Jérémie 19 - Ma Zhiklè

Shiɗèf mbazlaʼa

¹ Ndo nzi pèc pècèk a goɗ ar haha: Do a ka sum shidèf rɓasl. Te deɓaʼa hul tsuvom ndohi mvi skwi a Zhiklè a nda ka,

² do a slrats Ben-Hinnom, a ntamagi ‘shidèf’. Te pa ka njè ma man i da gaɗa ka.

³ Goɗ: Kinè bihi Juda a ndohi Jérusalem, va-tsena ma Ndo nzi pèc pècèk! Zhiklè bi mbiaʼa, Zhiklè Israel, a goɗ ar haha: i da geda matakwan a sam nta, ko wawa man a tsenaʼa, a woya a mpizlè zlembaɗ na.

⁴ A géɗ man ta jèkyè, a ta ngwoda sam nta, a ta zla ta skwi a vrihai, man ko tengaʼa ko babhi ta ko bihi Juda ta sen ta ɓai, a ta ndha sam nta a pombaz ndohi man ta ga mali ɓai,

⁵ ta rama ta sam mvi skwi a Baal, a géɗ za, a ta bezde ta wudahi tengaʼa a ndev vogwa a géɗ Baal, skwi man i gaɗa ta: kin gu hai, man i ngra ta hai, man i hur ɓai.

⁶ Na haha patsaʼa a di a shkè, Ndo nzi pèc pècèk a gaɗa, ta da baha na sam haha ‘Topheth’, a ‘Ben-Hinnom’ asakaɓai; aman slrats ‘nkeɗa ndo’.

⁷ I da ndeva maya Juda a Jérusalem a sam haha, a ta bazl ta a tsakwal a sam mayamhi ta, a ri ndohi man ta woy a ta zeda nshèffè ta. Nckondohi tengaʼa, i pa ta a ɗiakihai a skwi dak a ta ndiaʼa.

⁸ Kokwar haha, i da gi a skwi man ta gi zlauaʼa, a ta ngwèshè a pa. Ko wawa man a da bizhè a pa, a da rzl na, a liv ta, a géɗ matakwan tengaʼa tè-lèba.

⁹ Ha ta ndi zluèɗ wudahi a dalahi ta; a ngiɗè a ndi ngiɗè te matakwan, te zlau man mayamhi ta a ndohi man ta woya ta zeda nshèffè ta, ta ga ta matakwan a vna.

¹⁰ Ka da bazla shidèf a sam di ndohai, man ta dè a verzi ngaya,

¹¹ a ka da gaɗa ta: Zhiklè bi mbiaʼa a goɗ ar haha: I da bazl ta ndohi haha, a kokwar haha lèmèlèmè ara shiɗèf, a ta slaha ta mbi te deɓaʼa asaɓai. A ta da ri ndo a Topheth, a géɗ man sam ngiɗè a slra ɓai.

¹² I da gi arsa a sam haha a ndohi nengaʼa, Ndo nzi pèc pècèk a gaɗa, a i gi kokwar haha lèmèlèmè ara Topheth.

¹³ Gihi Jérusalem a gihi bihi Juda, sèi ta gi lèmèlèmè ara sam te Topheth, man ta lizhèʼa, gihi tèlèba a géɗ gi tèlèba man ta zla ta skwi a bantihai a giɗfèk, a ta va ta skwi nsai a zhiklèhi ngiɗè tsaɗ.

¹⁴ Te deɓaʼa Jérémie a mshkè te Topheth, a sam man Ndo nzi pèc pècèk a nzlündo a pa, da hod ma, a mshkè a gala gi Zhiklè, a ngaɗa ta ndohi tèlèba.

¹⁵ Gar haha, Zhiklè bi mbiaʼa, Zhiklè Israel, a gaɗa: Na haha i da ga na matakwan tèlèba a kokwar haha, a kokwar man a tsagiaʼa, man i guv ta a vna, a géɗ man ta ndohi mèdègèɗ, a ta tsena ma ga ɓai.