Jérémie 31 - Ma Zhiklè

Zhiklè a woy Israel

¹ A pats nasa, Ndo nzi pèc pècèk a gaɗa, i gi a Zhiklè ndohi te verzi Israel tèlèba; a tengaʼa ta ndi a ndohi ga.

² Gar haha Ndo nzi pèc pècèk a gaɗa: Ndohi man ta mbel ta te ri tsakwal, ta ngots pombai tʼhèshèkèɗ. Israel a woy sam nshèk va dai.

³ Ndo nzi pèc pècèk a ngudoko ta va a di dra. I woy ka a ndav a mèdèp; gar haha i va ka pombai a ma ma.

⁴ I da ɗaɗay ka, a ka ɗaɗaya, bidali te Israel. Ka da ngècè mwuffè a ka tsi tèzlèzlèu, ka da shkè auda a verzi ndohi ngècè man ta ngwèshè.

⁵ Ka da gi gi lak ngaya dai a géɗ za Samarie. Ndohi mpizhè ta da zleki a ta da ɓicè skwai,

⁶ a pats nasa, aman ndohi mɓer kokwar ta da bèhè te za Ephraim: Va-slambaɗa, ngo-dokoya a Sion, a sam Ndo nzi pèc pècèk, Zhiklè nga!

Israel a shkè ngwai

⁷ Aman Ndo nzi pèc pècèk a goɗ ar haha: Va-hazlawa a mwuffè a géɗ Jacob, va-guzlau a ma ndohi herkeda, vo-boho, va-slu dimèsh nslèbèrdè Zhiklè, va-gaɗa: Ndo nzi pèc pècèk, mbul ndohi ngaya, mbul njèkèdi Israel!

⁸ Na haha iyè i bahka ta te kokwar man a géɗèʼa, i da ɓicka ta te verzi herkeda. Te va tengaʼa ndo mandazlai, ndo vedal, ngwoz man na hwaɗ, ngwoz man a yi kra, tèlèba, nhèyè ndohi mbiaʼa, man a da shkè a deɓa a haha.

⁹ Ta da shkè a kuɗa a dai, a ngi mbuh-mbuhaʼa; i da feda ta ma, i de ta a ma woyam mbiaʼa, a civèɗ nzuraʼa man skwi a slafaɗama ta sak a pa azɓai, a i ga a bab Israel, a Ephraim tsuvom ga.

¹⁰ Va-tsena ma Ndo nzi pèc pècèk, ndohi herkeda! Va-njo dra Tʼherkeda nte ndev iyam! Va-gaɗa: Nengaʼa man a nksara Israel, a da ɓicèʼa, a da ɓirèʼa, ara ndo mɓer skwai man a wèr rèwè na.

¹¹ Aman Ndo nzi pèc pècèk a nsumko Jacob a deɓa, a mprokoɗauda te ri man wuɗi na zhè a fena nengaʼa.

¹² Ta da shkè a ta da hèzlèwè a mwuffè a géɗ za Sion. Ta da hakaɗai a sam pombi Ndo nzi pèc pècèk: ara dau, a barassa, a mbar, a tambakihi a zlèhai. Ta da gi ara gi lak man ta gedza na iyam, a ta tèkwèn skwa te deɓaʼa asaɓai.

¹³ Te deɓaʼa bidalihai ta woy ngècè, golahi a babgihi ba ta woy a ta wuffè. I da bid ta, i da va ta mwuffè te deɓ kuɗa.

¹⁴ Ndohi mvi skwi a Zhiklè ta ngézhè a mbeza, a ndohi ga ta wèl va te mpshè ma ga, Ndo nzi pèc pècèk a gaɗa.

Israel a ngredè mali na

¹⁵ Ndo nzi pèc pècèk a goɗ ar haha: Ta tsena mbèhè te Rama, kuɗa a wobau mbiaʼa. Rachel a kuɗi wud na, ndo a slaha a mbidè ɓai, te man wudahi na azɓai.

¹⁶ Ndo nzi pèc pècèk a goɗ ar haha: Ka kuɗ ɓai, saha na kuɗa auda a dai, aman skwi ntul mizlinè ngaya a zhè, Ndo nzi pèc pècèk a gaɗa; ta da shkè a deɓa te kokwar ndo mayam ta.

¹⁷ Ndo nzi pèc pècèk a gaɗa: Skwi man ka zhèrè dai, zhoro genè, a da gai; a wudahi ta da shkè a deɓa a kokwar ta.

¹⁸ I tsena Ephraim man a kuɗai: Ka gay ndzoan, ka tsyè ara zlè, ara ndo mizlinè ka ɓai. Ngwodkoy ndav ga, a ndav ga nʼngwoda, te man ka Ndo nzi pèc pècèk, Zhiklè ga.

¹⁹ Te deɓ man i ngwoda ndav, i kuɗi a géɗ mali ga. Te deɓ man i sun mali ga, i pi ri a bazlazlam, i gi horai, gèɗ ga ndzakaɓa, hori gol ga a dai.

²⁰ Ephraim kra ga mbelaʼa, kra ga man i wuffè a géɗ nengaʼa, man pèc pècèk i slefiaʼa, i woya a i hérèʼa, di ɗè? Ndav ga a gudzi a géɗ nengaʼa, a siyè te va, a vava, Ndo nzi pèc pècèk a gaɗa.

