Jérémie 2 - Ma Zhiklè

Te va man Israel nlèɓèslè dai

¹ Ndo nzi pèc pècèk a ngaɗayè ma nengaʼa ar haha:

² Do, njè ta ma a ndohi Jérusalem, a ka gaɗa ta: Ndo nzi pèc pècèk a goɗ ar haha: I hérèʼa, ara man kin woy Zhiklè te wudahai, a kin woy iyè ara medemai: Ara man kin dzadzarkayè tʼhèshèkèɗ, te herkeɗa man skwa a gi a pa azɓai.

³ Te va nasa, Israel a Ndo nzi pèc pècèk, tsuvom skwi na. Ndo man a ndedama, sèi a pil gèɗ, matakwan a nʼnga na, Ndo nzi pèc pècèk a gaɗa.

Israel a mbèh skwai

⁴ Va-tsena ma Ndo nzi pèc pècèk, ndohi gi Jacob, a kin tèlèba, man kinè te verzi Israel!

⁵ Ndo nzi pèc pècèk a goɗ ar haha: Babhi kinè ta ngatsa a sam ga mali mè? A ta jèkyè a ta dè a verzi skwi ambalai a ta gedas ta.

⁶ Ndo nzi pèc pècèk tema? ta dzhaɗa te deɓaʼa ɓai. Nengaʼa man a nhelka nga auda te kokwar Egypte, a nde nga tʼhèshèkèɗ, te tazli hèshèkèɗ, te kwazlazlam, tʼherkeda ngworaʼa, man di a rkè a pa azɓai, a herkeɗa man ndo a mbeza a pa ɓai, man ndo a nzi a pa azɓai.

⁷ I de kinè a herkeda nɗuzoʼa, a kin ndi skwi te pa kumba. Kin do a pa a kin lizhè herkeda ga, skwi nʼndi gi ga, a kin ndeda a skwi man a ndara ta ndohai.

⁸ Ndohi mvi skwi a Zhiklè ta gaɗa: Ndo nzi pèc pècèk tema, ɓai. Ndohi kita ta woy iyè ɓai. Ndohi mɓer ndohai ta jèkyè; ndohi nhadka ma ta hodko ma a nzlembaɗ Baal, a ta mboh skwai, man a takaha ndo azɓai.

⁹ Gar haha nga da verslè a kinè a ma ma dai, Ndo nzi pèc pècèk a gaɗa.

¹⁰ Nga da verslè a wud wudahi kinè. Vo-do a kokwar Kittim, va-wora! Va-zlündo ndo a kokwar Kédar, va-pu dai! Kin rka skwi ngiɗè ar haha ma ɗè?

¹¹ Daga halaʼa ndohi ngiɗè man ta humbaɗa Zhiklè a zhiklèhi ncèkèlma, tazhi dè? Aman ndohi ga ta humbaɗa nʼnjèl ga a skwi ambalai.

¹² Giɗfèk, rzl ngay a pa, geda gèɗ a pa kwotakwotaʼa, da ndara ka a vata — Ndo nzi pèc pècèk a gaɗa.

¹³ Aman ndohi ga ta gu mali sak cèw: Iyè, nlèlè iyam nshèffè, ta jèkyè; a ta rau thal iyam tsaɗ, vèvèɗ te pa, man iyam a she na, a nzi a pa azɓai.

Zhiklèhi ndohi ngiɗè

¹⁴ Israel ɓèl dè, ndo mizlinè dè? Ngedassa, a ta fa na vogwa a kokwar, èhèmè?

¹⁵ Wud marizhèlèhai ta bebrè a géɗèʼa, ta kuɗi a vata, ta ndede kokwar na a hèshèkèd, man ndo a nza a pa azɓai.

¹⁶ Ko ndohi Noph a Tachpanès ta da ngelama ka gèɗ.

¹⁷ Skwi haha a ga ka tèlèba a géɗ man ka kwola Ndo nzi pèc pècèk, Zhiklè ngaya ka ɓi ɗè?

¹⁸ Anai a takaha ka te mè, aman ka hi a kokwar Egypte, a ka si iyam te woyam Nil? A takaha ka te mè, aman ka hi a kokwar Assyrie, a ka si iyam te woyam Euphrate?

¹⁹ A géɗ shèwa ngaya ka si matakwan a da ngatsa ka maya. A géɗ man kajèkeda Zhiklè, ka da ngècè kita. Huro a ka suna! Aman ka jèkeɗa Ndo nzi pèc pècèk, Zhiklè ngaya, ambaɓai, nara skwi nɗuzlekzlekaʼa. Ka slebardyè ɓai, Zhiklè bi mbiaʼa a gaɗa.

