Jérémie 39 - Ma Zhiklè

Jérusalem ndumaʼa

¹ Aman Sédécias, bi Juda, a ngu bi te mvi macüɗaʼa, a ki 10, Nebucadnetsar, bi Babylone, a mshkè a nda ndohi var nengaʼa tèlèba, a nda gi var a Jérusalem, a nza na ma.

² Aman Sédécias a ngu bi mvi 11, ki 4, mʼmèn 9, ta zlün kokwar.

³ Tsuvomhi bi Babylone ta shkè a pa tèlèba, a ta nza na ma a ntamagi te ndevaʼa: Nergal-Sharetser, Samgar-Nebu, Sarsekim, ntokotasl-bi mbiaʼa, Nergal-Sharetser, ndo nsun skwai mbiaʼa, a njèkèdi tsuvomhi bi Babylone.

⁴ Aman Sédécias, bi Juda, a ndohi var tèlèba ta rkaʼa, ta hu ta, a ta jèkeda kokwar a vad a civèɗ gi lak bai. Ta beza auda a ntamagi te ndev zlazlar cèw, a to do a civèɗ ndè hèshèkèɗ.

⁵ Ndohi var Chaldée ta hu a verzi ta, a ta ngots Sédécias a dal Jéricho. Ta gso, a ta da a sam Nebucadnetsar, bi Babylone, te Ribla, a kokwar Hamath, a nengaʼa a nʼngela na kita a géɗ.

⁶ Bi Babylone a nzlama ta daʼai a wudahi Sédécias a sam di na te Ribla. Bi Babylone a nzlama ta daʼai a mbibihiaʼa te Juda tèlèba.

⁷ Te deɓaʼa a nteza di Sédécias, a ndzawaʼa a cèlèlèu züdo cèw, aman ta daʼa a kokwar Babylone.

⁸ Ndohi Chaldée ta fa na vog-wa a gi bai, a gi ndohai, a ta mbeɗa zlazlar Jérusalem.

⁹ Njèkèdi ndohi te kokwar, a ndohi man ta hu ta, man ta vu va ta a ri na, njèkèdi ndohi mizlinè, Nebuzaradan, bi ndohi sojè, a nhel ta a kokwar Babylone.

¹⁰ Nebuzaradan, bi ndohi sojè, a njè-keɗa ndohi ntawassaʼa te kokwar Juda, man skwi ta azɓai, a mva ta gi lak a gi dau a pats nasa.

Jérémie a Ebed-Mélec ta nza genè

¹¹ Nebucadnetsar, bi Babylone, a goɗ a géɗ Jérémie, te ma Nebuzaradan, bi ndohi sojè, a ngaɗa:

¹² Co, a ka paka dai, ka ga na skwi ambaɓia ɓaì; aman gau ara man a gaɗa ka.

¹³ Nebuzaradan, bi ndohi sojè, Nebushazban, tsuvom ntokotasl bihai, Nergal-Sharetser, ndo nsun skwai mbiaʼa, a tsuvomhi bi Babylone tèlèba,

¹⁴ ta zlinde ta ndohai, aman ta cko Jéré-mie te gi sojè, a ta va na a ri Guedalia, kra Achikam, kra Shaphan, aman ta da a ngwai. A nengaʼa a nʼnza te ndev ndohai.

¹⁵ Te va man Jérémie te gi sojè dai, Ndo nzi pèc pècèk a ngaɗa na:

¹⁶ Do a ka gaɗa na Ebed-Mélec, ndo Ethiopie: Zhiklè bi mbiaʼa, Zhiklè Israel, a goɗ ar haha: Na haha, iyè i gi ara man i goɗa a géɗ kokwar haha: matakwan, manam ka bai; ka da rkaʼa a pats sa!

¹⁷ Aman a pats nasa i da preka ka auda, Ndo nzi pèc pècèk a gaɗa. Ta fe ka a ri ndohi man ka gi zlau ta azɓai.

¹⁸ Aman a vava i da mbél ka, ka da metsi te ri tsakwal azɓai, ka da mbél ngaya, a géɗ man ka pu ndav a iyè, Ndo nzi pèc pècèk a gaɗa.