Jérémie 21 - Ma Zhiklè

Nshèffè, man ɓai mʼmetsai

¹ Ma man Ndo nzi pèc pècèk a gaɗa na Jérémie, te va man bi Sédécias a nzlündo Pashur, kra Malkija, a Sophonie, kra Maaséja, ndo mvi skwi a Zhiklè, a sam na, a ngaɗa na:

² Dzhaɗa nga Ndo nzi pèc pècèk, te man Nebucadnetsar, bi Babylone, a gi var a nga. Wa ngiɗè ba, Ndo nzi pèc pècèk a da gi nrkedi na a sam nga, a nengaʼa a dè na auda a sam nga.

³ Jérémie a ngaɗa ta: Kin da gaɗa na Sédécias ar haha:

⁴ Ndo nzi pèc pècèk, Zhiklè Israel, a goɗ ar haha: Na haha, i woya a i ngwoda kinè skwi var te ri kinè a gèɗ, man kin gi var a vna a bi Babylone, a ndohi Chaldée ta nza kinè a ma tʼwud zlazlar kokwar. A i da ɓicka ta a ndev kokwar haha.

⁵ Iyè a ri ga i da gi var a kinè, a ri ga ngedaʼa, a ri man wuɗi na zhè, a ndav a ndzoan a shèwa mbiaʼa;

⁶ a i da tsi ndohi kokwar haha, a gidiɓèr a da hel ta ndohai a skwi gai a ma.

⁷ Ndo nzi pèc pècèk a gaɗa: Te deɓaʼa i da pe ta Sédécias, bi Juda, ɓèlèlihi nengaʼa, a ndohai, man ta mbelka ta auda te ri gidiɓèr, te ri tsakwal a mai, a ri a Nebucadnetsar, bi Babylone, a ri a mayamhi tengaʼa, a ri a ndohi man ta woy a ta zeda nshèffè ta. Ta da bazl ta a tsakwal, ta da hi azɓai, ta si ndo te va azɓai, ta pre ta azɓai.

⁸ Ka da gaɗa ta ndohi haha: Ndo nzi pèc pècèk a goɗ ar haha: Na haha i ngra kinè civèɗ nshèffè, a civèɗ mʼmetsai:

⁹ Ndo man a da nzi te kokwar haha, a da metsi na te ri tsakwal, a mai, a matakwan. Aman ndo man a dè auda, a vi va na a ri a ndohi Chaldée, man ta nza kinè a ma, a da nzi a nshèffè, a da mbél nshèffè na.

¹⁰ Aman i pi di a kokwar haha, a i faha ta matakwan, i va ta manam ka ɓai, Ndo nzi pèc pècèk a gaɗa. I pe ta a ri a bi Babylone, a nengaʼa a da fa na vogwa, a kokwar.

Juda ta derzlè ma a Zhiklè

¹¹ Gada ta ndohi bi Juda: Va-tsena ma Ndo nzi pèc pècèk!

¹² Ndohi gi David, Ndo nzi pèc pècèk a goɗ ar haha: Va-gu kita a prèk langa, va-mbela ndo man ndo ambaɓiaʼa a nga na wuɗai, auda te ri nengaʼa; man ɓai ndzoan ga a shkè auda ara vogwa, a da ndeda skwi a ma, ndo mʼmbècè azɓai, a géɗ maya kinè man ambaɓai.

¹³ Anai i zhè a sam ngaya ma, kokwar a vara — a geɗ pra man a vara — Ndo nzi pèc pècèk a gaɗa. Kinè man kin gaɗa: Nshkè a nda kala nga a va wa? Nda shkè a gi nga ndakmaʼa ma wa?

¹⁴ I da ga kinè ara skwi man ambaɓai man kin gau, Ndo nzi pèc pècèk a gaɗa; i da fa na vogwa a sam nhèyè-wof kinè, a da ndeda sam a tsagiaʼa tèlèba a ma.