Jérémie 35 - Ma Zhiklè

Jérémie a ndohi Récab

¹ Ma man Ndo nzi pèc pècèk a gaɗa na Jérémie, te va man Jojakim, kra Josias, bi Juda.

² Do a gi ndohi Récab, a ka gaɗa ta. De ta a gi Zhiklè, a gi nʼngelaʼa staɗ, a ka va ta zom a ta sau.

³ A i co Jaazania, kra Jérémie, kra Habazinia, a kramamhi na, wudahi nengaʼa tèlèba, ndohi gi Récab tèlèba.

⁴ I de ta a gi Zhiklè, a gi nʼngelaʼa man a wudahi Hanan, kra Jigdalia, ndo Zhiklè; gi nengaʼa a tsagi gi wud bihai, a géɗ gi Maaséja, kra Shallum, ndo mɓer ntamagai.

⁵ Te deɓaʼa i va ta duzlak nʼndha a zom, a kokwihai, a sak a ndohi Récab, a i gaɗa ta: va-sau zom!

⁶ Ta gaɗa: Nga si zom azɓai. Jonadab, bab nga, te verzi Recab, a njè nga ma a gèɗ, a ngaɗa: Kin da su zom ɓai, kinè ba a wudahi kinè a mèdèp.

⁷ Kin da rom gi ɓai, kin da zlekau skwi ɓai, kin da gu gi lak ɓai; aman kin da nzi a gi maslaka a pats nshèffè kinè tèlèba, a kin da nzi a nshèffè a ma ma.

⁸ Nga tsena ma Jonadab, bab nga, te verzi Recab, te skwi tèlèba man a njè nga a gèɗ, a nga sa zom ɓai a pats nshèffè nga tèlèba, nga a ngwozi nga a wudahi a dalahi nga.

⁹ Nga rama gi ɓai, a nga nzi a pa; nga ga gi lak ɓai, a nga peza gi dau ɓai; nga zleka skwa ɓai.

¹⁰ Nga te gi maslaka, nga tsenaʼa, a nga gu skwi tèlèba, man Jonadab, bab nga, a njè nga a gèɗ.

¹¹ Aman Nebucadnetsar, bi Babylone, a mshkè a ngi var a kokwar, nga gaɗa: Vo-washkè, ngo-dokoya a kokwar Jérusalem, a géɗ ndohi var Chaldée a ndohi var Syrie. A nga nza a Jérusalem.

¹² Ndo nzi pèc pècèk a ngaɗa na Jéré-mie:

¹³ Zhiklè bi mbiaʼa, Zhiklè Israel, a goɗ ar haha: Do a ka gaɗa ta ndohi Juda a ndohi kokwar Jérusalem: Kin cè ma man i slebda kinè, a kin cinè ma ga azɓi èhèmè? Ndo nzi pèc pècèk a gaɗa.

¹⁴ Ta co ma Jonadab, te verzi Recab, man a njè ta a gèɗ a wudahi na, da sau zom ɓai, a ta sa ɓai ha patsna, a géɗ man ta tsena ma man bab ta a njè ta a gèɗ. A iyè, i gaɗa kinè, i wurra na va a prèk te gai, aman kin tsena ma ga ɓai.

¹⁵ I zlinda kinè ɓèlèlihi ga, ndohi nhadka ma, i zlinde ta a ta wurra na va a prèk te gai, a i gaɗa: Va-menkada deɓa, staɗ staɗ tèlèba te civèɗ mali na; va-tila skwi man kin giaʼa, kin dzodzor zhiklèhi ngiɗè ɓai, a kin tsu ri a tengaʼa ɓai, aman va-nza tʼherkeda man i va kinè, a i va ta babhi kinè! Aman kin fa na zlembaɗ ɓai, kin tsena ma ga ɓai.

¹⁶ Wudahi Jonadab, te verzi Recab, ta gu ara man bab ta a njè ta a gèɗ; aman ndohi haha ta tsena ma ga ɓai.

¹⁷ Gar haha Zhiklè bi mbiaʼa, Zhiklè Israel, a ngaɗa: Anai i zlinda kinè matakwan tèlèba man i goɗ a géɗèʼa, a kokwar Juda, a ndohi kokwar Jérusalem tèlèba; te man i gaɗa ta, a ta tsena ɓai; i baha ta, a ta mbeɗay a ma ɓai.

¹⁸ Te deɓaʼa Jérémie a ngaɗa ta ndohi Récab: Zhiklè bi mbiaʼa, Zhiklè Israel, a goɗ ar haha: A géɗ man kin tsun ma Jonadab, bab kinè, a kin dzodzor ma nkwèr nengaʼa tèlèba, a kin gu skwi tèlèba man a njè kinè agèɗ,

¹⁹ Ndo nzi pèc pècèk, Zhiklè bi mbiaʼa, Zhiklè Israel, a gaɗa: Te va ndohi te verzi Jonadab, kra Recab, ndo a da gi mizlinè ga pèc pècèk.