Jérémie 34 - Ma Zhiklè

Zhiklè a gaɗa na Sédécias

¹ Ma man Ndo nzi pèc pècèk a ngaɗa na Jérémie, te va man Nebucadnetsar bi Babylone, a ndohi var nengaʼa tèlèba, a kokwar-bihi herkeda tèlèba te ri nengaʼa. Ndohi herkeda ta gu var a Jérusalem, a kokwar nengaʼa tèlèba.

² Ndo nzi pèc pècèk, Zhiklè Israel, a goɗ ar haha: Do a ka gaɗa na Sédécias, bi Juda: Ndo nzi pèc pècèk a goɗ ar haha: Na haha, iyè i va na kokwar haha a ri a bi Babylone, a nengaʼa a da fa na vogwa.

³ Ka ba, ka da mbél ngaya te ri nengaʼa azɓai; aman a vava a gs ka, i ve ka a ri a nengaʼa, kin da pi di a iyam di a iyam dai a bi Babylone, a kin gèɗè ma kwa kwaʼa, te man ka de a kokwar Babylone.

⁴ Sédécias, bi Juda, tsun ma Ndo nzi pèc pècèk genè! Ndo nzi pèc pècèk a goɗ a géɗ ngaya: Ka da metsi te ri tsakwal azɓai,

⁵ ka da metsi te gumai. Lèmèlèmè ara man ta ndar ɓurdi a géɗ babhi ngaya a géɗ bihi halaʼa, man ta zhè ga ka, ta da gi lèmèlèmè a géɗ ngaya, ta da ndèr ɓurdi a géɗ ngaya, ta da kuɗ ka: Woba Bai! Nasa man i goɗa, Ndo nzi pèc pècèk a gaɗa.

⁶ Jérémie, ndo nhadka ma, a mʼmenda na ma haha tèlèba a Sédécias, bi Juda, te Jérusalem.

⁷ Ndohi var bi Babylone ta gi var a Jérusalem, a kokwarhi Juda tèlèba man ta Sala ta va a dai, a Lakis, a Azéka. Ta cèw haha ta te va kokwar Juda, ta nza te hwaɗ zlazlar.

Israel a hér nderzlè-ma

⁸ Ma man Ndo nzi pèc pècèk a ngaɗa na Jérémie, te deɓ man Sédécias a nderzla ma a ndohi tèlèba, man ta zhè te Jérusalem. A njè ta, aman ta pra ta ɓèlèlihai.

⁹ A goɗ aman ko wawa da pra ɓèl Hébreu, ko nguraʼa ko ngwoz, ndo da ga ndo Juif, kramam na, a ɓèl na ɓai.

¹⁰ Wud bihi tèlèba, a ndohi tèlèba man ta derzla ma, ta co, ta pra ɓèlèlihi ta tèlèba, ko nguraʼa ko ngwoz, a ta nza a ɓèlè asaɓai. Ta co a ta pre ta.

¹¹ Aman te deɓaʼa ta hur maya tsaɗ, ta baha ta ɓèlèlihi, ngurhi a ngwozi, man ta pre ta, a deɓa; a ta pe ta a ɓèlè zaʼa, ko nguraʼa ko ngwoz.

¹² Te deɓaʼa Ndo nzi pèc pècèk a ngaɗa na Jérémie:

¹³ Iyè, i derzla ma a babhi kinè a pats man i helka ta auda te kokwar Egypte, te gi ɓèlè a i gaɗa:

¹⁴ Te deɓ mvi 7, kin da pre ta kramamhi kinè, ndohi Hébreu, man ta preda va ta a ma a sam kinè, a ta gu mizlinè kinè mvi 6 ma, auda te ɓèlè. Va-pre ta a sam kinè! Aman babhi kinè ta tsena ma ga ɓai, ta fa zlembaɗ ɓai.

¹⁵ A pats ngiɗè kin ngwoda ndav kinè, a kin gau skwi nzuraʼa a sam di ga, staɗ staɗ da goɗa, aman kramam nengaʼa mpra ma, a kin derzla ma a sam ga te gi ga.

¹⁶ Te deɓaʼa, kin hur tsaɗ, a kin derɗè nzlembaɗ ga. Kin bahka ta ɓèlèlihi kinè, ko nguraʼa ko ngwoz, a deɓa, man kin pre ta ma, a kin ga ta wuɗai, a kin ge ta ndohi a ɓèlè zaʼa.

¹⁷ Gar haha Ndo nzi pèc pècèk a gaɗa: Kin woy a kin pre ta kramamhi kinè ɓai, ngiɗè a ngiɗè a nslamagi ta; kin tsena ma ga ɓai. Gar haha i pra kinè tsakwal a gidiɓèr a mai a va kinè, Ndo nzi pèc pècèk a gaɗa. I da gi a kin ndara ta kokwar-bihi tʼherkeda tèlèba, a ta rzl ta a pa.

¹⁸ I da ga ta ndohi man ta tawaɗaha nderzlè-ma ga, man ta dzadzara nderzlè-ma ga ɓai, ara man ta gu a zlè, man ta tseraha cèw.

¹⁹ Wud bihi Juda, a wud bihi Jérusalem, ndohi ntokotasl bihai a ndohi mvi skwi a Zhiklè, ndohi herkeda tèlèba, tengaʼa man ta beza a ndev zlè ntseraha sa.

²⁰ I da pe ta a ri ndohi mayamhi ta, a ri tengaʼa man ta woy a ta zeda nshèffè ta. Nckondo tengaʼa, ɗiakihai a skwi dak ta da ndiaʼa.

²¹ Sédécias, bi Juda, a wud bihi nengaʼa, i da pe ta a ri a ndohi mayamhi ta, a ri tengaʼa man ta woy a ta zede nshèffè ta, a ri ndohi var bi Babylone, tengaʼa man ta jèke kinè dai, nʼnzi kètè.

²² Na haha iyè i njè ma haha, Ndo nzi pèc pècèk a gaɗa: I da helka ta a deɓa a kokwar haha, a ta gi var a kokwar haha. Ta da dumaʼa, a ta da fa na vogwa. Aman kokwarhi Juda, i da ndeda a kokwar ngedassaʼa, ko ndo staɗ a nzi a pa azɓai.