Jérémie 30 - Ma Zhiklè

Zhiklè a pre ta ndohi auda

¹ Ma man Ndo nzi pèc pècèk a gaɗa na Jérémie:

² Ndo nzi pèc pècèk, Zhiklè Israel, a goɗ ar haha: Windo ma tèlèba man i gaɗa ka, a ɗèlèwèr,

³ aman patsaʼa a di a shkè, Ndo nzi pèc pècèk a gaɗa, man i da helka ta ndohi ga, man ta te ɓèlè, Israel a Juda, a deɓa a kokwar man i va ta babhi ta, a gi a skwi ta, Ndo nzi pèc pècèk a gaɗa.

⁴ Na haha ma man Ndo nzi pèc pècèk a ngaɗa na Israel a Juda:

⁵ Ndo nzi pèc pècèk a goɗ ar haha: Nga tsena ma mwuɗitpa, ma zlau, ma gumi ka ɓai.

⁶ Vo-dzhoɗo a kin wora: nguraʼa a ɗish kra ɗè? I rka ngurhi tèlèba, ri a godor, ara ngwoz man a ɗish kra èhèmè, a di tengaʼa a nʼngwode na.

⁷ Wobau! Pats mbiaʼa, ngiɗè ngar nengaʼa azɓai! Nlèyè mbiaʼa a sam Jacob; aman nengaʼa a da shkè auda te pa, a di a mbelda auda te pa.

⁸ A pats nasa, Zhiklè bi mbiaʼa a gaɗa, i da pasla wof te daʼai ngaya, a i da ngesla teɓa te sak ngaya, a ndohi verzi ngiɗè ta ga ka a ɓèlè asaɓai.

⁹ Ta da gi ɓèl Ndo nzi pèc pècèk, Zhiklè ta, a David, bi ta, man i ngotskoɗauda.

¹⁰ Aman ka, ka gu zlau ɓai, Jacob, ɓèl ga, Ndo nzi pèc pècèk a gaɗa. Israel, ka gudzu ɓai, aman i da mbelka ka dra, i da mbel ta ndohi te verzi ngaya te kokwar man ta te ɓèlè. Jacob a di a shkè deɓa, a nzi a gumai, skwa a ga na azɓai, ndo a pra na zlau a va azɓai.

¹¹ Aman i zhè a nda ka, aman i mbel ka, Ndo nzi pèc pècèk a gaɗa. Aman i da zede ta ndohi herkeda tèlèba, a sam man i ksar kinè a pa. Sèi ka, i da zede ka azɓai; aman i da slebda ka maya te kita, i slaha a i jè-kaha kita ngaya azɓai.

¹² Ndo nzi pèc pècèk a gaɗa: Mblè ngaya mwuɗitpa, skwi man a dza ka, a vata.

¹³ Ndo nʼnza ka a deɓa te kita ngaya, azɓai! A sam mblè, madzaf a zhè; aman ka, mblè ngaya a pkwè azɓai.

¹⁴ Mandalahi ngaya, man ta woy ka, ka pca ta a gèɗ. Ta hér ka azɓai, te man i tse ka ara ndo mayam; i ngatsa ka maya mwuɗitpa, a géɗ maharam ngaya mbiaʼa, a géɗ mali ngaya mwuɗitpa.

¹⁵ Ka kuɗi a géɗ mblè ngaya èhèmè? Skwi ndzi ngaya a til azɓai èhèmè? A géɗ maharam ngaya mbiaʼa, a géɗ mali ngaya mwuɗitpa i ga ka skwi aranta.

¹⁶ Aman ta tèlèba, man ta nde ka ma, ndohi ngiɗè ta da nde ta ma. Mayamhi ngaya tèlèba, a vava ta tèlèba, ta da gi ɓèlè. Ndohi man ta gu metsar a sam ngaya, metsar a da helama ta skwi ta. Ndohi man ta derde ka, i gi a ndohi ngiɗè ta derɗe ta lèmèlèmè arsa.

¹⁷ I da va ka madzaf, i da til mblè ngaya, Ndo nzi pèc pècèk a gaɗa, ka Sion man ta baha ka ‘ndzamaʼa’ – ‘nengaʼa man ndo a hérè azɓai’.

¹⁸ Ndo nzi pèc pècèk a gaɗa: Na haha i da helka ta ndohi ɓèlè te gi Jacob a deɓa, a gihi tengaʼa ta siyè te va. Ta da ɗèɗèy kokwar a pa, ta da gi gi bai a sam nhalaʼa.

¹⁹ Te pa dimèsh nslèbèrdè, ma nʼngwè-shè, a shkè auda. I gi a ta mènè a vata, ta mènèhi azɓai. I da nzal ta, ta derde ta azɓai.

²⁰ Wudahi tengaʼa ta da zhè ara halaʼa, a mpi ndohi tengaʼa ta da zlècè a sam ga. I da ga ta kita a ndohi tèlèba man ta ga ta wuɗai.

²¹ Bi tengaʼa a mshkè auda te tengaʼa, tsuvom tengaʼa a myu te pa. I gaɗa na: herdkay va, a nengaʼa a da herdkay va. Nherdkay va, man i gaɗa na ɓi wa? Ndo nzi pèc pècèk a gaɗa.

²² Kin da gi a ndohi ga, a iyè, i gi a Zhiklè kinè.

²³ Na haha ndombozlor Ndo nzi pèc pècèk: Skwi mwuɗitpa kalka ma, nara ndombozlor man a vitèma ta gèɗ a ndohi ambaɓihiaʼa.

²⁴ Nara ndzoan mbiaʼa. Ndav Ndo nzi pèc pècèk a mènèhi azɓai, ha a nrufa skwi na, ha a ngau skwi man a nhuro a nda giaʼa. A pats nʼndikèma skwai kin da cinèʼa.