Jérémie 41 - Ma Zhiklè

Ta keɗa Guedalia

¹ A ki matsaraɗaʼa, Ismael te Nethania, kra Elishama, te verzi hai, ta shkè a nda ndohi 10, a sam Guedalia, kra Achikam, a kokwar Mitspa. Ta ndau skwi a sam staɗ te Mitspa.

² Ismael, kra Nethania, a ndohi 10 man ta zhè a nda nengaʼa, ta slambaɗa, a ta keɗa Guedalia, kra Achikam, kra Shephan, a tsakwal. Ta keɗa ndo man bi Babylone a nfu a tsuvom kokwar.

³ Ismael a mbazl ta ndohi Juda tèlèba a vaʼa, man ta zhè a nda Guedalia te Mitspa, a ndohi Chaldée ba, man ta zhè a pa.

⁴ Te mangoslèmaʼa, te deɓ mʼmetsi Guedalia, ndo nsenaha ɓai,

⁵ ndohi Sichem, Silo a ndohi Samarie, ta gi 80, bozozom nshaʼa, ta shkè, maslaka nkuratsa, mblè a va, movar a ɓurdi te rai, man ta woy a ta hulkoɗi a gi Zhiklè.

⁶ Ismael, kra Nethania, a mshkè auda te Mitspa, a ta zlü gèɗ a nda ta. Nengaʼa man a dè a kuɗai, aman a ndikè a sam ta, a ngaɗa: Vo-washkè a sam Guedalia, kra Achikam!

⁷ Aman ta shkè a ndev kokwar, Ismael, kra Nethania, nengaʼa a ndohi man ta zhè a sam na, ta zlama ta daʼai a ma thal.

⁸ Te va tengaʼa ndohi 10 ta zhè, man ta gaɗa na Ismael: Ka bazl nga ɓai, aman skwi nʼndi nga nʼngheda te dak, dau a marori a mbar a vongwom. A nengaʼa a mco ma tengaʼa, a mbazl ta ɓai te ndev kramamhi ta.

⁹ Thal man Ismael a mwusheda nckondohi man a mbazl ta a pa, thal mbiaʼa, man bi Asa a ngau a géɗ Baesha, bi Israel. Nengaʼa Ismael, kra Nethania, a nʼndheda a ndohi mbazlaʼa.

¹⁰ Te deɓaʼa Ismael a ndzaw ta njèkèdi ndohi man ta zhè te Mitspa, a nda dalahi bai, a ndohi tèlèba man ta nza te Mitspa, tengaʼa man Nebuzaradan, bi ndohi sojè, a mpe ta a ri a Guedalia, kra Achikam. Ismael, kra Nethania, a nhel ta a ɓèlè, a nengaʼa a mdo na a sam ndohi Ammon.

¹¹ Jochanan, kra Karéach, a bihi ndohi var man ta zhè a sam na, ta tsena skwi ambaɓiaʼa man Ismael, kra Nethania, a gau.

¹² Ta hul ndohi tengaʼa tèlèba, a to do, aman ta gi var a Ismael, kra Nethania. Ta ngotso a ma woyam mbiaʼa te Gabaon.

¹³ Aman ndohi tèlèba man ta zhè a sam Ismael ta rka Jochanan, kra Karéach, a bihi ndohi var a nda nengaʼa, ta wuffè.

¹⁴ A ndohi tèlèba man Ismael a nhel ta te Mitspa a ɓèlè, ta ngwoda gèɗ a deɓa, a to do a sam Jochanan, kra Karéach.

¹⁵ Aman Ismael, kra Nethania, a mʼmbel na te ri Jochanan, a ndohi 8 a nda nengaʼa, a ndo a sam ndohi Ammon.

Jochanan a jhèɗè Jérémie

¹⁶ Jochanan, kra Karéach, a bihi ndohi var man ta zhè a sam na, ta por njèkèdi ndohi man ta ngotso a sam Ismael, kra Nethania, tengaʼa man Ismael a nhel ta, te Mitspa, te deɓ man a nkeɗa Guedalia, kra Achikam: ngurhai, ndohi var, ngwozai, wudahai, ntokotasl-bihai, man a nhelka ta te Gabaon.

¹⁷ To do a ta nza mbrok te Kimham, a tsagi Bethléhem. Ta woy a ta dè Egypte,

¹⁸ dra a ndohi Chaldée, man ta gi zlau ta, te man Ismael, kra Nethania, a nkeɗa Guedalia, kra Achikam, man bi Babylone a nfu a tsuvom kokwar.