Jérémie 32 - Ma Zhiklè

Jérémie te dangai

¹ Ma man Ndo nzi pèc pècèk a gaɗa na Jérémie, te mvi man Sédécias, bi Juda, a ngu bi mvi kula. Nebucadnetsar a ngu bi mvi 18.

² Ndohi var bi Babylone ta nza na ma a Jérusalem. Jérémie, ndo nhadka ma, nte dangai, te gi sojè, man a zhè te gi bi Juda.

³ Sédécias, bi Juda, a mfeda a dangai a pa, a ngaɗa: Ka hodko ma èhèmè? Ka gaɗa: Ndo nzi pèc pècèk a goɗ ar haha: Na haha i da vi kokwar haha a ri a bi Babylone, a da dumda ma;

⁴ a Sédécias, bi Juda, a da mbél te ri ndohi Chaldée azɓai, a vava a kèlèhi a ri bi Babylone, ta da gèɗè a di kwa kwaaʼa — ta da pi di iyam di iyam dai.

⁵ Ta da dè Sédécias a kokwar Babylone, a da nzi a pa, ha i hérèʼa, Ndo nzi pèc pècèk a gaɗa: Aman kin da gi var a ndohi Chaldée, kin da gi a ngul ta azɓai.

Jérémie, a gi dau

⁶ Jérémie a ngaɗa: Ndo nzi pèc pècèk a goɗ ar haha:

⁷ Na haha, Hanameel, kra Shallum, kramam bab ngaya, a dè a sam ngaya, a nda gaɗa ka: Sum gi dau a va ngaya, gi dau Anathoth. Ka nshèlèkuraʼa man ka slaha ka ngècèʼa.

⁸ Hanameel, kra kramam ga a mshkè a sam ga, ara man Ndo nzi pèc pècèk a ngaɗayè te gi sojè, a ngaɗayè: Ɗakwa, sum gi dau ga, gi dau Anathoth, te herkeda Benjamin; aman ka nshèlèkuraʼa man ka slaha ka ngècèʼa. Sumda a va ngaya! – A i suna, ma haha ma Ndo nzi pèc pècèk.

⁹ A i suma gi dau, man a Anathoth, te ri Hanameel, kra kramam bab ga, a i pa na sulai: gurso 17.

¹⁰ Te deɓaʼa i windo ɗèlèwèr, i baha ta ndohi malwuɗihai, a i pa na sulai.

¹¹ I co ɗèlèwèr, man i sum gi dau, i windo nzlembaɗ a pa, a i ndèda pa.

¹² A i va na ɗèlèwèr sa a Baruc, kra Nérija, kra Machséja, a sam di Hanameel, kra kramam bab ga, a sam di ndohi malwuɗihi man i windo ɗèlèwèr a sam di ta, a sam di ndohi Juda tèlèba man ta nza te gi sojè.

¹³ Te deɓaʼa i gaɗa na Baruc, a sam di ta tèlèba:

¹⁴ Zhiklè bi mbiaʼa, Zhiklè Israel, a goɗ ar haha: Co ɗèlèwèr haha, ɗèlèwèr man i sum gi dau, man nzlembaɗ a pa, nʼndèa pa. Feda a shiɗèf rɓasl, a nzi dai, mʼmèn kumba.

¹⁵ Aman Zhiklè bi mbiaʼa, Zhiklè Israel, a gaɗa: Te kokwar haha ta da shum gi ndohai, gi dau, a gi lak dai!

¹⁶ Aman i va na ɗèlèwèr sa a Baruc, kra Nérija ma, i tsu ri a Ndo nzi pèc pècèk, a i gaɗa:

¹⁷ Wa! Bi Zhiklè, Ndo nzi pèc pècèk, ka ka gau giɗfèk a herkeda a wuɗi ngaya mbiaʼa, a ri ngaya man wuɗi na zhè. Skwi man ka slaha ɓi ba, azɓai.

¹⁸ Ndohi gozhèm gozhèm ta se ka te va, aman ka gi kita a géɗ mali babhi ta, a sam wudahi te verzi ta. Ka Zhiklè mbiaʼa, man wuɗi ngaya a zhè, man nzlembaɗ ngaya: Zhiklè bi mbiaʼa.

¹⁹ Ka sun maya kumba, ka gi skwi a wuɗai, di ngaya mwinèa a géɗ civèɗ ndohi Tʼherkeda tèlèba. Aman ka va na staɗ staɗ tèlèba ara mizlinè na, ara skwi nengaʼa man a gau.

²⁰ Ka gau nrkedi a ka ngreda skwi auda te kokwar Egypte, te Israel, Tʼherkeda tè-lèba, ha patsna; a ka gu nzlembaɗ ngaya mbiaʼa, ara man a zhè a patsna.

²¹ Ka helka ta ndohi Israel, ndohi ngaya, auda te kokwar Egypte, a nrkedai, a skwi man ka ngreda auda, a ri man wuɗi na zhè, a ri nzlatsedaʼa, a skwi mwuɗitpa mbiaʼa.

²² Ka va ta kokwar haha man ka mbaɗa ta babhi ta a ka woya a ka va ta, kokwar man wa a vongwom a hi te pa.

²³ Ta shkè a ta co a skwi ta, aman ta fa gèɗ a ma ngaya ɓai. Ta dzadzara ma kita ngaya ɓai, skwi tèlèba ta ga ara man ka njè ta a gèɗ bai. Te deɓaʼa ka wushede ta a matakwan haha tèlèba.

