Jérémie 36 - Ma Zhiklè

Jérémie a windè ma nengaʼa

¹ Aman Jojakim, kra Josias, bi te Juda, te mvi mafadaʼa, Ndo nzi pèc pècèk a ngaɗa na ma haha a Jérémie:

² Co ɗèlèwèr mpaɗaʼa, windeda ma tèlèba a pa, man i gaɗa ka a géɗ Israel, a géɗ Juda, a géɗ ndohi herkeda tèlèba, a hinè te pats man i gaɗa ka nshèlèkuraʼa, ha ndika na ma a mpatsna.

³ Wa ngiɗè ba ndohi gi Juda ta cinè skwi man ambaɓai tèlèba man i hur i da ga ta, aman ta shkè a deɓa staɗ staɗ tèlèba te civèɗ tengaʼa man ambaɓiaʼa, a i pra ta mali ta a maharam ta.

⁴ Jérémie a mbaha na Baruc, kra Nérija. A Baruc a mwindo ma tèlèba man Ndo nzi pèc pècèk a ngaɗa na Jérémie, ara man nenga a ngra na.

⁵ Te deɓaʼa Jérémie a ngaɗa na Baruc ar haha: I slaha a i dè a gi Zhiklè ɓai.

⁶ Aman ka, ka dè a ka jèngè ɗèlèwèr man ka windo ara man i menda ka, a ndohi te gi Zhiklè, ma Ndo nzi pèc pècèk tèlèba, a pats man ta jèkeda skwi nʼndai. Kajènga ta ndohi Juda tèlèba, man ta shkè te kokwar ta.

⁷ Wa ngiɗè ba ta da kèlèhi a deɓ sak Ndo nzi pèc pècèk, a ta jèkeda civèɗ tenga ambaɓiaʼa, staɗ staɗ tèlèba, a ta menkaɗa deɓa. Aman Ndo nzi pèc pècèk a gi ndav kumba, a ndzoan man a guv ta ndohi haha a vna.

⁸ A Baruc, kra Nérija, a ngu tèlèba, ara man Jérémie, ndo nhadka ma, a njè na a gèɗ. A njèngè ta ma Ndo nzi pèc pècèk te dèlèwèr, te gi Zhiklè.

Bai a fa na vogwa a ɗèlèwèr

⁹ Aman Jojakim, kra Josias, bi te Juda, te mvi mazlamaʼa, a ki 9, a mboho, aman ndohi tèlèba te Jérusalem a ndohi tèlèba man ta shkè a Jérusalem te kokwar Juda mbiaʼa, a ta jèkeda skwi nʼndai.

¹⁰ Baruc a njongo ma Jérémie te ɗèlèwèr, te gi Zhiklè, a sam Guemaria, kra Shaphan, ndo mwindè ɗèlèwèr, te gala ta géɗèʼa, a ntamagi mɓuaʼa, a ma gi Zhiklè, a sam ndohi tèlèba.

¹¹ Aman Michée, kra Guemaria, kra Shaphan, a ntsena ma Ndo nzi pèc pècèk tèlèba, man ta windo a ɗèlèwèr,

¹² a ndo a gi bai, a gi ndo mwindè ɗèlèwèr, a sam man wud bihi ta ɓica te pa a ta cèmma. Elishama, ndo mwindè ɗèlèwèr, a Delaja, kra Shemaeja, Elnathan, kra Achor, Guemaria, kra Shaphan, a Sédécias, kra Hanania, a wud bihi tèlèba.

¹³ Michée a ngra ta ma tèlèba man a tsenaʼa, man Baruc a jongo te ɗèlèwèr a sam ndohai.

¹⁴ A wud bihi tèlèba ta zlündo Yehudi, kra Nethania, kra Shélémia, kra Cushi, a sam Baruc, aman a ngaɗa na: Co ɗèlèwèr man ka jongo a sam ndohai, a ka shkè a vna! Baruc, kra Nérija, a nco ɗèlèwèr mpaɗaʼa, a nʼndo a sam ta.

¹⁵ Ta gaɗa na: Nzahai, jongo, a nga tsenaʼa! Baruc a njongo a sam ta.

¹⁶ Aman ta tsena ma tèlèba, ta pu di a va, a ta gu zlau. Te deɓaʼa ta gaɗa na Baruc: Ma haha tèlèba nga da ngreda na bai.

