Jérémie 43 - Ma Zhiklè

Ta dè Egypte

¹ Aman Jérémie a mʼmenda ta ma Ndo nzi pèc pècèk, Zhiklè tengaʼa, a ndohi tèlèba klèng ma, ma tèlèba man Ndo nzi pèc pècèk, Zhiklè tengaʼa, a nzlündo a sam ta a vna,

² Azaria, kra Hosée, a Joachanan, kra Karéach, a ndohi mbibihiaʼa tèlèba, ta gaɗa na Jérémie: Ma ngaya ma nzura ka ɓai! Ndo nzi pèc pècèk, Zhiklè nga, a ngaɗka ka ma a nta ka ɓai, a ngaɗa: kin do a kokwar Egypte, aman kin nza te kokwar ndohi ngiɗè ara mbrok ɓai, – Zhiklè a ngoɗ arsa ɓai.

³ Aman Baruc, kra Nérija, a mpaka ka a wai, aman a pe nga a ri a ndohi Chaldée, a ta bazl nga, man ɓai ta de nga a ɓèlè a kokwar Babylone.

⁴ Jochanan, kra Karéach, a bihi sojè, a ndohi tèlèba ta fa gèɗ a ma Ndo nzi pèc pècèk ɓai, a ta nza a kokwar Juda ɓai.

⁵ Jochanan, kra Karéach, a bihi sojè tèlèba, ta hul njèkèdi ndohi Juda, tengaʼa man ta shkè a deɓa te va ndohi herkeda tèlèba, man ta ksar ta a pa zlèzlèʼa, a ta shkè, aman ta nzi a kokwar Juda,

⁶ ngurhi a ngwozi, wudahi nkèshèʼa, dalahi hai a ndohi tèlèba man Nebuzaradan, bi ndohi mɓer gèɗ bai, a njèkeɗa a sam Guedalia, kra Achikam, kra Shaphan. Jérémie, ndo nhadka ma, a Baruc, kra Nérija ba, ta gseda rai,

⁷ a to do a kokwar Egypte. Ta fa gèɗ a ma Ndo nzi pèc pècèk ɓai. A ta ndikè a Tachpanès.

Jérémie a nhodko ma a njèkèɗi ndohai

⁸ Ndo nzi pèc pècèk a ngaɗa na Jérémie, te Tachpanès:

⁹ Hul kwa mbibihiaʼa, a ka rda a vèvèɗ a ka ngheda, a ma gi Pharaon, te Tachpanès; ndohi Juda da rkaʼa!

¹⁰ Gada ta: Zhiklè bi mbiaʼa, Zhiklè Israel, a goɗ ar haha: Na haha i da bahka na Nebucadnetsar, bi Babylone, ɓèl ga, a da til sam nʼnzi bi na a géɗ kwa man kin rda a vèvèɗ haha, a da wuzhè maslaka man a nzi a pa, a pa.

¹¹ A da shkè, a da duma kokwar Egypte. Di man a mʼmetsai, a mʼmetsai; di man a dangai, a dangai; di man a tsakwal, a tsakwal, tèlèba.

¹² A da fa na vogwa a gi zhiklèhi Egypte, ngiɗè a da fa ta vogwa, ngiɗè a da hel ta zhiklèhi a ma. A da jèkeda kokwar Egypte azɓai, ara ndo man a til maslaka na te ri tinɗi. Te deɓaʼa a dè na, man a nrufa skwi na.

¹³ Mblom tengaʼa te Beth-Shémesh, te kokwar Egypte, a da mbeɗdaussa, a da fa na vogwa a gi zhiklèhi Egypte.