²¹ Zlatseda skwi man ka shinè te pa, lamba nʼngra ka civèɗ ngaya, a sam man ka beza a pa. Washkè deɓa, bidali Israel! Washkè a kokwar haha, man a ngaya!

²² Ka woy a ka shèwèlè a vara ta ahngwa, dem man a zlak na? Ndo nzi pèc pècèk a til skwi mɓuaʼa Tʼherkeda, ngwoz a woy a ta nzi a baki na.

Juda a nʼgots skwi na a deɓa

²³ Zhiklè bi mbiaʼa, Zhiklè Israel, a goɗ ar haha: Ta da gèɗè te Juda, te kokwar nengaʼa, aman i da helka ta ɓèlèlihi a deɓa, ma haha: Sam nʼnzi ngi zuraʼa, Ndo nzi pèc pècèk da pshè ka ma! Za nkezlaʼa!

²⁴ Juda da nza a pa, a kokwarhi nengaʼa tèlèba, a ndohi mpizhè, a ndohi tèlèba man ta lè rèwè.

²⁵ Aman ndav ndohi tèlèba i ga latsatsaʼa, a ndav tèlèba man nʼngeza, i pa ta a pa a ndav.

²⁶ Te deɓaʼa i slèmbèdè, a i rka: Nshu-nè ga a nciɗyè.

²⁷ Ndo nzi pèc pècèk a gaɗa: Patsaʼa a di a shkè, man i da zleki te Israel, te Juda, tser ndo, tser skwi dak.

²⁸ Lèmèlèmè ara man i gu maya, a i hel ta auda, a i kalde ta hai, a i gedas ta, a i zede ta, a i ga ta skwi ambaɓiaʼa, i da gi maya, te man i rèmèʼa, a i ngi a pa, Ndo nzi pèc pècèk a gaɗa.

²⁹ A pats nasa ta da gèɗè azɓai: Babhi ta ndau nyi wof nʼndhaɓiaʼa, a ndama ta daʼai a wudahai.

³⁰ Aman staɗ staɗ tèlèba a da metsi na a géɗ mali na; ko wawa a da ndi nyi wof nʼndhaɓiaʼa, a ndama na daʼai.

Nderzlè-ma mɓuaʼa

³¹ Na haha pats ngiɗè a di a shkè, Ndo nzi pèc pècèk a gaɗa, nga da derzlè ma mɓuaʼa a nda ndohi Israel a ndohi Juda.

³² Nderzlè-ma lèmèlèmè ara man a babhi ta ka ɓai, a pats man i hel ta, a i de ta auda te kokwar Egypte, tengaʼa man ta dzodzor nderzlè-ma ga ɓai, ko i bi ta, Ndo nzi pèc pècèk a gaɗa.

³³ Na haha nderzlè-ma man i da gi a ndohi Israel, te deɓ patshi sa, Ndo nzi pèc pècèk a gaɗa. I da va ta ma kita ga a ndav ta, i da windèʼa a ndav ta, i gi a Zhiklè ta, a tengaʼa ta ndi a ndohi ga.

³⁴ Ngidè a slebda na nslamagi na azɓai, kramam ngiɗè a slebda na kramam na azɓai, a ngaɗa: Va-sun Ndo nzi pèc pè-cèk! Aman tengaʼa tèlèba ta da senyè, ko nkèshèa, ko mbiaʼa, Ndo nzi pèc pècèk a gaɗa. Te deɓaʼa i da pra ta mphömè ta, i da hér mali tengaʼa asaɓai.

³⁵ Ndo nzi pèc pècèk a goɗ ar haha: Nengaʼa man a vi pats, a hél sam a pats, a til kia a bantihai, a ta hél sam a vad, nengaʼa a gidè iyam mbiaʼa, a hubètè tskuɗuf-tskuɗufaʼa, Zhiklè bi mbiaʼa, nasa nzlembaɗ na.

³⁶ Aman agassa skwi ntila a sam ga haha ngedas na, Ndo nzi pèc pècèk a gaɗa, – ko ndohi te verzi Israel ta da nzi a ndohi herkeda a sam ga asaɓai a mèdèp.

³⁷ Ndo nzi pèc pècèk a goɗ ar haha: Aman agassa ndo a slaha a nlivè giɗfek, aman ndo a slaha a nwuzhè verzi herkeda tʼhai, ar i slaha a i kwola ndohi te verzi Israel, a géɗ skwi tèlèba man ta gau, Ndo nzi pèc pècèk a gaɗa.

³⁸ Ndo nzi pèc pècèk a gaɗa: Pats ngiɗè dai, kokwar nɗaɗaya a pa zaʼa, a géɗ Ndo nzi pèc pècèk. A hinè a sam gi ngurèa man a Hananel, ha ndè a sam ntamagi kokwar ‘Zlogom’.

³⁹ Teɓa nlivè kokwar a dè zuraʼa a géɗ za Gareb, a shkè a deɓa a Goath.

⁴⁰ Te deɓaʼa slrats nʼndha a nckondohai a mèrwèc. Herkeda tèlèba, ha ndè a sam woyam Cédron, ha ndè a sam nderzlè ntamagi ‘plèsh’ te civèɗ mvèng pats, a gi a skwi nkezlaʼa man a Ndo nzi pèc pècèk. Ndo a da mbedè te deɓaʼa asaɓai, ndo a da gédèshè te deɓaʼa asaɓai.