Jérémie 23 - Ma Zhiklè

Njèkèɗi ndohi ta shkè a deɓa

¹ Wobau a géɗ ndohi mɓer ndohi Zhiklè, man kin zeda a kin ksar ta ndohi ga, Ndo nzi pèc pècèk a gaɗa.

² Gar haha Ndo nzi pèc pècèk, Zhiklè Israel, a goɗ a géɗ ndohi mɓer ndohi Zhiklè, man ta wèr ndohi ga: Kin ksar ta ndohi ga, kin dzam ta, kin war ta bai. Na haha i gi kita a géɗ kinè, a géɗ maya man ambaɓai man kin gau, Ndo nzi pèc pècèk a gaɗa.

³ Aman iyè, i da ɓicka ta njèkèdi ndohi ga te verzi herkeda, a sam man i dzam ta a pa, a i da helka ta a deɓa a sam nʼnzi ta. Ta da yi wuda, a ta mènè a vata.

⁴ I da va ta ndohi mɓer ndohai man ta war ta: ta da gi zlau asaɓai, skwa a pra ta zlau a va asaɓai, ndo man a ze na ba, azɓai, Ndo nzi pèc pècèk a gaɗa.

⁵ Na haha patsaʼa a di a shkè, Ndo nzi pèc pècèk a gaɗa, i da ngotsko bi nzuraʼa auda te verzi David; a da gi hai, a da gi mizlinè a maya, a da bèzlè kita zuraʼa te kokwar.

⁶ A pats man a da gi bai, Juda a mbel na, Israel a nzi a gumai. Ta da baha na a nzlembaɗ: Ndo nzi pèc pècèk, ngi-zura nga.

⁷ Gar haha pats ngiɗè a di a shkè, Ndo nzi pèc pècèk a gaɗa, a ta gèɗè azɓai; Zhi-klè a zhè a nshèffè, nengaʼa man a nhelka ta ndohi Israel auda te kokwar Egypte.

⁸ Aman ta gèɗè: Ndo nzi pèc pècèk a zhè a nshèffè, nengaʼa man a nhelka ta ndohi te verzi Israel auda te kokwar te man a géɗèʼa, te kokwar tèlèba man a dzam ta a pa, a ta da nzi a herkeda ta.

Ma a géɗ ndohi nhadka ma

⁹ A géɗ ndohi nhadka ma: Ndav ga mʼmbeɗ na, a mpaslay vatasl a va. Iyè ara ndo zom, ara ndo man zom a keɗaʼa, a géɗ Ndo nzi pèc pècèk, a gèɗ zlau ma nengaʼa nkezlaʼa.

¹⁰ Aman herkeda nʼndha a mphöme. Kokwar mphomda a géɗ nengaʼa, a lèyè. Sam nɗaʼa tʼhèshè-kèɗ ngwora. Nshèffè tengaʼa, maya man ambaɓai. Ta manda ndav ta a verzi skwi nzura ka ɓai.

¹¹ Ndo nhadka ma, a ndo mvi skwi a Zhiklè cèw ba, ta ndohi nʼngwèdè ndo, maya tengaʼa man ambaɓai i ngotso, ko te gi ga ba, Ndo nzi pèc pècèk a gaɗa.

¹² Gar haha civèɗ tengaʼa a da slafadama ta sak te ruva: kwa a da tsama ta sak, a ta wush ta hai, aman i da ngwoda ta mali ta a gèɗ, tʼhwaɗ mvi kita ta, Ndo nzi pèc pècèk a gaɗa.

¹³ I rka skwi nrzla a sam ndohi nhadka ma te Samarie: ta hodko ma a nzlembaɗ Baal, a ta zlakede ta ndohi Israel, ndohi ga.

¹⁴ I rka skwi horai a sam ndohi nhadka ma te Jérusalem: ta gi mphömè, ta cèkèl ma. Ta ndha ri ndohi malihai, ta woya ndo da menkada deɓa te mali na bai. Ta tèlèba ta ga ara Sodome a sam di ga, lèmèlèmè ara ndohi kokwar Gomorrhe.

¹⁵ Gar haha Zhiklè bi mbiaʼa a goɗ a géɗ ndohi nhadka ma: Iyè i da va ta skwi nsi mwuɗitpa, i da va ta iyam man dèrè te pa. Aman ma nʼngwèɗè ndo te kokwar tèlèba a shkè auda te ndohi nhadka ma te Jérusalem.

¹⁶ Zhiklè bi mbiaʼa a goɗ ar haha: Kin tsun ma ndohi nhadka ma bai, man ta hadka kinè ma: ta ngwode kinè, ta hodko kinè skwi ndav ta, ma Ndo nzi pèc pècèk ka hai.

¹⁷ A ndohi man ta derɗyè, ta gaɗa ta: Ndo nzi pèc pècèk a ngoɗo: gumi a nda kinè! A ndohi tèlèba man ta sassaya ndav ta, ta gaɗa: Skwi mwuɗitpa a da ga kinè azɓai.

¹⁸ Aman te va tengaʼa nʼnza a sam ncèmma Ndo nzi pèc pècèk wa, aman a da rka, a tsena ma nengaʼa? Nfu zlembaɗ a ma nengaʼa, ntsena ma nengaʼa wa?

¹⁹ Na haha ndombozlor Ndo nzi pèc pècèk: Ndzoan nengaʼa a nslambaɗa, a vitèma ta gèɗ a ndohi ambaɓihiaʼa.

