Jérémie 25 - Ma Zhiklè

Te ri bi Babylone

¹ Ma Zhiklè a sam Jérémie, a géɗ ndohi te Juda tèlèba, te va man Jojakim, kra Josias, a ngu bi te Juda, te mvi mafaɗaʼa. Mvi nshèlèkuraʼa, man Nebucadnetsar bi Babylone.

² Ma man Jérémie, ndo nhadka ma, a goɗ a géɗ ndohi te Juda tèlèba, a ndohi te kokwar Jérusalem tèlèba.

³ A hüno te mvi 13, man Josias, kra Amon, bi Juda, ha ndikèma patsna, mvi 23, man Ndo nzi pèc pècèk a gaɗayè genè, a gadayè genè, a i wurra na va ngèɗè a prèk te gai; aman kin tsena ɓai.

⁴ Ndo nzi pèc pècèk a nzlinda kinè ɓèlèlihi nengaʼa tèlèba, ndohi nhadka ma, a ta wurra na va nhèd ma a prèk te gai; aman kin tsena ɓai, kin fa ta zlembaɗ ɓai.

⁵ Ta gaɗa: Ko wawa te ndev kinè da menkada deɓa te civèɗ nengaʼa man ambaɓai, te maya nengaʼa man ambaɓai, a kin da nzi tʼherkeda man Ndo nzi pèc pècèk a va kinè, a va ta babhi kinè a mèdèp.

⁶ Kin dzodzor zhiklèhi ngiɗè ɓai, kin gu mizlinè tengaʼa ɓai, kin kalahi a deɓ sak tengaʼa ɓai, kin pokoy gèɗ ndav auda ɓai a skwi man kin gi a ri kinè; a i da ga kinè skwi ambaɓiaʼa azɓai.

⁷ Aman kin tsena ma ga ɓai, Ndo nzi pèc pècèk a gaɗa; kin pokoy gèɗ ndav auda a skwi man kin gu a ri kinè, a kin gedassa va kinè a vna.

⁸ Gar haha Zhiklè bi mbiaʼa a gaɗa: A géɗ man kin tsena ma ga ɓai,

⁹ na haha iyè i zlinde ndo, a sam Nebucadnetsar, bi Babylone, ɓèl ga, da helka ta ndohi gi tè-lèba te man a géɗèʼa, Ndo nzi pèc pècèk a gaɗa; a i zlinde ta, a ta da gi var a kokwar haha, a ndohi kokwar nengaʼa, a ndohi herkeda tèlèba man a tsagiaʼa. I da ga ta a skwi mphomdaʼa, i da pe ta a nlèyè, a ndohi ta ngwossaha ta. I da gedas ta a mèdèp.

¹⁰ I cèma ta mwuffè auda te ma, a dimèsh, a ntsima dalahai, a ntsima medemai, nhèzlèwè kwa vova, a skwi nhél sam pitirla a ndev na.

¹¹ Herkeda haha tèlèba a di a gédèsh na, a lèyè, a ndohi kokwar haha sèi ta gi ɓèl bi Babylone, mvi 70.

¹² Te deɓ mvi 70 sa, i da gi kita a géɗ bi Babylone, a géɗ ndohi kokwar haha ba, a géɗ mali ta, Ndo nzi pèc pècèk a gaɗa. Kokwar ndohi Chaldée, i da ndeda a dikai a mèdèp.

¹³ Ma tèlèba man i hodkoɗai a géɗ kokwar haha, aman i goɗ a géɗ nengaʼa halaʼa, ma tèlèba man mwindèa te ɗèlèwèr haha, man Jérémie a nhodko a géɗ ndohi herkeda tèlèba, i da giaʼa.

¹⁴ Aman tengaʼa ba, kokwar bihi mbibihiaʼa, a bihi mbibihiaʼa ta da ga ta ɓèlè. I da ga ta ara skwi man ta gau, ara man ri ta a ngau.

Kita a géɗ ndohi Tʼherkeda

¹⁵ Ndo nzi pèc pècèk, Zhiklè Israel, a ngaɗayè ar haha: Co kokwi man ndzoan nʼndha te pa ara zom, te ri ga, a ka va ta ndohi herkeda tèlèba, man i zlinde ka a sam ta, a ta siaʼa.

¹⁶ Ta da siaʼa, a ta da wush ta hai. Gèd ta a zi na, a géɗ tsakwal man i zlinda a sam ta.

¹⁷ A i co kokwi te ri Ndo nzi pèc pècèk, a i va ta ndohi herkeɗa tèlèba a ta siaʼa, ndohi man Ndo nzi pèc pècèk a nzlindyè a sam ta.

