Jérémie 40 - Ma Zhiklè

Jérémie te Jérusalem

¹ Ma man Ndo nzi pèc pècèk a gaɗa na Jérémie, te deɓ man Nebuzaradan, bi ndohi sojè, a nzlündo a kokwar Rama, a nco te pa, a nda ndohi ngiɗè man ta hel ta a ɓèlè, ndohi Jérusalem a Juda man ta de ta a kokwar Babylone.

² Bi ndohi sojè a nco Jérémie, a ngaɗa na: Ndo nzi pèc pècèk, Zhiklè ngaya, a nhodko ma matakwan a géɗ sam haha.

³ Ndo nzi pèc pècèk a ngau a nrufa skwi man a hodko ma a géɗèʼa, a géɗ man kin gu malai a sam Ndo nzi pèc pècèk, a kin tsena daʼai nengaʼa ɓai. A géɗ nengaʼa skwi haha a ga kinè.

⁴ Na haha a patsna i pra ka cèlèlèu man a dzawa ri ngaya. Aman ambaha ka, a ka shkè a kokwar Babylone a verzi ga, washkè, i da paha ka dai. Aman ambaha ka ɓai, a ka woy a ka shkè a kokwar Babylone a verzi ga ɓai, nza ngaya. Wor kokwar tèlèba a ma ngaya, do a sam man ambaha ka, man ka hur amba zuraʼa man ka dè a pa.

⁵ Aman a gu ndudoh, a ngaɗa na a vaʼa: Men ngay a deɓa a sam Guedalia, kra Achikam, kra Shaphan, man bi Babylone a nfu a ndo nwèr kokwar Juda. Va-nza a vna te ndev ndohai! Man ɓai do a sam nʼnzi ngaya man ka hur amba zuraʼa, aman ka dè a pa. A bi ndohi sojè a mva na skwi nʼndai, a skwi mbali ngiɗè; te deɓaʼa a nʼnga na mbalai.

⁶ Jérémie a nʼndo a sam Guedalia, kra Achikam, a kokwar Mitspa, a nʼnza a sam na te ndev njèkèdi ndohai man ta nza te kokwar.

Guedalia, ndo nwèr kokwar

⁷ Bihi ndohi var tèlèba man ta zhè te dak a nda ndohi ta, ta tsenaʼa, ara man bi Babylone a goɗ a géɗ Guedalia, kra Achikam, aman a wèr kokwar, a mpa na ngurhi, ngwozi, wudahi, mbelaw ndohai a rai man ta hel ta a kokwar Babylone ɓai;

⁸ a ta shkè a sam Guedalia a kokwar Mitspa. Nasa Ismael, kra Nethania, Jochanan a Jonathan, wudahi Kareach, Seraja, kra Thanhumeth, wudahi Ephal te Nethopha, a Jezania, kra Maacatite, tengaʼa a ndohi tengaʼa.

⁹ Guedalia, kra Achikam, kra Shephan, a mbaɗa ta ndohi tèlèba: Kin gu zlau ngi ɓèl ndohi Chaldée ɓai! Va-nza te kokwar, va-gu mizlinè bi Babylone, a skwi tèlèba a gi amba a sam kinè!

¹⁰ Iyè i da nzi a Mitspa, a i nzi te di man a kinè man ndohi Chaldée ta shkè a sam nga. Aman kinè, va-haya nyi wof, barassa, a mbar, va-ndha duzlak, va-nza a kokwar man kin nza a pa.

¹¹ A ndohi Juda tèlèba te Moab, a sam ndohi Ammon, te Edom, a tengaʼa te kokwar tèlèba ta tsenaʼa, bi Babylone a njèkaha ndohi Juda, a nfu Guedalia, kra Achikam, kra Shephan, a tsuvom ta;

¹² a ndohi Juda sa ta shkè, te sam tèlèba man ta dzam ta a pa, a ta shkè a kokwar Juda, a sam Guedalia, a kokwar Mitspa, a ta haya nyi wof a barassa a vata.

¹³ Jochanan, kra Karéach, a bihi ndohi var tèlèba man ta zhè te dak, ta shkè a sam Guedalia a kokwar Mitspa.

¹⁴ Ta gaɗa na: Ka sun dè? Baalis, bi Ammon, a nzlinde Ismael, kra Nethania, aman a nkeɗe ka? Aman Guedalia, kra Achikam, a nca ma tengaʼa ɓai.

¹⁵ Te deɓaʼa Jochanan, kra Karéach, a ngaɗa na Guedalia te Mitspa a metsar: I do a i da keɗa Ismael, kra Nethania, dè? Ndo ngiɗè da senaha ɓai. Da keɗe ka èhèmè? Ndohi Juda mɓicaʼa a tsagi ngaya, da ksar ta èhèmè, a njèkèdi Juda da ze na èhèmè?

¹⁶ Aman Guedalia, kra Achikam, a ngaɗa na Jochanan, kra Karéach: Ka gu ar haha ɓai. Ma man ka goɗ a géɗ Ismael, ncèkèlma!