²⁴ Na haha ta ɗizla kwa a ma kokwar, a ta gɗvèʼa. Kokwar a dè kèlè a ri ndohi Chaldée, man ta nza na a ma; tsakwal, mai a gidiɓèr ta da gi a ngul ta. Skwi man ka goɗa, kalka ma, ka rkaʼa.

²⁵ Ko gar haha, Bai, Ndo nzi pèc pècèk, ka gadayè: Sum gi dau a sulai, hul ndohi malwuɗai. A ndohi Chaldée ta da düm kokwar, kè!

Skwi man Zhiklè a hérè a géɗ Juda

²⁶ Ndo nzi pèc pècèk a ngaɗa na Jérémie ma haha:

²⁷ Nana, iyè Ndo nzi pèc pècèk, i Zhiklè ndohi tèlèba. Skwi man i slaha ɓai, a zhi dè?

²⁸ Gar haha Ndo nzi pèc pècèk a gaɗa: Iyè i da va ta kokwar haha a ri a ndohi Chaldée, a ri a Nebucadnetsar, bi Babylone. Nengaʼa a da dumaʼa.

²⁹ Ndohi Chaldée ta da shkè a pa, ta da gi var a kokwar haha, ta da fa na vogwa a kokwar haha, a vogwa a nʼndeda ma. Lèmèlèmè gihai man ta va na skwi a Baal a géɗèʼa, a ta va ta skwi a zhiklèhi ngiɗè, a ta pokoy gèɗ ndav auda a vna.

³⁰ Aman ndohi Israel a ndohi Juda ta gay skwi man ambaɓai a sam di ga, te gol ta. Ndohi Israel ta pokoy gèɗ auda genè, ta pokoy gèɗ auda genè, a skwi man ta gau a ri ta, Ndo nzi pèc pècèk a gaɗa.

³¹ Kokwar haha, man i gu ndav a géɗèʼa, man i gu ndzoan a géɗèʼa, daga pats man ta roma, ha patsna, ha i woya a i zedkoɗauda a sam ga.

³² A géɗ skwi man ambaɓi tèlèba man ndohi Israel a ndohi Juda ta gau, a ta pokoy gèɗ ndav auda a vna, tengaʼa bihi ta a wud bihi ta, ndohi mvi skwi a Zhiklè ta, a ndohi nhadka ma ta, ndo te Juda a ndohi kokwar Jérusalem.

³³ Ta ngwoday deɓa, ma ka ɓai. Ko i slebda ta daga pats nshèlèkuraʼa, ta tsena ɓai, ta ca skwi man i slebda ta ɓai.

³⁴ Ta ckoɗi skwi tengaʼa man hori te pa a gi ga, man ta baha na a nzlembaɗ ga, a ta lizhèʼa.

³⁵ Ta gu sam mvi skwi a Zhiklè te géɗèʼa man a Baal, te slrats Ben-Hinnom, a ta bezde ta wudahi tengaʼa a dalahi tengaʼa te va Moloc, skwi man i njè ta ɓai, man i hur i gaɗa ta, da gu skwi hori aranta a ta kalda Juda a mali ɓai.

³⁶ Aman anai, Ndo nzi pèc pècèk, Zhiklè Israel, a goɗ aranta a géɗ kokwar haha, man kin goɗ a géɗ nengaʼa: Zhiklè a mva na a ri bi Babylone a tsakwal a mai a gidiɓèr.

³⁷ Na haha, iyè i da ɓic ta te herkeda tèlèba, man i dzam ta a pa a ndav, a ndzoan, a shèwa ga mbiaʼa, a i da helka ta a deɓa a haha, a i gi aman ta nzi a gumai.

³⁸ Ta da ndi a ndohi ga, a iyè i gi a Zhiklè ta.

³⁹ I da va ta ndav staɗ, civèɗ staɗ, a ta gi zlau ga pèc pècèk, a manam ta a zhè, a manam wudahi te verzi ta.

⁴⁰ A i da derzlè ma a tengaʼa a mèdèp. I da dzadzar ta te pa pèc pècèk, aman i ga ta skwi man amba. I pra ta zlau ga a va, a ta jèkyè te deɓaʼa asaɓai.

⁴¹ I wuffè, aman i ga ta skwi man amba. A vava i da nge ta a herkeda haha, te mwoy ndo ga tèlèba, a wuɗi ga tèlèba.

⁴² Aman Ndo nzi pèc pècèk a goɗ ar haha: Lèmèlèmè ara man i bahka na matakwan a géɗ ndohi haha, lèmèlèmè man i bahka na skwi mbelaʼa tèlèba a géɗ tengaʼa man i gaɗdahai.

⁴³ Ta da shum gi dau te kokwar sa, te nengaʼa kin gaɗa: ngedas na, ko ndo, ko skwi dak te pa ɓai, ndohi Chaldée ta dumda ma.

⁴⁴ Ta da shum gi dau a sulai, ta da windè ɗèlèwèr, a ta ndèda pa; a ndohi malwuɗihai ta gi malwuɗai a pa te kokwar Benjamin, a tsagi Jérusalem, te kokwar Juda, te kokwar te za, te kokwar te Shephela, te kokwar te dukwaɗ, a pats man i da helka ta ndohi ɓèlè tengaʼa a deɓa, Ndo nzi pèc pècèk a gaɗa.