Jérémie 22 - Ma Zhiklè

¹ Ndo nzi pèc pècèk a goɗ ar haha: Do a hai a gi bi Juda, te pa ka da gaɗa na ma haha!

² Goɗo: Bi Juda, tsena ma Ndo nzi pèc pècèk, ka man ka nza a géɗ sam nʼnzi bi David. Kinè a ɓèlèlihi ngaya a ndohi ngaya man kin bizhè a ntamagi haha!

³ Ndo nzi pèc pècèk a goɗ ar haha: Va-gu kita zuraʼa, va-mbela ndo man ndo ambaɓiaʼa a nʼnga na wuɗai, auda te ri nengaʼa! Ndo mbrok, kra dikai, ngwoz mazai, kin ga ta matakwan ɓai, kin ga ta wuɗi ɓai, kin keɗa ndo man nʼnga mali ɓai a sam haha ɓai!

⁴ Aman kin da gi ar haha, bihi man ta nzi a géɗ sam nʼnzi bi David ta da bizhè a ntamagi kokwar haha, ta nzi a kikai, a ta nzi a deɓ plèsh, nengaʼa a ɓèlèlihi nengaʼa a ndohi nengaʼa.

⁵ Aman kin da tsena ma haha ɓai, iyè i mbèɗè te ma ga, Ndo nzi pèc pècèk a gaɗa, gi haha da gedas na!

⁶ Aman Ndo nzi pèc pècèk a goɗ a géɗ ndohi gi bi Juda: Kinè ambahayè, ara Galaad; kinè ambahayè ara Liban! Ko gar haha i ngwoda kokwar kinè a hèshèkèɗ, a kokwar man ndo a nzi a pa azɓai.

⁷ I bahka ta ndohi ngédèshè skwai a sam kinè, staɗ staɗ tèlèba a skwi var na: ta da ngél wof tsna mbelaʼa, a ta da wusheda a vogwa.

⁸ Te deɓaʼa ndohi herkeda kumba ta da bizhè a tsagi kokwar haha, a ndohi ta da gèɗè a va ta: Ndo nzi pèc pècèk a gu a sam kokwar mbiaʼa haha aranta èhèmè?

⁹ A ta da gèɗèʼa: A géɗ man ta jèkeda nderzlè-ma Ndo nzi pèc pècèk, Zhiklè ta, a ta kalahi a deɓ sak vrihi a ta gu mizlinè ta.

A géɗ Shallum

¹⁰ Kin kuɗau a géɗ ndo mʼmetsa ɓai, kin loyo nengaʼa ɓai! Aman va-kuɗau a géɗ nengaʼa man kal na, a da shkè a deɓa asaɓai, a da rka kokwar bab na te deɓaʼa asaɓai.

¹¹ Aman Ndo nzi pèc pècèk a goɗ ar haha a géɗ Shallum, kra Josias, bi Juda, man a ngu bai te di man a Josias, bab na: Ndo man a shkè auda a sam haha, a da shkè a deɓa a pa azɓai;

¹² aman a sam man ta da a ɓèlè, a da metsi a pa, a da rka kokwar haha te deɓaʼa asaɓai.

A géɗ Jojakim

¹³ Wobau a géɗ ndo man a rèm gi nengaʼaaskwi nzurakaɓai, a til gi naamalai, a jhèɗè nslamagi na man a ga na mizlinè ambalai, a mva na skwi ntul na ɓai!

¹⁴ Nengaʼa man a gaɗa: I woya a i gi gi ga mbiaʼa, man sam a zhè a vata! I viɗèʼa a züdo, i slekaɗaʼa a slaha, nvakavar mwinèʼa.

¹⁵ Ka gi bai a géɗ man ka woy gi mbelaʼa ɗè? Bab ngaya a nʼnda skwai, a nsa skwi ɓi ɗè? A wuffè a géɗèʼa. Aman nengaʼa a ngau kita zuraʼa.

¹⁶ A nʼnga ta kita a ndohi ntawassaʼa, a ndohi man ta ga mali ɓai, a wuffè a vna. Nasa nshin Zhiklè ka bi dè? Ndo nzi pèc pècèk a gaɗa.

¹⁷ Aman ka, ka pi dai a ka pi ndav ngaya a mali genè, aman ka keɗa ndo man a nga mali ɓai, ka ga ta matakwan, ka ga ta shèwa.

¹⁸ Gar haha Ndo nzi pèc pècèk a goɗ a géɗ Jojakim, kra Josias, bi Juda: Woba kramam ga! Woba kramam ga! Ta da kuɗi a géɗ nengaʼa azɓai. Woba bi ga! Woba bi ga! Ta da kuɗi a géɗ nengaʼa azɓai.

¹⁹ Ta da riaʼa ara kɗèh, ta da ngezldauda a ta kalda a dalmagi kokwar Jérusalem.

A géɗ Jérusalem

²⁰ Do za Liban, a ka gu wobau, boho a géɗ Basan! Gu wobau a géɗ za Abarim! Aman ndohi tèlèba man ta woy ka, ta gedas ta ma.

²¹ I gaɗa ka a pats man ka wèl va dai, a ka gaɗa: i cinè azɓai. Ka gu arsa te gol ngaya, ka tsena ma ga ɓai.

²² Ndohi nwèr skwi ngaya, kozlar a da hel ta ma; a ndohi man ta woy ka, ta da gi ɓèlè. Te deɓaʼa ka ngècè hori a dai, gèɗ ngaya ndzakaɓa te ri mali ngaya tèlèba.

²³ Ka man ka nza a géɗ Liban, man sam nʼnzi ngaya a zhè te va wof tsna. Ka da gi wobau, aman matakwan a shkè, ka da ɗish va lèmèlèmè ara ngwoz man a woy nyi kra.

A géɗ Jeconia

²⁴ I zhè a nshèffè, Ndo nzi pèc pècèk a gaɗa. Aman Jeconia, kra Jojakim, bi Juda, a zhè nara tèslri te ri mandi ga, i da cka ka auda te pa,

²⁵ a i da va ka a ri ndohi man ta woy a ta zede nshèffè ngaya, a ri ndohi man ka gi zlau ta, a ri a Nebucadnetsar, bi Babylone, a ri ndohi Chaldée.

²⁶ Te deɓaʼa i da wushede kinè, a nda mam ngaya nyaka ka, a herkeda ngiɗè, man kin ya a pa ka ɓai, kin da metsi a pa.

²⁷ Kokwar man mpataka a keɗ ta, a ta woy a ta shkè a deɓa a pa, ta da shkè a deɓa asaɓai.

²⁸ Jeconia, ndo haha, shidèf ambaɓiaʼa, mbazlaʼa dè? Shidèf man ta kwola dè? Ta kwol ta èhèmè, nengaʼa a ndohi te verzi nengaʼa? Ta wushede ta a herkeda man ta sun ɓi èhèmè?

²⁹ Herkeda, herkeda, herkeda, tsena ma Ndo nzi pèc pècèk!

³⁰ Ndo nzi pèc pècèk a goɗ ar haha: Va-windo nzlembaɗ ndo haha, wuɗi na azɓai, a wèl va azɓai, skwi a shkè auda te verzi nengaʼa azɓai, a da nzi a géɗ sam nʼnzi bi David azɓai, a gi bi te Juda asaɓai.