Jérémie 42 - Ma Zhiklè

¹ Bihi ndohi var tèlèba, a Jochanan, kra Karéach, Jezania, kra Hosée, a ndohi tèlèba, a hüno te nkèshèa, ha ndè a ma mbiaʼa, ta shkè,

² a ta gaɗa na Jérémie, ndo nhadka ma: Nga tsa ka rai, dzhoɗo Ndo nzi pèc pècèk, Zhiklè ngaya, a géɗ nga, a gèɗ njèkèdia tèlèba; aman nga kètè genè te va ndohi kumba, ara man ka ba ka rka a di ngaya.

³ Ndo nzi pèc pècèk, Zhiklè ngaya, da ngra nga civèɗ man nga dè a pa, a skwi man nga da giaʼa.

⁴ Jérémie, ndo nhadka ma, a ngaɗa ta: I tsenaʼa. Anai i dè a i tsi ri a Ndo nzi pèc pècèk, Zhiklè kinè, ara man kin gadayè. Ma tèlèba man Ndo nzi pèc pècèk a da mendayè a géɗ kinè, i da ngra kinè, i nghédè skwi azɓai.

⁵ Ta gaɗa na Jérémie: Ndo nzi pèc pècèk da gu malwuɗai zuraʼa nlèɓèslè a géɗ nga, aman nga da gi skwi tèlèba azɓai, man Ndo nzi pèc pècèk, Zhiklè ngaya, a da ngra nga te ma ngaya.

⁶ Ko amba, ko ambaɓai, nga cinè ma Ndo nzi pèc pècèk, Zhiklè nga, man nga zlinde ka a sam na, a nga ngècè skwi man amba, aman nga da cinè daʼai Ndo nzi pèc pècèk, Zhiklè nga.

Ta woy a ta dè Egypte

⁷ Te deɓ mʼmèn kula, Ndo nzi pèc pècèk a ngaɗa na Jérémie.

⁸ A nengaʼa a mbaha na Jochanan, kra Karéach, a bihi ndohi var tèlèba, man ta zhè a sam na, a ndohi tèlèba, ko nkèshèʼa, ko mbiaʼa.

⁹ A ngaɗa ta: Ndo nzi pèc pècèk, Zhiklè Israel, a goɗ ar haha: nengaʼa man kin zlindyè a sam na, aman i menda na ntsi ri kinè.

¹⁰ Aman a vava, kin da nzi te kokwar haha, i da til kinè, i da gedas kinè azɓai. I da nge kinè a pa, i dzam kinè azɓai. Aman skwi ambaɓiaʼa tèlèba man i ga kinè, i da gia asaɓai.

¹¹ Kin gu zlau bi Babylone ɓai, nengaʼa man kin gi zlauaʼa; kin gu zlau nengaʼa ɓai, Ndo nzi pèc pècèk a gaɗa. Aman i zhè a nda kinè, aman i mbel kinè, aman i preka kinè auda te ri na.

¹² I gi aman kin si ndo te va, a kin si nengaʼa te va, nengaʼa a da jèka kinè herkeɗa kinè.

¹³ Aman kin da gaɗa: Nga nzi a kokwar haha azɓai!

¹⁴ Aʼai, a kin cinè ma Ndo nzi pèc pècèk, Zhiklè kinè, azɓai, sèi nga dè a kokwar Egypte, te pa var asaɓai, tolom var asaɓai, mi asaɓai, nga da nzi a pa!

¹⁵ Va-tsena ma Ndo nzi pèc pècèk, kinè njèkèɗi Juda: Zhiklè bi mbiaʼa, Zhiklè Israel, a gaɗa: aman kin pi di a kokwar Egypte, aman kin dè a pa, a kin nzi a pa,

¹⁶ tsakwal man kin gi zlau nengaʼa, a da ngats kinè, te kokwar Egypte. A mai man kin gi zlau nengaʼa a gs kinè te Egypte, a kin bèzl kinè a pa.

¹⁷ Ndohi tèlèba man ta hu a kokwar Egypte a ta da nzi a pa, ta da bèzl ta a tsakwal, a mai, a gidiɓèr. Ndo azɓai man a da mbél na te va tengaʼa, ndo man a hi azɓai te ri matakwan man i da ga ta.

¹⁸ Zhiklè bi mbiaʼa, Zhiklè Israel, a goɗ ar haha. Lèmèlèmè ara man i gau ndzoan mwuɗitpa a géɗ ndohi Jérusalem, lèmèlèmè i da gi shèwa a géɗ kinè, aman kin dè a kokwar Egypte, a kin da gedas kinè. Kin da lèyè, kin phomda, kinè skwi horai, a kin da rka sam haha asaɓai.

¹⁹ Nasa man Ndo nzi pèc pècèk a hodko ma a géɗ kinè, njèkèdi ndohi Juda. Kin do a kokwar Egypte ɓai!

²⁰ Va-suna, i ngreda kinè a patsna! Aman kin geda a géɗ kinè, aman kin zlindyè a sam Ndo nzi pèc pècèk, Zhiklè kinè, a kin gaɗa: Tsu ri a Ndo nzi pèc pècèk, Zhiklè nga, da ngra nga skwi man nga da giaʼa.

²¹ I gaɗa kinè a patsna. Aman kin tsena ma Zhiklè kinè ɓai te skwi tèlèba man a gaɗa kinè te ma ga!

²² Anai, va-suna! Kin da bèzl kinè a tsakwal, a mai, a gidiɓèr, te kokwar man kin woya a kin dè a pa, a kin nzi a pa.