¹⁸ Jérusalem a kokwarhi Juda, a bihi na, a wud bihi na, man ta gedas ta, a ta zi ta, a ta tsa ta derngasl, a ta phomde ndo a vna, ara man a zhè a patsna.

¹⁹ Pharaon, bi Egypte, a ɓèlèlihi na, wud bihi na, a ndohi nengaʼa tèlèba.

²⁰ Kokwar Arabe, a bihi kokwar Uts, a bihi kokwar Philistie: Askalon, Gaza, Ekron, a njèkèdiaʼa te Asdod.

²¹ Edom a Moab, a wudahi Ammon.

²² Bihi Tyr tèlèba, bihi Sidon tèlèba, bihi herkeda nte ndev iyam, a wud iyam mbiaʼa tèlèba.

²³ Dedan, Théma, Buz, a ndohi tèlèba man ta shè perbazlazlam.

²⁴ Bihi Arabe tèlèba, a bihi Arabe tèlèba man ta nza tʼhèshèkèɗ.

²⁵ Bihi Zimri tèlèba, bihi Elam, bihi Médie,

²⁶ bihi te man a géɗèʼa, ko ndul ndul ko dra, ngiɗè a sam ngiɗè, kokwar-bihi Tʼherkeda tèlèba man ta zhè a géɗ herkeda. Te deɓ tengaʼa bi Babylone a da siaʼa.

²⁷ Ka da gaɗa ta: Zhiklè bi mbiaʼa, Zhiklè Israel, a goɗ ar haha: Va-sau, da keɗe kinè ara zom, va-vünèho, va-kalahai, kin slambaɗa ɓai, a sam tsakwal man i zlinda a sam kinè.

²⁸ Aman ta da woya ɓai, a ta cè kokwi te ri ngaya a ta sia azɓai, ka da gaɗa ta: Zhiklè bi mbiaʼa a gaɗa: Sèi kin sia ndèzl!

²⁹ Aman i hinè ngi skwi ambaɓiaʼa te kokwar man ta baha na a nzlembaɗ ga; a kinè, i ga kinè kita azɓi ɗè? Aʼai, kin ngècè kita genè; aman i zlinde tsakwal a sam ndohi herkeda tèlèba, Zhiklè bi mbiaʼa a gaɗa.

³⁰ Ka, hodko ma haha tèlèba a géɗ tengaʼa: Ndo nzi pèc pècèk a vèd htsan te géɗèʼa, a sam nʼnzi nkezlaʼa, a véɗ htsan a géɗ gi na, a nguzlai ara ndohi man ta kèl skwi te klok.

³¹ Wobau kala a verzi herkeɗa ma: Ndo nzi pèc pècèk a gi kita a ndohi herkeda ma, a hin kita a géɗ ndohi tèlèba. Ndohi ambaɓihiaʼa, a pe ta a ma tsakwal, Ndo nzi pèc pècèk a goɗ ar haha.

³² Zhiklè bi mbiaʼa a gaɗa: Skwi ambaɓiaʼa a zlèzlèmè a géɗ ndohi herkeda a ma ma, ara ndombozlor man a tèuda herkeda.

³³ Ndo nzi pèc pècèk a da bazl ta ndohai a pats nasa, a hinè te verzi herkeda ngiɗè, a ndè a verzi herkeda ngiɗè. Ta kuɗi a géɗ tengaʼa azɓai, ta hel ta azɓai, ta re ta a vèvèɗ azɓai, ta da gi a ndaderɗa herkeda.

Zhiklè a gedassa ndohi mɓer ndohai

³⁴ Ndohi mɓer ndohai, vo-ngoy va, va-gu wobau, va-zlur va Tʼherkeda, kinè tsuvom ndohai; aman pats mbèzl kinè kalka ma, a kin zi kinè. I da bazl kinè ara shiɗèf mbelaʼa.

³⁵ Te deɓaʼa sam man ndohi mɓer ndohai ta hi a pa, a zi na. Sam tsuvom ndohai nlèaʼa, klèng.

³⁶ Ndohi mɓer ndohai ta gi wobau. Tsuvom ndohai ta kuɗai. Aman Ndo nzi pèc pècèk a gedassa sam nʼnzi ta.

³⁷ Gi man gumi te pa te va nasa, ngedas na a géɗ ndzoan Ndo nzi pèc pècèk mbiaʼa.

³⁸ Ta hi ta, ara kra marizhèlè man a shkè auda te gi na; aman kokwar ta a nde na hèshèkèɗ, a géɗ wuɗi ndo ngedassa skwai, a géɗ ndzoan nengaʼa mbiaʼa.