Jérémie 4 - Ma Zhiklè

¹ Ndo nzi pèc pècèk a gaɗa: Israel, aman ka shkè a deɓa – aman ka shkè a deɓa a sam ga, aman ka wusheda mʼmbèh skwi ngaya aussa, ar ka hi a iyè asaɓai.

² Aman ka mbaɗa a nzlembaɗ Ndo nzi pèc pècèk a vava, zuraʼa, te ngi-zuraʼa, te deɓaʼa ndohi herkeda ta pshè ka ma a nzlembaɗ Ndo nzi pèc pècèk, a ta nzal ka a nzlembaɗ nengaʼa.

Zhiklè a guv ta ndohi Israel

³ Aman Ndo nzi pèc pècèk a goɗ ar haha a sam ndohi Juda a ndohi Jérusalem: Vangul gi dau mɓuaʼa, kin zlekeda skwi a hwaɗ vatak ɓai!

⁴ Va-tila ndav kinè a sam Ndo nzi pèc pècèk, kinè ndohi Juda a ndohi te Jérusalem, man ɓai ndzoan a slèmbèɗè ara vogwa, a ndo a mbècè azɓai, a géɗ mali kinè.

⁵ Va-ngreda ta ndohi Juda! Vo-goɗ te Jérusalem! Va-tsu tolom te kokwar. Vo-boho a vata! Va-haya va, ngo-dumokoy kokwarhi man ta ngala te pa!

⁶ Va-zlatseda lamba Sion, va-hu kinè, kin zlatsahi bai! I cko matakwan a skwi mwuɗitpa te man a géɗèʼa.

⁷ Marizhèlè a hakaɗauda tʼhwaɗ vah ma, ndo ngedassa ndohi kokwar a nslambaɗa a sam nʼnzi na, aman a dè a gédèshè kokwar ngaya, a ndeda a hèshè-kèd, a gédèshè kokwar ngaya, a ndo a nzi a pa azɓai.

⁸ A géɗ nengaʼa, va-feda maslaka sam kuɗa a va, va-gu wobau, va-kudau! Ndo nzi pèc pècèk a gi ndav kumba a géɗ ndohi Israel, a nkeɗa gèɗè a hi ɓai.

⁹ Ndo nzi pèc pècèk a gaɗa: te ndev nasa wuɗi bai a wuɗi wud bihai a ndev na. Ndohi mvi skwi a Zhiklè ta gudzai, ndohi nhadka ma ta rzl ta.

¹⁰ A i gaɗa: Ai, ai, ai, Bi Zhiklè Ndo nzi pèc pècèk! A vava ka ngwode ta ndohi Jérusalem. Ka gaɗa ta: I da mbél kinè! Aman tsakwal a bazl nga!

Mayamhi ta shkè

¹¹ A pats nasa ta da gaɗa ta ndohi Jérusalem: Kozlar mbiaʼa a haka tʼhèshèkèɗ, a géɗ ndohi ga, a mpèvè ka ɓai, a ndè-gèlè ka ɓai;

¹² kozlar a shkè a wuɗai. Antanta i ba i bèzlè kita ga a géɗ tengaʼa.

¹³ Na haha ndo a slambaɗkaɗa ara vanai, kiki nengaʼa, ara kozlar, plèshi nengaʼa ta hai ta fena vezai. Woba nga, nga za!

¹⁴ Jérusalem, pana ndav ngaya te mali tèlèba, aman ka mbél ngaya! Mali man ka hérèʼa a da nzi a ndav ngaya ta ahngwa?

¹⁵ Fu zlembaɗ! Ta cko ma te Dan, ma mwuɗitpa, a tsenka te za Ephraim.

¹⁶ Va-gaɗa ta ndohi herkeda ma haha, va-njè ta ndohi Jérusalem! Ndohi nʼnza na a ma kokwar Jérusalem ta shkè te kokwar ngiɗè dra, ta bèhè a géɗ kokwarhi Juda.

¹⁷ Ta nza na ma a kokwar, ta tèuda a pa, a géɗ man ta slambaɗkay a va, Ndo nzi pèc pècèk a gaɗa.

¹⁸ A géɗ maya nshèffè ngaya a skwi man ka giaʼa, ka ngots skwi aranta. Nasa skwi mwuɗitpa man a dza ka a ndav, a géɗ shèwa ngaya.

¹⁹ Woba ndav ga, woba ndav ga! I gudzi te ndav ga! I gudzi te ndav ga! Ndav ga a dzayè, i slaha a i nzi tètèʼa ɓai; i tsena tolom, i tsena nguzli var.

²⁰ Ngédèshè kalkaɗai, kokwar tèlèba ngedas na. Tsam-tsam gihi ga ta gedas ta, tsam-tsam sam nʼnzi ga ngedas na.

²¹ I rka bata nzlatseda, i tsena tolom a da ndèlè a ngèmè?

²² Ndohi ga, maya ta azɓai, ta senyè ɓai. Ndohi nrzlaʼa, madaɗauhai. Maya ta zhè a géɗ skwi man ambaɓai; a skwi man amba ta sun ngia ɓai.

Herkeda ndzakaɓ na

²³ I pu di a herkeda, ntil ɓai kurndazlndazlaʼa. I pu di a zhiklè, aman skwi nhél sam na asaɓai.

²⁴ I pu di a za, na haha ta mbeɗ ta, a ngègèdhi tèlèba ta gidè va a ta gudzai.

²⁵ I pu dai, aman na haha ndo azɓai. Ko ɗiakihi tʼhwaɗ giɗfek ta hu ta tèlèba.

²⁶ I pu di a Carmel, na haha hèshèkèɗ; kokwar nengaʼa ngedas na, a géɗ man Ndo nzi pèc pècèk a gi ndav.

²⁷ Aman Ndo nzi pèc pècèk a goɗ ar haha: Herkeda tèlèba a da gédèsh na; aman i woy a i zeda a mèdèp ɓai.

²⁸ Herkeɗa a da lèyè, giɗfèk a da madz na te géɗèʼa. Iyè a ngoɗa, i basla na gèɗ a va, i mindè ma ga a deɓa azɓai, i ngwèdè gèɗ ga azɓai.

²⁹ Ndohi kokwar tèlèba ta hu ta a sam nhèzlèwè ndohi plèsh a ndohi lèkèɗ. Ta ngheda va a hwaɗ skwai, ta hu ta a za. Ta jèkeda kokwarhi tèlèba; ndohi a te pa ɓai.

Sion a ngéy va

³⁰ A ka ngwoz man ta kalde ka auda, ka woy a ka gi mè? Ka dzazla va ngaya a maslaka vèvèzh a va, a dasi guro, a mbar a dai, ka dzazla va ambalai. Golahi ta kwol ka, ta woy géɗ ngaya!

³¹ I tsena daʼai ngiɗè ara daʼai ngwoz man a ɗish va. Nasa kuɗ ngwoz man a yi kra. Daʼai Sion, man a ngèy va, a kutèkè rai. Wobayè, i ndivdè va te ri ndohi nkeɗa ndo.