Jérémie 37 - Ma Zhiklè

Nhèdè ma a géɗ Jérusalem

¹ Nebucadnetsar, bi Babylone, man a ngu bi te kokwar Juda, a mfeda Sédécias, kra Josias, a bai te di man a Jeconia, kra Jojakim.

² Ko nengaʼa, ko bigolahi na, ko ndohi kokwar, tèlèba ta fa gèɗ a ma Ndo nzi pèc pècèk man a goɗ te ma Jérémie, ndo nhadka ma, ɓai.

³ Bi Sédécias a nzlündo Jucal, kra Shélémia, a Sophonie, kra Maaséja, ndo mvi skwi a Zhiklè, a sam Jérémie, ndo nhadka ma, aman a gaɗa na: Tsu rai a géɗ nga a sam Ndo nzi pèc pècèk, Zhiklè nga!

⁴ Jérémie a shèwèlè dai te ndev ndohai; ta fa a dangai di ɓai.

⁵ Ndohi Chaldée ta nza na a ma Jérusalem. A ndohi var Pharaon ta shkè te Egypte; aman ndohi Chaldée ta tsenaʼa, ta jèkeda kokwar man ta nza na ma.

⁶ Ndo nzi pèc pècèk a ngaɗa na Jérémie, ndo nhadka ma: Da gaɗa ta!

⁷ Ndo nzi pèc pècèk, Zhiklè Israel, a goɗ ar haha: Va-da gaɗa na bi Juda, man a nzlündko ndo a ndzhadyè: Na haha ndohi var Pharaon man ta shkè, ta woy a ta takaha kinè, ta men ta a deɓa a Egypte, kokwar ta.

⁸ A ndohi Chaldée ta da shkè a deɓa. Ta da gi var a kokwar haha, ta da dumaʼa, a ta da fa na vogwa.

⁹ Ndo nzi pèc pècèk a goɗ ar haha: Kin ngwode va kinè a ri kinè ɓai, a kin gaɗa: Ndohi Chaldée ta da jèke nga, a ta dè ta, ckè! Ta dè azɓai!

¹⁰ Ko kin bazl ta ndohi var Chaldée tèlèba, man ta gi var a kinè, njèkaha a sam tengaʼa sèi ndohi man tsakwal a nga ta mblè a va, ta da slèmbèɗè te gi ta, staɗ staɗ tèlèba, a ta fa na vogwa a kokwar haha.

Jérémie te dangai

¹¹ Te va man ndohi var Chaldée ta shkè ta auda a ma kokwar Jérusalem, a géɗ ndohi var Pharaon,

¹² Jérémie a mshkè auda te Jérusalem, aman a ndè a kokwar Benjamin, aman a ndè hil difi na te kokwar na.

¹³ Aman a zhè a ntamagi Benjamin, bi sojè a zhè, nzlembaɗ na Jireija, kra Shélémia, kra Hanania, man a kala na va a Jérémie, ndo nhadka ma, a ngaɗa: Ka dè a va ndohi Chaldée!

¹⁴ Jérémie a ngaɗa: Ncèkèlma! I dè a va ndohi Chaldée azɓai! Aman ta tsena ma na ɓai. A Jireija a ngso Jérémie, a nɗaʼa a sam wud bihai.

¹⁵ Wud bihai ta gu ndav a géɗ Jérémie, a ta tsau, a ta feda a gi Jonathan, ndo mwindè ɗèlèwèr, man ta ngwoda a gi dangai.

¹⁶ Ta nghede Jérémie a dangai, a Jérémie a nʼnza te pa mʼmènè a zhè.

¹⁷ Bi Sédécias a nzlündo ndo, da bahka na, a hai a ndzhodo a metsar te gi na, a ngaɗa: Ma Ndo nzi pèc pècèk a zhi dè? Jérémie a ngaɗa: A zhè! A ngaɗa: Ta da va ka a ri a bi Babylone!

¹⁸ Jérémie a ngaɗa na bi Sédécias: I ga mali mè a sam ngaya, a sam bigolahi ngaya, a sam ndohi haha, a ta fiyè a dangai?

¹⁹ Ndohi nhadka ma kinè man ta hadka kinè ma a ta gaɗa: Bi Babylone a da shkè, a da gi var a kokwar haha azɓai, ta tema?

²⁰ Anai, bai, bi ga, tsenaʼa! I tsi ri a ka! Ka diyè a deɓa a gi Jonathan, ndo mwindè ɗèlèwèr, ɓai, i da mets a pa ɓai!

²¹ A bi Sédécias a goɗ aman ta feda Jérémie a gi sojè. A nciɗ sam a nciɗ sam ta tsaka na movar te gi ndo nti movar, ha movar te kokwar tèlèba klèng. Jérémie a nʼnza te gi sojè.