Jérémie 33 - Ma Zhiklè

Mpshè ma man a di a shkè

¹ Ndo nzi pèc pècèk a ngaɗa na ma macecèwaʼa a Jérémie, te va man a zhè te dangai, te gi sojè dai.

² Ndo nzi pèc pècèk a goɗ ar haha; nengaʼa man a ngu herkeda, nengaʼa man a mpau, nengaʼa man nzlembaɗ na Ndo nzi pèc pècèk:

³ Bahayè, i da mbeɗa ka a ma, i da ngra ka skwi mbia holholaʼa man ka sun ɓai.

⁴ Ndo nzi pèc pècèk, Zhiklè Israel, a goɗ ar haha a géɗ gihi kokwar haha, a géɗ gihi bihi Juda, man ta gedas ta te va var a tsakwal,

⁵ a géɗ tengaʼa man ta shkè a ta gi var a ndohi Chaldée, a ta ndha gihai a nckondohai, tengaʼa man i bazl ta a ndav a ndzoan ga, tengaʼa man i ngheda di ga a sam kokwar haha, a géɗ maya tengaʼa man ambaɓai tèlèba.

⁶ Na haha i va na madzaf, da mbel na: Iyè, i mbelaʼa. I da ngreda ta skwi mbelaʼa te gumai, te ma nzuraʼa.

⁷ I da helka ta ndohi ɓèlè te Juda, a ndohi ɓèlè te Israel, a deɓa; i da til ta zaʼa ara halaʼa.

⁸ I da pan ta te mali tengaʼa tèlèba, man ta gu mali a sam ga; i da pra ta mali tengaʼa tèlèba, man ta gu mali a sam ga, a ta jèkyè.

⁹ Kokwar a da gi a sam ga a skwi man i wuffè a géɗèʼa, a skwi nslébèrdèʼa, a skwi nʼnjèlè, a sam ndohi herkeda tèlèba man ta da tsena ma manam man i va na; ta da gi zlau, ta gudzai, man ta rka manam a gumai man i va na.

¹⁰ Ndo nzi pèc pècèk a goɗ ar haha: A sam haha man kin gaɗa: ‘ngedas na’, ndo a te pa ɓai, skwi dak a te pa ɓai, te kokwar Juda, te civèɗ Jérusalem man ta gedas ta, man ndo a te pa ɓai, man ndo a nzi a pa azɓai, man skwa a te pa ɓai,

¹¹ ta da cinè ma mwuffè a dimèsh te pa dai, ma ntsima a ma medemai, daʼai man a gaɗa: Va-slubordo Ndo nzi pèc pècèk, Zhiklè bi mbiaʼa, aman nengaʼa amba, Ndo nzi pèc pècèk, aman pombi nengaʼa a nzi a mèdèp! Daʼai tengaʼa man ta slébèrdè Zhiklè te gi Ndo nzi pèc pècèk, te man i da helka ta ndohi ɓèlè a deɓa te kokwar, ara halaʼa, Ndo nzi pèc pècèk a gaɗa.

¹² Zhiklè bi mbiaʼa a gaɗa: A sam haha man ngedas na, man ndo a te pa ɓai, man skwi dak a te pa ɓai, te kokwar nengaʼa tèlèba, sam nwèr skwai a da zhè, man ndohi mɓer skwai ta dè a ta wèr tambak.

¹³ Te kokwar te za, te kokwar te Shephela, te kokwar te dukwaɗ, te herkeda Benjamin, a tsagi Jérusalem, te kokwar Juda, tambakihi ta da bizhè a pa, a sam ndo mɓer ta man a nger ta, Ndo nzi pèc pècèk a gaɗa.

¹⁴ Na haha pats a di a shkè, Ndo nzi pèc pècèk a gaɗa, man i da gi ara ma mbelaʼa man i goɗ a géɗ ndohi Israel, a géɗ ndohi Juda.

¹⁵ A pats nasa, te ndev nasa, i da gi a ngi-zuraʼa a fcè te David, man a da gi kita zuraʼa, a ngi-zuraʼa te kokwar.

¹⁶ A pats nasa Juda a dè mbél na, a Jérusalem a da nzi a gumai; ta da va na nzlembaɗ: Ndo nzi pèc pècèk, ngi-zura nga.

Nderzlè-ma a David

¹⁷ Aman Ndo nzi pèc pècèk a gaɗa: Ndo te verzi David a da nzi a géɗ sam nʼnzi bi ndohi Israel pèc pècèk,

¹⁸ a ndohi mvi skwi a Zhiklè ta zhè, a ndohi Lévi ta zhè a sam ga pèc pècèk, a man ta ndèr skwai a ta vi skwai a vodzok a dè a géɗèʼa, a ta zli skwi a Zhiklè lèk lèk.

¹⁹ Ndo nzi pèc pècèk a ngaɗa na Jéré-mie:

²⁰ Ndo nzi pèc pècèk a goɗ ar haha: Aman kin slaha kin gedassa nda pats a vad man i tilèʼa, a pats a vaɗ ta veni va a nvenai te deɓaʼa asaɓai,

²¹ te deɓaʼa ko nderzlè-ma ga a David, ɓèl ga, a da pre na mènè; a ndo te verzi nengaʼa a da nzi a géɗ sam nʼnzi bi nengaʼa asaɓai, a ndohi Lévi, a ndohi mvi skwi a Zhiklè man ta gi mizlinè ga, tʼazɓai.

²² Lèmèlèmè ara man ndo azɓai, man a slaha a nʼngér bantihai te giɗfèk, a nlivè wyak a ma woyam, lèmèlèmè i da zlèzlèmè ndohi te verzi David, ɓèl ga, a ndohi Lévi man ta gi mizlinè ga.

²³ Ndo nzi pèc pècèk a ngaɗa na Jéré-mie:

²⁴ Ka tsena ma ndohi haha ɓi dè, man ta gaɗa: Verzi ndohi cèw haha man Ndo nzi pèc pècèk a nʼngatska ta auda, a nkwol ta! Aranta ta derde ndohi ga, ara man ta ndohi herkeda asakaɓai a sam ta.

²⁵ Ndo nzi pèc pècèk a goɗ ar haha: Iyè man i tila nda pats a vad, a i pau giɗfèk a herkeda,

²⁶ a i slaha a i kwèl ndohi te verzi Jacob a David, ɓèl ga, a i hil bihi te verzi ndohi ngiɗè de, a ta gi bi a géɗ verzi Abraham, Isaac a Jacob? Aman i da helka ta a deɓa te bèlè, a ta da siyè te va.