Jérémie 28 - Ma Zhiklè

Hanania, ndo nhadka ncèkèlma

¹ Aman Sédécias, bi Juda, a hüno ngi bai, te mvi mafaɗaʼa, a ki 5, Hanania, kra Azzur, ndo nhadka ma man a zhè te Gabaon, a ngaɗayè te gi Zhiklè, a sam di ndohi mvi skwi a Zhiklè, a ndohi tèlèba:

² Zhiklè bi mbiaʼa, Zhiklè Israel, a goɗ ar haha: I pasla wof bi Babylone, man a kelawa ta a daʼai a ndohi Israel.

³ Njèkè mvi cèw, i da hulkoɗi kolongwi tèlèba, man Nebucadnetsar, bi Babylone, a nheldama, a nɗaʼa a kokwar Babylone, a deɓa a gi Zhiklè a haha.

⁴ A Jéconia, kra Jojakim, bi Juda, a ndohi Juda man ta de ta a ɓèlè a kokwar Babylone, i da helka ta a deɓa a haha, Ndo nzi pèc pècèk a gaɗa; aman i da pasla wof bi Babylone.

⁵ Aman Jérémie, ndo nhadka ma, a ngaɗa na Hanania, ndo nhadka ma, a sam di ndohi nhadka ma, a sam di ndohi tèlèba, man ta zlatsa te gi Zhiklè.

⁶ Jérémie, ndo nhadka ma, a ngaɗa: Amen! Ndo nzi pèc pècèk da gu arsa! Ndo nzi pèc pècèk da gu ara man ka hodko ma, da hulkoɗi kolongwi gi Zhiklè a ndohi man ta te ɓèlè, tèlèba a deɓa te Babylone, a haha.

⁷ Aman tsun ma haha mbelembela, man i gaɗa ka a zlembaɗ ngaya, a zlembaɗ ndohi tèlèba:

⁸ Ndohi nhadka ma man ta zhè, ga i shkè, ga ka shkè, daga halaʼa, ta hodko ma var, ma matakwan, ma gidiɓèr a herkeda kumba, a kokwarbihi mbibihiaʼa.

⁹ Ndo nhadka ma man a hodko ma gumai, a skwi man a hodko ma a géɗèʼa, a shkè, nengaʼa ndo nhadka ma man Ndo nzi pèc pècèk a nzlündo, a vava.

¹⁰ A Hanania, ndo nhadka ma, a nco wof nkelawa te daʼai Jérémie, ndo nhadka ma, a mpaslaʼa.

¹¹ Te deɓaʼa Hanania a ngoɗa a sam di ndohi tèlèba: Ndo nzi pèc pècèk a goɗ ar haha: Lèmèlèmè arsa, te deɓ mvi cèw, i da pasla wof bi Nebucadnetsar, bi Babylone, te daʼai ndohi herkeda tèlèba. Te deɓaʼa Jérémie, ndo nhadka ma, a ndo na.

¹² Ndo nzi pèc pècèk a ngaɗa na Jérémie, te deɓ man Hanania, ndo nhadka ma, a mpasla wof te daʼai Jérémie, ndo nhadka ma, a ngaɗa na:

¹³ Do a ka gaɗa na Hanania ar haha: Ndo nzi pèc pècèk a goɗ ar haha: Ka pasla wof nkelawa te daʼai: aman ka da gi ngiɗè te diaʼa, a züdo.

¹⁴ Zhiklè bi mbiaʼa, Zhiklè Israel, a goɗ ar haha: I da kelawa ta züdo a daʼai ndohi herkeda tèlèba, a ta gi ɓèl Nebucadnetsar, bi Babylone, a ta gi mizlinè nengaʼa. Ko skwi ndzham, i pa na a ri a nengaʼa.

¹⁵ Te deɓaʼa Jérémie, ndo nhadka ma, a ngaɗa na Hanania, ndo nhadka ma: Tsena mbelembela, Hanania! Ndo nzi pèc pècèk a nzlindka ka ɓai. Ka gu aman ndohi ta pi ndav a ka, a géɗ ncèkèlma ngaya!

¹⁶ Gar haha Ndo nzi pèc pècèk a gaɗa: Na haha i da zede ka Tʼherkeda. A vi na ka da metsi ngaya, a géɗ man ka hodko ma, a ndohi ta slambaɗa na va a Ndo nzi pèc pècèk.

¹⁷ A Hanania, ndo nhadka ma, a mʼmets na a vi sa, te ki matsaraɗaʼa.