Jérémie 27 - Ma Zhiklè

Wof nkelawa te daʼai man a Babylone

¹ Aman Jojakim, kra Josias, bi Juda, a hün ngi bai, Ndo nzi pèc pècèk a ngaɗa na ma haha a Jérémie.

² Ndo nzi pèc pècèk a gaɗa: Ngerzla teɓa, gau wof man ka pi a daʼai a zlè, kelawda a daʼai ngaya!

³ Te deɓaʼa zlündo a sam bi Edom, bi Moab, bi ndohi Ammon, bi Tyr a bi Sidon. Va ta a ri a ndohi sak ta man ta shkè a kokwar Jérusalem, a sam Sédécias, bi Juda.

⁴ A ka da va ta ma man ta menda ta bihi ta ar haha: Zhiklè bi mbiaʼa, Zhiklè Israel, a goɗ ar haha: Kin da gaɗa ta bihi kinè:

⁵ Iyè i gau herkeda, ndo a skwi dak man ta zhè a géɗ herkeda. I gau a ri man wuɗi na zhè, a i va na herkeda a ndo man i woyaʼa.

⁶ Anai i va na herkeda tèlèba a ri a Nebucadnetsar, bi Babylone, ɓèl ga, a skwi ndzham ba; i pa na a ri a nengaʼa.

⁷ Ndohi herkeda ta da gi mizlinè nengaʼa, a kra na, a kra kra na, ha tiɗè sam man ta da gi kita a géɗ herkeda nengaʼa, man ndohi herkeda kumba a bihi mbibihiaʼa ta da gia a ɓèl ta.

⁸ Ndohi herkeda, a kokwar-bai man ta da gi mizline Nebucadnetsar, bi Babylone, azɓai, man a woya a vi daʼai a hi a wof bi Babylone azɓai, i ga ta kita a kokwar ta a tsakwal, a mai, a gidiɓèr, Ndo nzi pèc pècèk a gaɗa, ha pats man i va na a ri ma.

⁹ Aman kinè, kin tsun ma ndohi nhadka ma kinè ɓai, ma ndohi mpi kwa kinè, ndohi maya kinè, ndohi kilèa, ndohi mʼmbèh skwai, man ta gaɗa kinè: kin da gi ɓèl bi Babylone asaɓai.

¹⁰ Ta hada kinè ncèkèlma, a kin dè dra a sam herkeda kinè, te man i da dzam kinè, a kin zi kinè.

¹¹ Aman herkeɗa man a da vi daʼai na a hi a wofhi Babylone, a gi ɓèl na, i da jèkeda Tʼherkeda na, Ndo nzi pèc pècèk a gaɗa, a da pi-zhèʼa, a da nzi a pa.

Juda a gi ɓèl Babylone

¹² A Sédécias, bi Juda, i gaɗa na ma haha: Va-feda wof bi Babylone a daʼai kinè, va-gu ɓèl na a ɓèl ndohi na, a kin nzi a nshèffè!

¹³ Kinè a ndohi ngaya kin da bèzl kinè te ri tsakwal a mai a gidiɓèr èhèmè, ara man Ndo nzi pèc pècèk a goɗ a géɗ ndohi herkeda man ta da gi ɓèl bi Babylone asaɓai?

¹⁴ Kin tsun ma ndohi nhadka ma man ta gaɗa kinè: Kin da gi ɓèl bi Babylone asaɓai, ɓai! Ta hadka kinè ncèkèlma.

¹⁵ I zlinde ta ɓai, Ndo nzi pèc pècèk a gaɗa. Ta hodko kinè ncèkèlma a a nzlembaɗ ga, a i da dzam kinè, a kin zi kinè, kinè a ndohi nhadka ma man ta hada kinè ma.

¹⁶ I gaɗa ta ndohi mvi skwi a-Zhiklè, a ndohi haha tèlèba: Ndo nzi pèc pècèk a goɗ ar haha: Kin tsun ma ndohi nhadka ma ɓai, man ta hodko kinè ma a ta gaɗa: Na haha, kolongwi gi Ndo nzi pèc pècèk anai a da hulkoɗa deɓa te Babylone ndul ndul. Ta hada kinè ncèkèlma.

¹⁷ Kin fu zlembaɗ ɓai! Va-gu ɓèl bi Babylone, a kin nzi a nshèffè: kokwar haha da gedas na èhèmè?

¹⁸ Aman agassa ta ndohi nhadka ma a vava, a ma Ndo nzi pèc pècèk a zhè a sam ta, ar ta tsi ri a Zhiklè bi mbiaʼa, a kolongwi a shkè auda te gi Ndo nzi pèc pècèk azɓai, a shkè auda te gi bi Juda, te Jérusalem, a dè Babylone, azbai.

¹⁹ Aman Zhiklè bi mbiaʼa a goɗ a géɗ sak gai, sam mpèn va, verzi kokwar, a njèkèɗi kolongwi man ta te kokwar haha:

²⁰ skwi man bi Nebucadnetsar, bi Babylone, a mhela ɓai, a pats man a nda Jeconia, kra Jojakim, bi Juda, te Jérusalem, a kokwar Babylone, a nda ndohi mbibihiaʼate Juda, te Jérusalem tèlèba.

²¹ Zhiklè bi mbiaʼa, Zhiklè Israel, a goɗ ar haha a géɗ kolongwi man ta jèkeda a gi Ndo nzi pèc pècèk, a gi bi Juda, te Jérusalem:

²² Ta da helda a kokwar Babylone, a ta da nzi te pa, ha pats man i shkè, Ndo nzi pèc pècèk a gaɗa – a i da helka ta a deɓa zaʼa a sam haha.