Jérémie 20 - Ma Zhiklè

Ta dzawa Jérémie

¹ Aman Pashur, kra Immer, ndo mvi skwi a Zhiklè, a bi ndohi mɓer gi Zhiklè, a ntsena ma haha man Jérémie a hodkoɗai.

² A ntsau, a mpa na shéla a sak, a ntamagi Benjamin man a géɗèʼa, a sam gi Zhiklè.

³ Te mangoslèmaʼa Pashur a mprokoɗi Jérémie zaʼa. Jérémie a ngaɗa na: Ndo nzi pèc pècèk a baha ka a nzlembaɗ Pashur ka ɓai, aman ‘zlau a tsagi ngaya’.

⁴ Gar haha Ndo nzi pèc pècèk a gaɗa: Na haha i praka kinè zlau a va a mandalahi ngaya tèlèba. Ta da bazl ta a tsakwal mayamhi ta, a sam di ngaya. A Juda tèlèba i vi a ri a bi Babylone. Nengaʼa a da hel ta ma a kokwar Babylone, a da bazl ta a tsakwal.

⁵ Kolongwi kokwar haha a skwi man ta ngotso tèlèba, skwi tengaʼa mbelaʼa tèlèba, skwi mèshèlè bihi Juda, i pe ta a ri mayamhi ta. Ta da gi metsar skwi ta, a ta heldama a kokwar Babylone.

⁶ Aman ka, Pashur, a ndohi gi ngaya tèlèba, ta da hel kiné a ɓèlè a kokwar Babylone. Ka da metsi te pa, ta da re ka a pa, a nda mandalahi ngaya tèlèba man ka hada ta ma ncèkèlma.

Jérémie a hér gèɗ

⁷ Ndo nzi pèc pècèk, ka tavassayè a gèɗ ntèvèshè, a i co arsa. Ka gsyè a wuɗai a ka fenyè. Ko wawa ta ngwossahayè, a ta livyè.

⁸ Aman i gèɗè, i kuɗai. Wuɗai, metsar! Aman ta ngwossahayè a géɗ ma Zhiklè; lèk lèk ta derdyè.

⁹ Aman i gaɗa: I woy a i hérè asaɓai, i gèɗè a nzlembaɗ nengaʼa asaɓai, a pay vogwa a va, a dza-hayè te vatasl. I gaɗa i dishèʼa, a dishè azɓai, i slaha ɓai.

¹⁰ I tsena ndohi kumba ta ngryè: Skwi mwuɗitpa tèlèba! Va-püno! Nga da pinèʼa! Kinè mandalahi na tèlèba, va-pu vaʼa! Wa ngiɗè ba nga gshèʼa, a nga da a kita!

¹¹ Aman Ndo nzi pèc pècèk a zhè a iyè, ara ngul ndo mbiaʼa. Gar haha ndohi mparahayè ta da kèlèhai, ta slaha ta gay skwa ɓai. Ta da ngècè hori a di a nasa nasa, ta slaha ɓai, hori mbiaʼa a pca ta a gèɗ azɓai.

¹² Zhiklè bi mbiaʼa a jkede ta ndohi nzuraʼa, a war ndo tʼhwaɗaʼa. I da rka ara man ta pil gèɗ dai. Aman i va ka ma ga a ri a ka.

¹³ Va-sla na dimèsh a Ndo nzi pèc pècèk, va-shɗd gèɗ a Ndo nzi pèc pècèk! Aman nengaʼa a mbel nshèffè ndohi ntawassaʼa auda te ri ndohi ambaɓihiaʼa.

¹⁴ Pats nyi ga da phomda! Pats man mam ga a nyekayè, pats mpshè ma ka ɓai.

¹⁵ Ndo man a ngra na bab ga: ka ngots kra nguraʼa, a nengaʼa a wuffè, da phomda!

¹⁶ Pats nasa da gu lèmèlèmè ara kokwarhi man Ndo nzi pèc pècèk a gedas ta, a ta sia te va ɓai. Da tsena wobau a prèk, a lalau var a géɗ pats.

¹⁷ Ta keɗkay tʼhwaɗ nram ga ɓi èhèmè? Ar hwaɗ mam ga kala gi dzavai; a mam ga a nyekay auda ɓai.

¹⁸ I shkè auda tʼhwaɗ mam ga èhèmè, a i rka matakwan a nlèyè, a pats nshèffè ga nʼnga a skwi horai?