²⁰ Ndo nzi pèc pècèk a gi ndav, ndav nengaʼa a mènèhi azɓai, ha a rufa skwi na, a nʼnga skwi man a nhuro. A pats nʼndikèma skwai kin da cinè zuraʼa.

²¹ Iyè nzlinde ta ndohi nhadka ma ka ɓai; aman tengaʼa a nhau a ri ta. Iyè ngaɗa ta ka bai; aman tengaʼa ta hodko ma a ri ta.

²² Aman agassa ta nza a sam ncèmma ga, ar ta menda ta ma ga a nɗohi ga, a ta helka ta a deɓa a civèɗ tengaʼa man ambaɓai, te maya tengaʼa man ta gu ambaɓai.

²³ Ndo nzi pèc pècèk a gaɗa: I Zhiklè man i ndul ndul genè ɗè, dè Zhiklè ndra ka bi dè?

²⁴ Aman ndo ngiɗè a ngheda va, i rka bi dè? I ndha giɗfèk a herkeda ka ɓi dè, Ndo nzi pèc pècèk a gaɗa.

²⁵ I tsena ma ndohi nhadka ma man ta hodko ma ncèkèlma a nzlembaɗ ga, a ta gaɗa: Nshunè a nkeɗyè, nshunè a nkeɗyè!

²⁶ Te va ndohi nhadka ma, ndohi nhadka ncèkèlma ta zhè, ta ahngwa? A ta hodko ncèkèlma te ndav ta?

²⁷ Tengaʼa ta hur ta da gi, a nzlembaɗ ga a pca ta a gèɗ a ndohi ga, a maya nshun ta, man ngiɗè a njè na a ngiɗè; lèmèlèmè ara babhi ta, man nzlembaɗ ga a mpca ta a gèɗ, a géɗ Baal.

²⁸ Ndo nhadka ma man nshunè a nkeɗaʼa, a njè ma nshun sa. Aman ndo man a nʼngots ma ga, a gèɗè ma ga zuraʼa. Kuza a dau ta lèmdè va te mè? Ndo nzi pèc pècèk a gaɗa.

²⁹ Ma ga nara vogwa, ara züdo man a pèslè kwa ka ɓi dè? Ndo nzi pèc pècèk a gaɗa.

³⁰ Gar haha ndohi nhadka ma ta ambahayè ɓai, Ndo nzi pèc pècèk a gaɗa, man ta ngwèdè ma ga a ncèkèlma, ngiɗè a sam ngiɗè.

³¹ Ndohi nhadka ma ta ambahayè ɓai, Ndo nzi pèc pècèk a gaɗa, man ta gèɗè ma ta, a ta gaɗa: ma Ndo nzi pèc pècèk.

³² Ndohi nhadka nshunè ncèkèlma, ta ambahayè hai, Ndo nzi pèc pècèk a gaɗa, man ta njè ta ncèkèlma a nfi va tengaʼa, a ta zlakede ta ndohi ga. Iyè nzlinde ta ka ɓai, iyè ngaɗa ta ka ɓai. Ta takaha ta ndohi haha ɓai, ko kèshkata, Ndo nzi pèc pècèk a gaɗa.

Zhiklè a gi ndzoan

³³ Aman ndohi haha ta da dzhaɗ ka, man ɓai ndo nhadka ma, man ɓai ndo mvi skwi a Zhiklè, a ta gaɗa: Ndo nzi pèc pècèk a gi ndzoan a géɗ mè? Ka da gaɗa ta: A gi ndzoan a géɗ kinè! I da kwol kinè, Ndo nzi pèc pècèk a gaɗa.

³⁴ Ndo nhadka ma, ndo mvi skwi a Zhiklè, ndohi man ta gaɗa: Ndo nzi pèc pècèk a gi ndzoan a géɗ mè? I da ga na kita a gèɗ a ndo sa, a ndohi gi na.

³⁵ Gar haha kin da gèɗèʼa, ko wawa a gèɗè a sam nslamagi na, a sam kramam na: Ndo nzi pèc pècèk a gaɗka ka ma mè? Ndo nzi pèc pècèk a mbeɗka ka a ma kè?

³⁶ Aman skwi man Ndo nzi pèc pècèk a gi ndzoan a géɗèʼa, kin da slefu te deɓaʼa asaɓai; ma man a shkè auda te ma ndo staɗ staɗ tèlèba, a ngwoda ta va a gèɗ. Kin terɗa ma Zhiklè man a zhè a nshèffè, Zhiklè bi mbiaʼa, Zhiklè nga.

³⁷ Gada na ndo nhadka ma ar haha: Ndo nzi pèc pècèk a mbeɗka ka a ma kè? Ndo nzi pèc pècèk a gaɗka ka mè?

³⁸ Aman kin gaɗa: A géɗ ndzoan Ndo nzi pèc pècèk! Ko i zlinde ndo a sam kinè, da gaɗa kinè: Ndzoan Ndo nzi pèc pècèk, da goɗ ɓai!

³⁹ A géɗ nengaʼa iyè, i hér kinè asaɓai, a i kwol kinè, lèmèlèmè kokwar man i va kinè, a kinè a babhi kinè.

⁴⁰ A i va kinè skwi ngedas kinè a mèdèp, skwi hori a mèdèp, man a da pca ta a gèɗ asaɓai.