Jérémie 18 - Ma Zhiklè

A sam ndo nrèmè

¹ Ma man Ndo nzi pèc pècèk a ngaɗa na Jérémie:

² Slambaɗa, a ko do a gi ndo nrèmè. Te pa i woya a i gaɗa ka ma ga.

³ A i do a gi ndo nrèmè, na haha, a rèm skwai.

⁴ Shidèf man a rèmèʼa, nʼnga na ri ɓai, a mʼmbeɗdahai, a nram ngiɗè ara man a woyaʼa.

⁵ Te deɓaʼa Ndo nzi pèc pècèk a ngaɗayè: Kinè ndohi Israel, i slaha a i ga kinè lèmèlèmè ara ndo nrèm skwi haha bi dè, Ndo nzi pèc pècèk a gaɗa.

⁶ Kinè te ri ga lèmèlèmè ara rɓasl te ri ndo nrèmè, ndohi Israel.

⁷ A sam ngiɗè i gèɗèʼa, a gèɗ ndohi herkeda, a gèɗ kokwar-bi ngiɗè, aman i koldkoɗauda, a i mbeɗdahai, a i gedassaʼa.

⁸ Aman i goɗ ma ambaɓiaʼa a géɗ ndohi sa, te deɓaʼa ta ngwode ndav ta, i jèkeda, i ga ta ɓai.

⁹ A sam ngiɗè i gèɗèʼa, a gèɗ ndohi herkeda ngiɗè, a géɗ kokwar-bi ngiɗè, i woya a i geda pa a i rèmèʼa.

¹⁰ Aman te deɓaʼa ta gi skwi man ambahay ɓai, ta tsena ma ga ɓai, skwi mbelaʼa man i huro, i da ga ta azɓai.

¹¹ Gar haha gaɗa ta ndohi Juda a ndohi Jérusalem: Ndo nzi pèc pècèk a goɗ ar haha: Na haha i til matakwan a hai a i hér skwi man ambaɓai a géɗ kinè. Va-menkaɗa deɓa, staɗ staɗ tèlèba a civèɗ nengaʼa man ambaɓai, va-tila civèɗ kinè, va-gu skwi man amba.

¹² Aman ta da gaɗa: Nga geda matakwan a va ambalai. Aʼai, nga woya nga jèjèr skwi te ndav nga, staɗ staɗ tèlèba a gi ara man a hur te ndav nengaʼa nsassayaʼa, man ambaɓai.

¹³ Gar haha Ndo nzi pèc pècèk a goɗ ar haha: Vo-dzhoɗo a sam ndohi nte deɓa! Daga halaʼa ta tsena ma arsa dè? Israel, bidalai, a ngau skwi ambaɓiaʼa holholaʼa.

¹⁴ Kwa nɗizlèʼa te za Liban a da ndivè auda te pa dè? Iyam te woyam mbiaʼa a da she na dè?

¹⁵ Aman iyè, i pca ta a gèɗ a ndohi ga. Ta va ta skwi a vrihai. Ta zlak ta auda a civèɗ nhalaʼa, a ta dè a civèɗ man nʼnde di ɓai.

¹⁶ Ta ndeda kokwar ta a skwi man ndohi ngiɗè ta gi zlauaʼa, a ta ngwèshè a pa. Ko wawa man a bizhè a pa, a gidè gèɗ kwotakwotaʼa.

¹⁷ I woya a i dzam ta auda a ma mayamhi ta, ara kozlar civèɗ iyam. I ngwoda ta deɓa, i paka ta di azɓai a pats man ta gedas ta.

Jérémie a tsi rai

¹⁸ Ta gaɗa: Ngo-vhokoy ma a gèɗ a Jérémie! Ma nhèdè ma a sam ndo mvi skwi a Zhiklè a ndiva ma? Ma ncèmma a sam ndo maya a ndiva ma? Ngo-tsedokoy ma a pa, ngo-fokoy gèɗ a ma nengaʼa ɓai!

¹⁹ Ndo nzi pèc pècèk, ɓeryè, tsena ma mayamhi ga!

²⁰ Ta pil skwi man amba a skwi ambaɓiaʼa dè? Ta ngay gadda a hai a nshèffè ga. Huro, ara man i zlatsa a sam ngaya, a i tsu ri a géɗ tengaʼa, a i woya a i mbatsaha ndzoan ngaya.

²¹ Gar haha gau aman wudahi tengaʼa ta tiɗ ta a mai, tsakwal da bazl ta! Wud ngwozi da bazl ta, ngwozi da nde ta a ngwozi mazai; bakihi tengaʼa, gidiɓèr da hel ta ma, golahi tengaʼa da bazl ta te var!

²² Wobau da tsena te gi ta, aman ka zlinda metsarhi a va tengaʼa. Aman ta ngay gadda a hai, aman ta gsyè, ta pay teɓa a sak.

²³ Aman ka, Ndo nzi pèc pècèk, ka sun skwi man ta hérèʼa; ta woy a ta kedyè. Ka pra ta mali tenga ɓai, mali tengaʼa da nza a sam di ngaya! Ka manda ndav ngaya a hi a géɗ tenga ɓai, ha pats man ka rufa ndzoan ngaya a sam ta!