²⁰ Nʼnzi a zhè ma, ka proslko wof nkelawa te daʼai ngaya auda, ka ngesla teɓa ngaya, a ka gaɗa: I woy a i nzi a ɓèlè ɓai! Aman a géɗ za mbiaʼa tèlèba, a verzi wof ndizlimaʼa tèlèba, ka mana tʼhai, fali dam!

²¹ I ge ka a wof barassa mbelaʼa, te hurfèɗ mbelaʼa. A ka ngwoda va ngaya a wof nhuslaʼa, a wof hèshèkèɗ, èhèmè?

²² Ko ka pènè va a sabelam, a zluzlor slarma, mali a pènè azɓi genè; a lizh ka genè a sam di ga. Iyè, Ndo nzi pèc pècèk, a ngoɗo.

²³ Ka goɗ a ka gaɗa: i lizha va ga ɓai, i dzadzara Baal ɓai, èhèmè? War civèɗ man ka bezkaɗa pa te nkulgodok, ngreda skwi man ka gau auda, ka plèsh man a woy bakai,

²⁴ man a hi a hèshèkèɗ, mi baki a keɗaʼa, a nda na a ndav, a géɗ mi baki man a keɗaʼa. A slaha a ngskoɗa deɓa wa? Ta tèlèba man ta woyaʼa, da geda matakwan a va ɓai; a ki na nta, lèk lèk ba a tsi deɓa genè.

²⁵ Ka nda sak ngaya ɓai, gu maya daʼai ngaya, da gworama ka daʼai ɓai! Aman ka gaɗa: Aʼai! Sèi i woya ndohi man verzi ta tsaɗ, a i hi a verzi ta.

²⁶ Ndohi gi Israel, bihi ta, wud bihi ta, ndohi mvi skwi a Zhiklè ta, ndohi nhadka ma ta, ta ngots hori a dai, ara ndo metsar man ta ngatsa na a vaʼa.

²⁷ Ta gaɗa na wof. Ka bab nga! Ta gaɗa na kwa: Ka nyaka nga! Ta ngwodkay deɓa, ta pakay di asaɓai. Te deɓaʼa man matakwan a ngs ta, ta gaɗa: Slambaɗa, takaha nga!

²⁸ Zhiklèhi ngaya man ka ram ta, ta tema? Da slambaɗa, da takaha ka a pats matakwan ngaya! Ara man kokwar ngaya kumba, zhiklèhi ngaya ba kumba, kokwar Juda!

²⁹ Kin gay ma a va èhèmè? Kin gay ri a gèɗ tèlèba, Ndo nzi pèc pècèk a gaɗa.

³⁰ I bazl ta wudahi kinè ambalai. Ko i ngatsa ta maya arsa, ta ca ɓai. Kin bazl ta ndohi nhadka ma kinè a tsakwal, kin bazl ta ara marizhèlè man a cizlè skwai.

³¹ Kinè verzi ndohi mè? Va-tsena ma Ndo nzi pèc pècèk: Israel a fiyè a hèshèkèd, a herkeda ruva dè? Ndohi ga ta gaɗa: Nga pra ma, nga shkè a deɓa a sam ngaya asaɓai, èhèmè?

Nhodko ma a géɗ ngi ɓèlè

³² Skwi wai a pca na a gèɗ a bidali dè? Mbar man a fèɗè a va a pca na a gèɗ a medemi dè? Aman ndohi ga, i pca ta a gèɗ nʼnzi a zhè.

³³ Ka tila civèɗ ngaya amba amba, a ka woy bakai! A géɗ nengaʼa ba, ka senda malai.

³⁴ Pombaz ndo ntawassaʼa nʼnga ka a rai, pombaz ndohi metsarhi ka ɓai, pombaz ndohi man ta ga mali ɓai.

³⁵ Ka gaɗa: Mali ga azɓai – Zhiklè a gay ndzoan azɓai. Na haha nga woy a nga verslè a ka, a géɗ man ka gaɗa: i ga mali ɓai.

³⁶ Ko do dra, a ka jèkeda civèɗ ga, èhèmè? Ko Egypte a da pa ka hori a dai, lèmèlèmè ara Assyrie a ngau.

³⁷ Ko te pa ba ka shkè auda a ri te gèɗ, a géɗ man Ndo nzi pèc pècèk a nkwol ta, tengaʼa man ka pu ndav a vna. Ka ngècè skwi te ri ta azɓai.