Jérémie 24 - Ma Zhiklè

Kslor mbelaʼa, kslor ambaɓiaʼa

¹ Ndo nzi pèc pècèk a ngray skwi haha: gadagar cèw a kslor te pa a ma gi Zhiklè. Nasa te deɓ man Nebucadnetsar, bi Babylone, a nʼnde ta nda Jeconia, kra Jojakim, bi Juda, a wud bihi Juda, a ndohi mbèzl wof, a ndohi mizlinè züdo, a kokwar Babylone, a ɓèlè, dra a Jérusalem.

² Gadagar staɗ, kslor mbelaʼa te pa, ara tsuvomhi kslor. Kslor ngiɗè ambaɓai, amba a nʼndi ɓai.

³ Ndo nzi pèc pècèk a ngaɗayè: Jérémie, ka rka mè? I gaɗa: Kslor! Kslor mbelaʼa, ta amba, a vata. Kslor ambaɓiaʼa, ta ambaɓi, a vata, ta amba a nʼndi ɓai.

⁴ Te deɓaʼa Ndo nzi pèc pècèk a ngaɗayè:

⁵ Ndo nzi pèc pècèk, Zhiklè Israel, a gaɗa: Ndohi Juda man ta te ɓèlè, man i dzam ta auda a sam haha, a kokwar ndohi Chaldée, ta ambahayè lèmèlèmè ara kslor mbelaʼa.

⁶ I da pa ta dai, a pombai, a i da helka ta a deɓa a kokwar haha. I da til ta zaʼa, i da gedas ta asaɓai. I da nge ta a pa, i ptska ta auda te pa asaɓai.

⁷ I da va ta ndav, aman ta senyè, i Ndo nzi pèc pècèk. Ta da gi a ndohi ga, a iyè, i ndi a Zhiklè ta, a ta da menkaɗa deɓa a sam ga a ndav tengaʼa tèlèba.

⁸ Kslor man ambaɓai, amba a nʼndi ɓai, Ndo nzi pèc pècèk a gaɗa: I da gi arsa a sam Sédécias, bi Juda, a wud bihi na, a njèkèdi ndohi Jérusalem, tengaʼa man ta nza te kokwar haha, a tengaʼa man ta nza te kokwar Egypte.

⁹ I da ge ta a skwi horai, a matakwan te kokwar-bihi tʼherkeda tèlèba, a skwi ngedassaʼa, a njèkenè, a derngasl, a skwi mphomdaʼa a sam tèlèba man i da dzam ta a pa.

¹⁰ I da zlinde tsakwal a sam ta, a mai, a gidiɓèr, ha ta ndev ta Tʼherkeda man i va ta, a i va ta babhi ta.