Jérémie 47 - Ma Zhiklè

Ndohi Philistie

¹ Ma Ndo nzi pèc pècèk a sam Jérémie, ndo nhadka ma, a géɗ ndohi Philistie, ga Pharaon a nkeɗa Gaza.

² Ndo nzi pèc pècèk a goɗ ar haha: Na haha iyam a slèmbèdè te man a géɗèʼa, a gi a woyam mbiaʼa, man a hi auda a dzah, a zeda kokwar a skwi man nʼndha te pa tèlèba, kokwar a ndohi te pa. Ndohi ta kuɗai, ta gudzai, tèlèba man ta nza te kokwar.

³ A sam nhèzlèwè sak plèsh nengaʼa, a sam nhèzlèwè kiki var nengaʼa, a sam nhèzlèwè sak kikai, babhi ta paka ta di a wudahi asaɓai, a wushedama ta rai.

⁴ A géɗ pats man a di a shkè a gedassa ndohi Philistie tèlèba, a bazl ta ndohi Tyr a Sidon a njèkèɗiaʼa man a takaha ta. Aman Ndo nzi pèc pècèk a da gedas ta ndohi Philistie, njèkèɗi herkeda man a tsoko gèɗ auda te Caphtor.

⁵ Ta ndeva kokwar Gaza ma; Askalon, ko kuɗ ɗiak a te pa ɓai; njèkèɗiaʼa a vara lèmèlèmè. Ka cèh va, tè ngèmè?

⁶ Wobau, tsakwal Ndo nzi pèc pècèk, ka da shèk va a ngèmè? Do a gi ngaya, nzau a ka gu skwa ɓai!

⁷ A da shèk va kè! Ndo nzi pèc pècèk a ngaɗa na, a nzlinda a Askalon, a ma iyam mbiaʼa.