man tsakwal te rai, a kéɗè ndo a vna azɓai, mphomda!

¹¹ Moab a nʼnza tètè daga gol na, a shèk va a samaʼa, a nʼnza daɓaɓaʼa ara deɓi zom, nʼnde na ɓèlè ɓai. Gar haha njèn na arsa, nzhkè na arsa, nʼngwoda ɓai.

¹² Aman pats ngiɗè a di a shkè, Ndo nzi pèc pècèk a gaɗa, aman i da zlindè ndohi man ta da wuzlèʼa a duzlak ngiɗè, ta da wuzlèʼa, ta ɓèlè auda te pa, a duzlak.

¹³ Moab a da gi hori a sam Kemosh, lèmèlèmè ara Israel a gu hori a sam Béthel, man a ngu gèɗ a vna.

¹⁴ Kin gèɗè mè: nga ngul ndohai, nga ndohi var man nga sun var?

¹⁵ Moab ngedas na, vodzok a shkè auda te kokwarhi na, golahi nengaʼa ndaɓaraʼa ta zlama ta daʼai ma. Nasa ma bai, man nzlembaɗ na Zhiklè bi mbiaʼa.

¹⁶ Ngédèshè Moab a shkè tsam-tsam. Matakwan nengaʼa a herdeka na va.

¹⁷ Va-gu wobau a géɗèʼa, kinè a tsagi nengaʼa tèlèba. Kinè man kin sun nzlembaɗ na, va-gaɗa: Gada man wuɗi na zhè a haha, mpasla mè, gaɗa bi sa?

¹⁸ Wash-kèhai te nʼnjèlè, nzahai a herkeda ngworaʼa, dem man ka nza te Dibon. Aman ndo ngedassa Moab a shkè a sam ngaya, a gedassa gihi ngaya ndakmaʼa.

¹⁹ Zlatsahi a civèɗ, zurdo, ngwoz te Aroer, dzhoɗo ndo man a hi na, ndo man a mbel na, a ka gaɗa na: Nge mè?

²⁰ Moab a gi horai, te man a ngedas na. Gudzau, gu wobau! Vo-njo te Arnon: Moab ngedas na!

²¹ Kita a shkè a géɗ vara, a géɗ Holon, Jahats, Méphaath,

²² a géɗ Dibon, Nebo, Beth-Diblathaim,

²³ a géɗ Kirjathaim, Beth-Gamul, Beth-Meon,

²⁴ a géɗ Kerijoth, Botsra, a géɗ kokwarhi Moab tèlèba, ko dra, ko ndul ndul.

²⁵ Moab klèng, ri nengaʼa mpasla, Ndo nzi pèc pècèk a gaɗa.

²⁶ Va-va na zom da keɗaʼa, a géɗ man a nslambaɗa na va a Ndo nzi pèc pècèk. Moab da zlur va, da vünoho! Nenga ba da ga a skwi man ta ngwèshè a pa!

²⁷ Ka ngwossaha Israel ka ɓi dè? Ta ngots te va metsarhi dè, aman ka slefia pèc pècèk, ka geda gèɗ kwotakwotaʼa a géɗèʼa.

²⁸ Ndohi Moab, va-jèkeda kokwar, va-nza a za, ara nkuɗhom man ta gi gi te za.

²⁹ Nga tsena ma nfi va Moab, man a grè gèɗ, nfi va nengaʼa, ngrè gèɗ nengaʼa, ngi wi nengaʼa, man a nhur te ndav: I ɓi wa?

³⁰ Ndo nzi pèc pècèk a gaɗa: I sun skwi man a hérèʼa, a tsaval nengaʼa man ambalai, a mizlinè nengaʼa ambalai.

³¹ Gar haha i ɗish va a géɗ Moab, i gi wobau a géɗ Moab tèlèba, ta kuɗai a géɗ ndohi Kir-Hérès.

³² Gi lak Sibma, i kuɗi a géɗ ngaya, ara man i kuɗi a géɗ Jaezer. Ndo gedas skwai a nkala na va a skwi ngaya, a skwi man ka ɓüco.

³³ Mwuffè a dimèsh azɓai te gi lak, tʼherkeda Moab. Barassa a te klok ɓai, ta ɗècè nyi wof asaɓai, mwuffè a ngi susai susai a te pa ɓai.

³⁴ Wobau ndohi Hesbon a cinè dra, ha ndè Elealé. Daʼai tengaʼa a cinè ha ndè Jahats, a hinè te Tsoar, ha ndè Choronaim, a ndè Eglath-Sheijshija. Ko iyam Zimri ta gedas ta.

³⁵ Ndo nzi pèc pècèk a gaɗa: I da zedkoɗauda te Moab, ndo man a vi skwi a zhiklè a géɗ za, a ndo man a vi skwi a vri na.

³⁶ Gar haha gèɗ ga a tsi ganzavar a géɗ Moab, gèɗ ga a tsi ganzavar a géɗ Kir-Hérès, a géɗ man skwi tèlèba man ta ɓica, a nde na.

³⁷ Gèd tèlèba nshaʼa, bozozom tèlèba nshaʼa, ri mbazla, maslaka sam kuɗa a va.

³⁸ Wobau a zhè a géɗ gi Moab tèlèba, a dal kokwar tèlèba, a géɗ man i mbeɗa Moab, i bazlaʼa ara shiɗèf man ndo a woya ɓai, Ndo nzi pèc pècèk a gaɗa.

³⁹ Va-ngoy va! Mʼmbeɗ na, mè! Moab a nʼngwoda nga deɓa, a gi hori, mè! Moab, tèlèba man ta zhè a tsagiaʼa, ta ngwoshè a pa, ta gi zlauaʼa.

⁴⁰ Gar haha Ndo nzi pèc pècèk a gaɗa: Na haha ndo mayam a hi ara mangayak, a tsi kelpasl nengaʼa a géɗ Moab.

⁴¹ A pats nasa Kerjoth ndumda ma, gihi ndakmaʼa mʼmbeɗaʼa, ndav ngul ndohi Moab nara ndav ngwoz man a ɗish kra.

⁴² Moab klèng, kokwar ndo ka ɓai, a géɗ man a nslambaɗa na va a Ndo nzi pèc pècèk.

⁴³ Zlau, vèvèɗ, ɓalai a zhè, nasa skwi ngaya, Moab, Ndo nzi pèc pècèk a gaɗa.

⁴⁴ Ndo man a hi te ri zlau, a kèlèhi a vèvèɗ. Ndo man a nzevkaɗauda te vèvèɗ, ɓalai a mbéɗèʼa. Aman tiɗè sam kita Moab ma, Ndo nzi pèc pècèk a gaɗa.

⁴⁵ Ndohi man ta hu ta, ta nzahi a mèzhèɓ Hesbon, aman wuɗi na azɓai. Vogwa a shkè auda te Hesbon, nèʼèn vogwa te ndev Sihon, man a ndeda kokwarhi Moab a ma, a lèwèrè gwots gèɗ.

⁴⁶ Wobau a géɗ ngaya, Moab! Ndohi Kemosh klèng! Aman ta hel ta wudahi ngaya ma a ta gi ɓèlè, dalahi ngaya ba ta gi ɓèlè.

⁴⁷ Aman i da helka ta ndohi ɓèlè Moab a deɓa a pats ndikèma skwai, Ndo nzi pèc pècèk a gaɗa. Kita Moab aranta.