Jérémie 38 - Ma Zhiklè

Ebed-Mélec a mbela Jérémie

¹ Shephathia, kra Matthan, Guedalia, kra Pashur, Jucal, kra Shélémia, a Pashur, kra Malkija, ta tsena ma Jérémie man a hodko ma a géɗ ndohi tèlèba, a ngaɗa:

² Ndo nzi pèc pècèk a goɗ ar haha: Ndo man a nzi te kokwar haha, tsakwal a da kéɗèʼa, a tiɗè a mai, gidiɓèr a cedama. Aman ndo man a dè auda a sam ndohi Chaldée, a mbél na, a nzi a nshèffè.

³ Gar haha Ndo nzi pèc pècèk a gaɗa: A vava i da va ta kokwar haha a ri a ndohi var bi Babylone, a nengaʼa a da dumaʼa.

⁴ Wud bihai ta gaɗa na bai: Sèi ta keɗa ndo haha! Aman nengaʼa a wushedama ta ri a ndohi var, man ta zhè te kokwar haha, ri ndohi kokwar tèlèba, man ta gaɗa ta ma haha. Ndo haha a vava a woy skwi mʼmbél ndohi haha ka ɓai, a woya a nzede ta.

⁵ Bi Sédécias a ngaɗa: I va kinè a rai, da gu arsa! Aman bi a slaha ta ɓai.

⁶ A ta co Jérémie, a ta da a vèveɗ thal Malkija, kra hai, man a zhè a sam gi sojèhai. Ta da Jérémie a pa a teɓa. Iyam a te thal ɓai, sèi draɓ, a Jérémie a nkala a draɓ.

⁷ Ebed-Mélec, ndo Ethiopie, ntokotasl bai man a zhè te gi bai, a ntsenaʼa, ara man ta da Jérémie a vèvèɗ thal. Bai a nʼnza a ntamagi Benjamin.

⁸ A nengaʼa a mdo auda te gi bai, a ngaɗa na bai:

⁹ Bai, bi ga, skwi man ndohi haha ta ga na Jérémie, ambaɓai, man ta kalda a vèvèɗ thal. Skwi nʼndi a te kokwar ɓai, a da metsi a pa a mai.

¹⁰ Bai a ngaɗa na Ebed-Mélec, ndo Ethiopie: Hul ndohi 30 a haha, va-ndzovkoɗi Jérémie, ndo nhadka ma, auda te vèvèɗ, ga a metsi na.

¹¹ A Ebed-Mélec a nhul ndohai, a ndo a gi bai, a gi tʼhwaɗ gai man ta ɓiceda kolongwi a pa, a nhul kèckèc maslaka, a ta kalda na a gèɗ a Jérémie a va thal ara teɓa.

¹² Ebed-Mélec, ndo Ethiopie, a ngaɗa na Jérémie: Co kèckèc maslaka, manda a hwaɗ mbhau ngaya a hwaɗ teɓa. Jérémie a ngu arsa.

¹³ A ta gsokoɗi Jérémie a teɓa, a ta ckoɗauda te vèvèɗ. Te deɓaʼa Jérémie a nʼnza a gi sojèhai.

Sédécias a gi zlau

¹⁴ Bai Sédécias a nzlündo ndo, da bahka na Jérémie, ndo nhadka ma, a sam na, a ntamagi mamakaraʼa, te gi Zhiklè. A ngaɗa na Jérémie: I woya a i dzhaɗ ka ma ngiɗè, ka ngheda skwi a sam ga ɓai!

¹⁵ Jérémie a ngaɗa na Sédécias: Aman i ngra ka, ka da keɗyè azɓi dè? Ko i ngatsa ka maya, ka cinè azɓi genè!

¹⁶ Bai Sédécias a mʼmbaɗa na Jérémie a metsar, a ngaɗa na: Ara man Ndo nzi pèc pècèk a zhè, man a mva nga nshèffè, i da keɗ ka azɓai, i da fe ka a ri a ndohi man ta woy a ta zeda nshèffè ngaya azɓai.

¹⁷ Jérémie a ngaɗa na Sédécias: Ndo nzi pèc pècèk, Zhiklè bi mbiaʼa, Zhiklè Israel, a goɗ ar haha: Aman ka dè a sam tsuvomhi bi Babylone, a ka vi va ngaya a ri a tengaʼa, ka metsi azɓai. Vogwa a da ndi kokwar haha azɓai, kinè a ndohi gi ngaya kin da nzi a nshèffè.

¹⁸ Aman ka da vi va ngaya a ri a tsuvomhi bi Babylone azɓai, Zhiklè a da va ta kokwar haha a ri ndohi Chaldée, a ta da fa na vogwa. Ka da mbélè auda te ri ta azɓai.

¹⁹ Bi Sédéias a ngaɗa na Jérémie: I gi zlau ndohi Juda, man ta humda va a ndohi Chaldée. Wa ngiɗè ha ta da viyè a ri tengaʼa, a ta mbèhwali a iyè.

²⁰ Jérémie a ngaɗa: Ta da va ka a ri a tengaʼa azɓai. Tsena ma Ndo nzi pèc pècèk, man i menda ka, a ka nzi amba, a ka nzi a nshèffè!

²¹ Aman ka dè azɓai, na haha skwi man Ndo nzi pèc pècèk a ngrayè:

²² Njékédi ngwozi tèlèba man ta zhè te gi bi Juda, ta de ta a sam wud bihi bi Babylone, a ta sli dimèsh: Mandalahi ngaya ta pe ka a wai, ta gs ka a wuɗai, ta jèka ka sak ngaya a draɓ a ta hu ta.

²³ A vava, ngwozi ngaya tèlèba, a wudahi ngaya tèlèba, ta de ta a sam ndohi Chaldée; aman géɗ va ngaya, ka da mbélè auda te ri tengaʼa azɓai. Bi Babylone a da gs ka, a da fa na vogwa a kokwar haha.

²⁴ Sédécias a ngaɗa na Jérémie: Ndo da tsena ma man nga goɗ a ka ɓai, man ɓai ka metsi ngaya.

²⁵ Aman wud bihi ta tsenaʼa, nga goɗ a ka, a ta dè a sam ngaya, a ta gaɗa: Ngra nga, kin gaɗa a bi mè? Sèi ka ngreda nga kla, man ɓai nga keɗ ka, ngra nga skwi man bi a gaɗa ka, –

²⁶ ka da gaɗa ta: I tsu ri a sam bai, da diyè a deɓa a sam Jonathan ɓai, man ɓai i da metsi ga te pa.

²⁷ Te deɓaʼa a vava wud bihi tèlèba ta shkè a sam Jérémie, a ta dzhoɗo. A nengaʼa a mʼmenda ta ara man bai a gaɗa na. A ta jèkeda. Ndo a ntsena ma tengaʼa ɓai.

²⁸ Aranta Jérémie a nʼnza te gi sojèhai, ha pats man ta duma kokwar Jérusalem.