Jérémie 26 - Ma Zhiklè

Njè ma te gi Zhiklè

¹ Aman Jojakim, kra Josias, bi Juda, a hüno ngi hai, Ndo nzi pèc pècèk a goɗ ar haha.

² Ndo nzi pèc pècèk a gaɗa: Zlatsa a gala gi Zhiklè, a ka hodko ma a géɗ kokwar Juda tèlèba, man ta shkè, a ta tsi rai te gi Zhiklè. Gada ta ma tèlèba man i njè ka a gèɗ; ka jèkaha ɓai!

³ Wa ngiɗè ba ta da cinèʼa, a ta menkaɗa a deɓa, staɗ staɗ tèlèba a civèɗ tengaʼa ambaɓiaʼa; a skwi man ambaɓai man i hur i da giaʼa, a géɗ maya man ambaɓai man ta gau, i da gia azɓai.

⁴ Da gaɗa ta; Ndo nzi pèc pècèk a goɗ ar haha: Aman kin tsena ma ga ɓai, a kin jèjèr ma kita ga azɓai man i va kinè;

⁵ ma ɓèlèlihi ga, ndohi nhadka ma man iyè, i zlinde ta, a ta wurrkaɗa a va ngèɗè a prèk te gai, kin tsena ɓai, —

⁶ i da ngwèdè gi haha ara Silo, a i phomda kokwar haha, a gi a skwi mphomde ta ndohi herkeda tèlèba.

⁷ Ndohi mvi skwi a Zhiklè, ndohi nhadka ma, a ndohi tèlèba ta tsena ma Jérémie te gi Zhiklè.

⁸ Aman Jérémie a ngoɗ ma man Ndo nzi pèc pècèk a mva na, aman a ngaɗa ta ndohi tèlèba, klèng ma, ndohi mvi skwi a Zhiklè, ndohi nhadka ma, a ndohi tèlèba, ta gso, a ta gaɗa: Séi ka metsi ngaya!

⁹ Ka hodko ma a nzlembaɗ Ndo nzi pèc pècèk, a ka gaɗa: Gi haha a da gi lèmèlèmè ara Silo, kokwar haha a da gedas na, ndo a nzi a pa azɓai, èhèmè? A ndohi tèlèba ta humda na va a gèɗ a Jérémie te gi Zhiklè.

¹⁰ Wud bihi Juda ta tsena ma haha, ta shkèhi te gi hai, a gi Zhiklè, a ta tsomma a ma gi mɓuaʼa, te gi Zhiklè.

¹¹ A ndohi mvi skwi a Zhiklè, a ndohi nhadka ma, ta gaɗa ta wud bihai, a ndohi tèlèba: Sèi ta ga na kita mʼmetsai a gèɗ a ndo haha. Aman nengaʼa a nhodko ma a géɗ kokwar haha, ara man kin tsena a zlembaɗ kinè.

¹² Jérémie a ngaɗa ta wud bihi tèlèba, a ndohi tèlèba: Ndo nzi pèc pècèk a nzlindkayè, aman i hodko ma a géɗ gi haha, a géɗ kokwar haha, ma tèlèba man kin tsenaʼa.

¹³ Anai, va-tila civèɗ kinè, a skwi man kin giaʼa. Va-tsena ma Ndo nzi pèc pècèk, Zhiklè kinè. Te deɓaʼa ndav Ndo nzi pèc pècèk a da mènèhai, a gi skwi ambaɓiaʼa man a hodko ma a géɗ kinè azɓai.

¹⁴ Aman iyè ana, te ri kinè, va-gay ara man kin hur amba zuraʼa a sam di kinè!

¹⁵ Aman sèi va-suna, aman kin da kedyè, nshèffè ga haha man i ga mali te pa ɓai, a fa kinè mali a gèɗ a kinè, a kokwar haha, a ndohi haha, te man Ndo nzi pèc pècèk a nzlindkayè a sam kinè a vava, aman i da menda kinè ma haha tèlèba.

Jérémie a mbel na te mʼmetsai

¹⁶ Te deɓaʼa wud bihai a ndohi tèlèba ta gaɗa ta ndohi mvi skwi a Zhiklè, a ndohi nhadka ma: Nga ngela na kita mʼmetsai a gèɗ ndo haha azɓai; aman a nhodko nga ma Ndo nzi pèc pècèk, Zhiklè nga.

¹⁷ Te deɓaʼa ndohi ta slambaɗa, a ndohi nhalaʼa te va ndohi kokwar, ta gaɗa ta ndohi mɓicaʼa tèlèba:

¹⁸ Michée te Morésheth a nhodko ma te va man Ezéchias, bi Juda, a ngaɗa ta ndohi Juda tèlèba: Zhiklè bi mbiaʼa a gaɗa: Sion a da ndi a dak man ta pizhè te pa, a Jérusalem a di a mbeɗ na. Za gi Zhiklè a da ndi a hèshèkèɗ.

¹⁹ Ezéchias, bi Juda, a Juda tèlèba, ta keɗa Michée ɗè? Ezéchias a ngu zlau Ndo nzi pèc pècèk ka ɓi dè, a Ndo nzi pèc pècèk a nkeɗaha gèɗ ndzoan, a njèkeda skwi ambaɓiaʼa man a hodko ma a géɗ tengaʼa. A nga, nga woy a nga gi skwi ambaɓiaʼa a nga fi mali a gèɗ nga a vna dè?

²⁰ Ndo ngiɗè a nhodko ma a nzlembaɗ Ndo nzi pèc pècèk: Urie, kra Shemaeja, te Kirjath-Jearim. A nhodko ma a géɗ kokwar haha, a géɗ herkeda haha, ma tèlèba man Jérémie a goɗa.

²¹ Bi Jojakim a ndohi var nengaʼa a wud bihi tèlèba ta tsena ma nengaʼa, a bai a woya a nzede nshèffè na. Urie a ntsenaʼa, a ngu zlau, a mhu na a kokwar Egypte.

²² Aman bi Jojakim a nzlinde ta ndohi a kokwar Egypte: Elnathan, kra Achor, a ndohi ngiɗè a verzi nengaʼa, aman ta dè a kokwar Egypte.

²³ Ta ckoɗi Urie auda te kokwar Egypte, a ta daʼa a sam bi Jojakim, a nengaʼa a nkeɗaʼa a tsakwal, a nkalda nckondo nengaʼa a vèvèɗ ndohi kokwar.

²⁴ Aman Achikam, kra Shaphan, a ntakaha Jérémie, a ta va na a ri ndohi man ta keɗaʼa ɓai.