Jérémie 46 - Ma Zhiklè

Ma a géɗ ndohi tʼherkeda

¹ Ma Ndo nzi pèc pècèk a sam Jérémie, ndo nhadka ma, a géɗ ndohi herkeda:

Egypte

² A géɗ Egypte: A géɗ ndohi var Pharaon Neco, bi Egypte, man a zhè a ma woyam Euphrate, te Carkemish, man bi Nebucadnetsar, bi Babylone, a gu a ngulaʼa, te va man Jojakim, kra Josias, bi te Juda, te mvi mafadaʼa:

³ Va-psheda iyam a gambar, nkeshèʼa a mbiaʼa, vo-do var!

⁴ Va-dzawa plèsh, vo-do a deɓaʼa, kinè ndohi plèsh! Va-peda dzokwom a gèɗ, va-peza tsakwal! Va-peda maslaka limbèt a va!

⁵ I rka mè? Ta gi zlau, ta hi ta, ngul ndohi ta wush ta hai, ta hu ta ma, ta ngwodko di a deɓa azɓai. Zlau a sam tèlèba, Ndo nzi pèc pècèk a gaɗa.

⁶ Ndo mwoslaʼa a hi na, ngul ndo a wuc na. Te man a géɗèʼa, a ma woyam Euphrate, kwa a tsama ta sak, a ta wush ta hai.

⁷ Nengaʼa man a nslambaɗa ara woyam Nil, man a gidè va ara iyam man a gi tskuɗuf-tskuɗufaʼa, wa?

⁸ Egypte, nengaʼa a nslambaɗa ara woyam Nil, a gidè va ara iyam man a gi tskuɗuf-tskuɗufaʼa! A ngaɗa: I da slèmbèɗè, i da ndha herkeda, i da zede kokwar tèlèba, a ndohi te pa.

⁹ Va-hau, plèshihai! Va-gu shèwa, kiki var! Ngul ndohai, vo-do auda! Ethiopie a Puth, man ta gidè gambar, a ndohi Lud man ta lètè lèkèɗ!

¹⁰ Na haha, pats sa, pats mpil gèɗ a sam Bi Zhiklè, Zhiklè bi mbiaʼa, man a jhèɗè skwi mpil gèɗ a sam ndohi mayamhi na. Tsakwal a keɗa ndo, a si pombaz a pa tèlè. Skwi man ta zla na Bi Zhiklè, Zhiklè bi mbiaʼa, te kokwar te man a géɗèʼa, a ma woyam Euphrate.

¹¹ Do Galaad, a ka co mbar, bidali, dem Egypte! Ka hayda madzaf a hi ambalai; ka mbélè azɓai.

¹² Ndohi herkeda ta da cinè ma hori ngaya. Ma wobau a gèɗ ngaya, ma ngul ndohai, ta humda a sam staɗ.

¹³ Ma man Ndo nzi pèc pècèk a gaɗa na Jérémie, ndo nhadka ma, man Nebucadnetsar, bi Babylone, a mshkè a nda gi var a kokwar Egypte:

¹⁴ Va-njo te Egypte! Vo-goɗ te Migdol, a ta cinè te Noph, te Tachpanès! Vogoda: Slambaɗa, tila va ngaya, aman tsakwal a keɗa ndo a tsagi ngaya.

¹⁵ Apis a mhu na èhèmè? Zhiklè ngaya, nara marai, a nsala va ɓi èhèmè? A gèɗ man Ndo nzi pèc pècèk a mwushede ta hai,

¹⁶ a nslafaɗama ta sak a ndohi kumba, ngiɗè a kèlè a géɗ mandai na, ngiɗè a gèɗ mandai na. Ta gaɗa: Va-slambaɗa! Ngo-dokoy a deɓa a sam ndohi nga, a kokwar bab nga, a gèɗ tsakwal man a gedas nga.

¹⁷ A pats nasa ta da baha na Pharaon a nzlembaɗ haha: ‘Kozlar ambalai’.

¹⁸ Ara man i zhè, bai a gaɗa, bai man nzlembaɗ na Zhiklè bi mbiaʼa, man wuɗi na zhè ara Thabor te va zahai, ara Carmel a géɗ iyam: i shkè.

¹⁹ Ɓica kolongwi ngaya, aman ka dè bèlè a vna, dem Egypte, man ka zhè a haha, te man Noph a da ndi a hèshèkèɗ, a gedas na, ndo a nzi a pa azɓai.

²⁰ Egypte te va nasa, nara dem zlè mbelaʼa; aman ndo ngedassaʼa a mshkè te civèɗ man a géɗèʼa.

²¹ Ko ndohi mizlinè suli a sam nengaʼa, ta ara zlèhi ngraʼa. Tengaʼa ba ta hi ta, ta zlècèhi azɓai, a géɗ man pats matakwan kalkaɗa a géɗ tengaʼa ma, pats kita ta.

²² Daʼai nengaʼa ara daʼai zhɗzhok man a hi na, aman ta shkè a wuɗai, a ta hi a verzi nengaʼa, a dzana te rai, ara ndohi man ta ngél wof.

²³ Ta ngela nhèyè wof nengaʼa, Ndo nzi pèc pècèk a gaɗa: wof kumba, ndo a slaha a ndè a hwaɗaʼa azɓai. Ta kumba a fena dzarai, ndo a slaha a nger ta ɓai.

²⁴ Dem Egypte, hori a dai, nkala a ri a ndohi te man a géɗèʼa.

²⁵ Gar haha Zhiklè bi mbiaʼa, Zhiklè Israel, a gaɗa: Na haha i gi kita a géɗ Amon te No, a géɗ Pharaon, a géɗ Egypte, a géɗ zhiklèhi nengaʼa, a géɗ bihi nengaʼa, Pharaon a ndohi man ta gshè ndav ta a vna.

²⁶ I da pe ta a ri a ndohi man ta woy a ta zede nshèffè ta, a ri a Nebucadnetsar, bi Babylone, a ri a bigolahi na. Te deɓaʼa herkeda a da zhè a skwi te pa, ara halaʼa, Ndo nzi pèc pècèk a gaɗa.

Israel

²⁷ Aman ka, ka gu zlau ɓai, Jacob, ɓèl ga, ka gudzu ɓai, Israel. Na haha i mbel ka, ko ka dra; a ndohi te verzi ngaya, te kokwar man kinè te pa te ɓèlè. Jacob a di a shkè deɓa, a nzi a gumai, skwa a da ga na azɓai, ndo a da pra na zlau a va azɓai.

²⁸ Ka, Jacob, ɓèl ga, ka gu zlau ɓai, Ndo nzi pèc pècèk a gaɗa; aman i zhè a nda ka, aman i da zede ndohi herkeda tèlèba, man i ksar kinè a pa. I jèkaha kita kinè azɓai; aman i da ngatsa kinè maya a kita genè, i da zede kinè azɓai.