Jérémie 29 - Ma Zhiklè

Ɗèlèwèr a sam ndohi te ɓèlè

¹ Na haha ma ɗèlèwèr, man Jérémie, ndo nhadka ma, a nzlündo te Jérusalem, a sam ndohi nhalaʼa, njèkèɗiaʼa te va ndohi ɓèlè, a sam ndohi mvi skwi a Zhiklè, a sam ndohi nhadka ma, a sam ndohi tèlèba man Nebucadnetsar a hel ta te Jérusalem, a nde ta a Babylone,

² te deɓ man ta hel ta bi Jeconia a mam bai, a ntokotasl bihai, a wud bihai te Juda, te Jérusalem, a ndohi mbèzl wof, a ndohi mizlinè züdo, auda te Jérusalem.

³ A mva ta ɗèlèwèr a ri a Eleasa, kra Shaphan, a Guemaria, kra Hilkija, man Sédécias, bi Juda, a nzlinde ta a sam Nebucadnetsar, bi Babylone, te Babylone. Ɗèlèwèr a goɗ ar haha:

⁴ Zhiklè bi mbiaʼa, Zhiklè Israel, a goɗ ar haha, a ndohi tèlèba man i hel ta te Jérusalem, a ɓèlè, a kokwar Babylone:

⁵ Vo-rom gai, va-nza a pa! Va-gu gi lak, va-ndau nyi wof te pa!

⁶ Vo-co ngwoz, va-yu wudahi a dalahai! Va-hela ta ngwozi a wudahi kinè, va-pa ta dalahi kinè a ngwoz, a ta yi wudahi a dalahai! Va-zlazlama a ma ma te pa, va-mana a vata!

⁷ Va-tsu gumi te kokwar man i de kinè a ɓèlè a pa, va-tsu rai a géɗ nengaʼa a sam Ndo nzi pèc pècèk; aman te gumi nengaʼa kin ngècè gumai.

⁸ Zhiklè bi mbiaʼa, Zhiklè Israel, a goɗ ar haha: Ndohi nhadka ma man ta zhè te ndev kinè, ndohi mpi kwa kinè, da ngwoda kinè ɓai! Kin fu gèɗ a nshunè man a keɗa kinè ɓai!

⁹ Ta hadka kinè ncèkèlma, a nzlembaɗ ga. Iyè nzlinde ta ka ɓai, Ndo nzi pèc pècèk a gaɗa.

¹⁰ Ndo nzi pèc pècèk a goɗ ar haha: Aman mvi 70 klèng te Babylone, i dè a sam kinè, a i da gi a sam kinè ara ma ga mbelaʼa, a i da helka kinè a deɓa a haha.

¹¹ Aman iyè, i sun skwi man i hérè a géɗ kinè, Ndo nzi pèc pècèk a gaɗa; i hér gumai, matakwan ka ɓai; a i va kinè nshèffè a ma ma, a nzhèr skwi te ndav.

¹² Kin da dzhaɗyè, i da fi zlembaɗ a ma kinè; kin da tsi ri a iyè, i da mbeɗa kinè a ma;

¹³ kin da has-syè, a kin da ngatsyè, a géɗ man kin dzhadyè a ndav kinè tèlèba.

¹⁴ Kin da ngatsyè, Ndo nzi pèc pècèk a gaɗa. A i da helka ta ndohi ɓèlè a deɓa, a i da ɓicka kinè te va ndohi herkeda tèlèba, a sam tèlèba man i dzam kinè a pa, Ndo nzi pèc pècèk a gaɗa. Te deɓaʼa i da helka kinè a deɓa a sam man i hel kinè auda te pa.

¹⁵ A géɗ man kin gaɗa: Ndo nzi pèc pècèk a mva nga ndohi nhadka ma te Babylone,

¹⁶ Ndo nzi pèc pècèk a goɗ a géɗ bi man a géɗ sam nʼnzi bi David, a goɗ a géɗ ndohi tèlèba man ta zhè te kokwar haha; kramamhi kinè, man ta da a verzi kinè a ɓèlè ɓai.

¹⁷ Zhiklè bi mbiaʼa a goɗ ar haha: Na haha i zlindè tsakwal a mai a gidiɓèr a sam kinè. I da ga ta lèmèlèmè ara kslor ambaɓiaʼa, ambaɓiaʼa a vata, man amba a nʼndi ɓi sa.

