Jérémie 3 - Ma Zhiklè

Israel a gi mphömè

¹ Zhiklè a gaɗa: Ndo man a kwola ngwoz na, a dè ngwoz a gi ndo ngiɗè, a slaha a ncè a deɓa a ngwoz na ɗè? Ngwoz matsa mphoma. Aman ka, Israel, ka woy baki tsaɗ tsaɗ, a ka slaha ka shkè a deɓa a sam ga dè?

² Pu di a zhiklè a ka rkaʼa. Ka phoma ɓi te mè? Ka pu va a zolom civèɗ, ara ndo Arabe tʼhèshèkèɗ. Ka gedassa herkeda a mphöme ngaya, a shèwa ngaya.

³ A iyam a ngakaɗa herkeda ɓai, iyam nzlekai mshkè ɓai. Di ngaya di fali ngwoz, ka woy a ka gi hori ɓai.

⁴ Tok tok haha ka bahayè: Bab ga! Ka woy iyè daga gola.

⁵ A da dza ka a ndav lèk lèk dè? Ka da gi ndav dekɗekaʼa dè? Ka gèɗè ar haha; te deɓaʼa ka gi skwi ambaɓiaʼa; ka gu skwi ngaya tèlè!

Zhiklè a verslè a Israel

⁶ Ndo nzi pèc pècèk a ngaɗayè, te va man Josias bai. Ka rka skwi man Israel, ngwoz man a nkwolyè, a gu ɗè? A mdo a géɗ zahi mbibihiaʼa tèlèba, a verzi wof ndizlimaʼa tèlèba, a ngu mphömè a pa.

⁷ I hur i gaɗa: Aman a da rufa skwi tèlèba ma, a da menkaɗa deɓa a sam ga; aman nengaʼa a mʼmenkaɗa deɓa ɓai. Juda, demam na, man nlèɓèslɓai, a nrkaʼa.

⁸ Nrkaʼa, i jèkeda Israel a géɗ mphömè nengaʼa tèlèba, a i va na ɗèlèwèr njèkè ngwoz. Aman Juda, man nlèɓèslɓai, nʼnga zlau ɓai. Nenga ba a mdo, a ngau mphömè.

⁹ Mphömè nengaʼa man a gau, a ngedassa kokwar, a ngu mphömè a kwa ba a wof ba.

¹⁰ Ar haha, Juda, demam na, man nlèɓèslɓai, a nʼngwodko ndav na a deɓa a sam ga tèlè ɓai, a goɗ a deɓa genè Ndo nzi pèc pècèk a gaɗa.

¹¹ Te deɓaʼa Ndo nzi pèc pècèk a ngaɗayè: Israel, man a njèkyè, dara nengaʼa a géɗ Juda nlèɓèslɓiaʼa.

¹² Do a ka boho ma haha a civèɗ ndè man a géɗèʼa: Israel, menkaɗa deɓa, Ndo nzi pèc pècèk a gaɗa. I woy a i pi di shèwa a ka ani asaɓai, aman ndo a siyè te va, Ndo nzi pèc pècèk a gaɗa. I gi ndav a mèdèp azɓai.

¹³ Aman a woy ka suna, ka gu malai, ka kwola Ndo nzi pèc pècèk, Zhiklè ngaya, a ka va na va ngaya a zhiklèhi ngiɗè, a verzi wof ndizlimaʼa tèlèba kin tsena ma ga ɓai, Ndo nzi pèc pècèk a gaɗa.

Jérusalem, sam-nʼnzi-bi Zhiklè

¹⁴ Kinè ndohi man kin kwolyè, va-menkaɗa deɓa, Ndo nzi pèc pècèk a gaɗa. Iyè, i bi kinè, I woy a i cè staɗ staɗ te kokwar staɗ staɗ tèlèba, a i hilè te verzi kinè tèlèba cèw cèw, a i de kinè a kokwar Sion.

¹⁵ I da va kinè ndohi mɓer kinè ara man ndav ga a woyaʼa. Ta da war kinè a maya, amba amba.

¹⁶ Te deɓaʼa, aman kin ga a vata, a kin mènè a vata te kokwar ma, a pats sa, Ndo nzi pèc pècèk a gaɗa, ta da slefi koti nderzlè-ma Ndo nzi pèc pècèk asaɓai, ta da hérèʼa asaɓai, a layda ta asaɓai, ta tilèʼa te deɓaʼa asaɓai.

¹⁷ A pats nasa, ta da baha na Jérusalem ‘sam nʼnzi bi Ndo nzi pèc pècèk’. Kokwar bihi tèlèba ta dè a ta ɓica va a pa, a Jérusalem, a sam nzlembaɗ Ndo nzi pèc pècèk, a ta jèjèr ndav tengaʼa man nsassaya asaɓai.

¹⁸ Te ndev nasa ndohi Juda ta da humdè va ta a ndohi Israel, a ta tsokolko va ta a deɓa te kokwar te man a géɗèʼa, a ta dè a kokwar man i va ta babhi ta a skwi nʼndi gi ta.

Ndohi ta ngwèdè ndav ta

¹⁹ Zhiklè a gaɗa: I woy a i fe ka a kra ga, a i va ka kokwar mbelaʼa; skwi nʼndi gi ngiɗè gar nengaʼa azɓai tʼherkeda. I hur i gaɗa: Kin da bahayè ‘Bab ga’, a kin da jèkyè asaɓai.

²⁰ Aman kin kwolyè, ara ngwoz man a nkwola baki na, kinè ndohi Israel, Ndo nzi pèc pècèk a gaɗa.

²¹ Fu zlembaɗ! Ndohi Israel ta kuɗai a géɗ za, te man ta beza a civèɗ ambaɓiaʼa. Ndo nzi pèc pècèk, Zhiklè tengaʼa, a mpca ta a géɗ.

²² Kinè ndohi man kin kwoiyè, vo-washkè, i woya a i til skwi man kin gedassaʼa! Ani nga zhè ma, nga shkè a sam ngaya, te man ka Ndo nzi pèc pècèk, Zhiklè nga.

²³ A vava nhèzlèwè a géɗ za, skwi nʼngwèdè ndo. A vava skwi mʼmbél Israel a zhè a sam Ndo nzi pèc pècèk, Zhiklè nga.

²⁴ Mʼmbèh skwi Baal man hori te pa a ngedassa skwi babhi nga, daga man nga kra, nda tambakihi a zlèhi a wudahi a dalahai.

²⁵ Gar haha ngo-nzokoya a ngo-cokoy hori ga, hori da pa nga a dai! Aman nga gu malai a sam Ndo nzi pèc pècèk, Zhiklè nga, nga a babhi nga, daga man nga kra, ha patsna, a nga fu zlembaɗ a ma Ndo nzi pèc pècèk, Zhiklè nga ɓai.