¹⁷ Te deɓaʼa ta dzhoɗo Baruc, a ta gaɗa: Ngreda nga, ma haha tèlèba, man ka windo, ka ngots tema?

¹⁸ Baruc a ngaɗa ta: Jérémie a ngaɗayè ma haha tèlèba te ma na, a iyè, i windo a skwi mwindè a ɗèlèwèr.

¹⁹ Wud bihai ta gaɗa na Baruc: Vo-do, va-ngheda va kinè, kinè a Jérémie! Ndo da sun sam man kin da nzi a pa ɓai!

²⁰ Te deɓaʼa ta shkè a sam bai, a gi bai. Ta feda ɗèlèwèr a gi Elishama, ndo mwindè ɗèlèwèr. A ta ngreda na ma haha tèlèba a bai.

²¹ Te deɓaʼa bai a nzlündo Yehudi, da cko ɗèlèwèr, a nengaʼa a nco te gi Elishama, ndo mwindè ɗèlèwèr. Yehudi a njongo a sam bai, a sam wud bihi tèlèba, man ta zlatsa a sam bai.

²² Bai a nʼnza te gi bi nengaʼa, man a nza te pa a ngwar, a ki mazlam, ndazli vogwa nvatsa te kizlèd.

²³ Aman Yehudi a njongo civèɗ makar, faɗ ma, bai a nzla ɗèlèwèr, a gwèsh, a ndo mwindè ɗèlèwèr a nkalda a vogwa te kizlèɗ, ha vogwa te kizlèɗ a nʼndeda ɗèlèwèr tèlèba a ma.

²⁴ Ta ga zlau ɓai, ta kuratsa maslaka tengaʼa ɓai, bai a golahi nengaʼa tèlèba man ta tsena ma haha.

²⁵ Elnathan, Delaja a Guermaja ta tsu ri a sam bai, da fa na vogwa a ɗèlèwèr ɓai; aman nengaʼa nfa gèɗ a ma tengaʼa ɓai.

²⁶ Te deɓaʼa bai a ngaɗa ta nda Jerachmeel, kra bai, a Seraja, kra Azriel, a Shélémia, kra Abdeel, aman ta gshè Baruc, ndo mwindè ɗèlèwèr, a Jérémie, ndo nhadka ma. Aman Ndo nzi pèc pècèk a nʼnghede ta.

Ta windo ɗèlèwèr ngiɗè

²⁷ Ndo nzi pèc pècèk a ngaɗka na Jérémie, te deɓ man bai a nfa na vogwa a ɗèlèwèr ma, man Baruc a mwindo, ara man Jérémie a menda na:

²⁸ Do a ka woy ɗèlèwèr ngiɗè, a ka windeda ma matsa tèlèba a pa, ma man a zhè te ɗèlèwèr nshèlèkuraʼa, man Jojakim, bi Juda, a fa na vogwa.

²⁹ Goɗa a géɗ Jojakim, bi Juda: Ndo nzi pèc pècèk a goɗ ar haha: Ka fa na vogwa a ɗèlèwèr, a ka gaɗa: Ka windeda pa èhèmè: bi Babylone a da shkè, a da gedassa kokwar haha, a da zede ta ndohai a skwi kuɗom.

³⁰ Gar haha Ndo nzi pèc pècèk a goɗ a géɗ Jojakim, bi Juda: Ndo te verzi nengaʼa da nza a gèɗ sam nʼnzi bi David ɓai! Nckondo nengaʼa sèi ta kalda a dala, a pats a dza na a pa, a vaɗ a nʼnga na a gèɗ a pa.

³¹ I gi kita a géɗ nengaʼa, a géɗ ndohi te verzi nengaʼa, a géɗ golahi nengaʼa, a géɗ mali ta. I da ngwoda ta skwi ambaɓiaʼa man i gaɗdahai a gèɗ a tengaʼa, man ta fa na gèɗ ɓai, a gèɗ a ndohi Jérusalem, a ndohi Juda.

³² Te deɓaʼa Jérémie a nco ɗèlèwèr ngiɗè, a mva na Baruc, kra Nérija, ndo mwindè ɗèlèwèr. Nengaʼa a mwindeda ma Jérémie a pa, ma tèlèba man a zhè te ɗèlèwèr man Jojakim, bi Juda, a fa na vogwa, a ta winda na ma ngiɗè aranta tsaɗ tsaɗ a vaʼa.