¹⁸ I da hi a verzi ta a tsakwal, a mai, a gidiɓèr, i da ge ta a skwi man kokwar-bihi a gèɗ herkeda tèlèba ta gi zlau a pa, man ta gi wobau a géɗèʼa, a ta tsi derngasl, a ta gi horai a sam ndohi herkeda tèlèba, man i dzam ta a pa,

¹⁹ a géɗ man ta tsena ma ga ɓai, Ndo nzi pèc pècèk a gaɗa. I zlinde ta ɓèlèlihi ga, ndohi nhadka ma, man i zlinde ta, a ta wurra na va ngèɗè a prèk te gai, aman kin tsena ɓai, Ndo nzi pèc pècèk a gaɗa.

²⁰ Aman kinè, va-tsena ma Ndo nzi pèc pècèk, kin tèlèba, te ɓèlè, man bi Babylone a nhel kinè te Jérusalem.

²¹ Zhiklè bi mbiaʼa, Zhiklè Israel, a goɗ a géɗ Achab, kra Kolaja, a géɗ Sédécias, kra Maaséja, man ta hodko kinè ncèkèlma a nzlembaɗ ga: Iyè i da pe ta a ri Nebucadnetsar, bi Babylone, a da bazl ta a sam di kinè.

²² A géɗ tengaʼa ta da ngècè ma mphomdaʼa, ndohi ɓèlè Juda man ta zhè te Babylone tèlèba; ta gaɗa: Ndo nzi pèc pècèk da ga ka lèmèlèmè ara man a ga ta nda Sédécias a Achab, man bi Babylone a mpin ta te vogwa.

²³ A géɗ man ta gu skwi horai te Israel, ta gu mphömè a ngwoz nslamagi ta, ta goɗ ncèkèlma a nzlembaɗ ga, man i njè ta a gèɗ ka ɓai. Iyè i suna, i ndo malwuɗai, Ndo nzi pèc pècèk a gaɗa.

Ta mbeɗa na ma a ɗèlèwèr Jérémie

²⁴ Ka gaɗa na Shemaeja, ndo Néchélam:

²⁵ Zhiklè bi mbiaʼa, Zhiklè Israel, a goɗ ar haha: Ka zlündo ɗèlèwèr a nzlembaɗ ngaya, a sam ndohi tèlèba te Jérusalem, a Sophonie, kra Maaséja, ndo nhadka ma ba, a ndohi nhadka ma tèlèba, a ka gaɗa:

²⁶ Ndo nzi pèc pècèk a nge ka a ndo nhadka ma te di man a Jehojada, ndo nhadka ma, aman a ka gi a ndo nwèr ndohi nrzlaʼa te gi Zhiklè, man ta hodko ma, a ka da pe ta a dangai, a ka pa ta cèlèlèu a sak.

²⁷ Anai ka ga na ndzoan a Jérémie te Anathoth, man a hada kinè ma azɓi èhèmè?

²⁸ A zlinda nga maʼa a kokwar Babylone, man a gaɗa: Kin nzi kumba! Va-rom gai, va-nza a pa, va-gu gi lak, va-ndau nyièʼa!

²⁹ Sophonie, ndo nhadka ma, a njongo ɗèlèwèr haha a sam Jérémie, ndo nhadka ma.

³⁰ Ndo nzi pèc pècèk a ngaɗa na Jérémie:

³¹ Zlündo ɗèlèwèr a sam ndohi ɓèlè te Babylone tèlèba, a ka gaɗa: Ndo nzi pèc pècèk a goɗ a géɗ Shemaeja, ndo Néchélam: A géɗ man Shemaeja a nhodko kinè ma, iyè nzlinda ka ɓai, a gu aman a kin pu ndav a ncèkèlma,

³² a géɗ nengaʼa Ndo nzi pèc pècèk a gaɗa: Iyè i gi kita a géɗ Shemaeja, ndo Néchélam, a géɗ ndohi te verzi nengaʼa: Ndo azɓai te va gwoli na, man ta da nzi te ndev ndohi haha; nengaʼa a da rka skwi mbelaʼa man i ga ta ndohi ga azɓai, Ndo nzi pèc pècèk a gaɗa, a géɗ man a nju ma, a ndohi ta slambaɗa na va a Ndo nzi pèc pècèk.