Jérémie 17 - Ma Zhiklè

Mali Juda

¹ Mali Juda mwindèʼa a züdo, a kwa ncɗlmaʼa, mwinda a ndav tengaʼa, a drom sam mvi skwi a zhiklèhi ta;

² a ta gi malwuɗai a géɗ tengaʼa. Astarté tengaʼa, wof ndizlimaʼa tèlèba, a géɗ ngègèdhai, a géɗ za, te dak.

³ A géɗ mali ngaya te kokwar ngaya tèlèba, ta da hil skwi mèshèlè ngaya, suli ngaya tèlèba, a metsar.

⁴ Skwi nʼndi gi ngaya man i va ka asaɓai, a i ge ka a ɓèlè te kokwar man ka sun ɓai, te man ndav ga a vècè ara vogwa man nvatsa a mèdèp.

Ma mphömdè ndo, ma mpshè ma

⁵ Gar haha Ndo nzi pèc pècèk a gaɗa: Ndo man a gshè va a ndohai, ndo man a fu ndo te di Zhiklè na, a pi di a Ndo nzi pèc pècèk azɓai, da phomda;

⁶ a gi lèmèlèmè ara wof tʼhèshèkèɗ man vah az a va ɓai, a da ngècè skwi man amba te nshèffè na azɓai. A da nzi a hèshèkèɗ man vogwa te pa, te kokwar kurndazlndazlaʼa, man skwi a gi te pa azɓai.

⁷ Mwuffè a sam ndo man a pi ndav a Ndo nzi pèc pècèk, man a zhèr skwi te ri Ndo nzi pèc pècèk.

⁸ Nengaʼa nara wof nʼngaʼa a ma woyam, zluzlor nengaʼa a zhè te iyam. Pats a tai, vahaʼa a wushè azɓai; te mvi man iyam az a vata ɓai, a nzai na genè, a yi wuda na genè.

Ndav ndo, ambaɓai

⁹ Ndav ndo, ambaɓi a vata ba, nsun wa? A ngwèdè ndo a fena skwi ngiɗè.

¹⁰ Iyè Ndo nzi pèc pècèk, i jkeda ndav ndo, i wuzhèʼa tʼhwaɗaʼa, a i va na a ndo staɗ staɗ ara skwi man a giaʼa, a skwi man a nʼngots te pa.

¹¹ Ndo man a ɓicè skwi mèshèlè a ngi rai, lèmèlèmè ara ɗiak ngiɗè man a ncɗzlko wuda auda te slasli ɗiak ngiɗè. Aman mʼmetsi a shkè, a jèkeda skwi mèshèlè a pa, a pats nʼndikèma nshèffè na, nrzla.

Ntsi rai

¹² Sam nga nkezlaʼa, sam nʼnzi bi nʼnjèlè, mbiaʼa tʼhinkaɗ na!

¹³ Ndo nzi pèc pècèk, man Israel a zhèr ka! Ta tèlèba man ta jèke ka, ta ngècè hori a dai. Ta tèlèba man ta kwol ka, hori a da keɗ ta, a géɗ man ta jèkeda nlèlè iyam nshèffè.

¹⁴ Ndo nzi pèc pècèk, mbelyè, a i mbel ga ma. Takahayè, a i ngots skwi ntakahayè ma. Aman ka, Ndo nzi pèc pècèk, man i zhèr ka.

¹⁵ Na haha, ta gadayè: Kos ma Ndo nzi pèc pècèk ani na tema? Da shkè!

¹⁶ I tsi rai a i gaɗa, matakwan a da shkè azɓai, ɓai; ka suna. Ka bahayè a mizlinè ngaya, i kwola ɓai. Ma man a shkè auda te tapiɗaf ma ga, i goɗ a sam di ngaya.

¹⁷ Ka sam ga nlèaʼa, a pats matakwan; ka pray zlau a va ɓai!

¹⁸ Ndohi mparahayè sèi da ngots hori a dai, iyè ka ɓai. Sèi tengaʼa da rzl ta, iyè ka ɓai. Ga ta matakwan, tsede ta a hi sak cèw!

Pats nshèk va

¹⁹ Ndo nzi pèc pècèk a ngaɗkayè ar haha: Do a ka zlatsa a ntamagi kokwar, man bihi Juda ta bizhè a pa, a ntamagi Jérusa-lem tèlèba!

²⁰ A ka gaɗa ta: Va-tsena ma Ndo nzi pèc pècèk, kinè bihi Juda, a ndohi Juda tèlèba, a kinè ndohi Jérusalem tèlèba, kinè man kin bizhé a ntamagi haha!

²¹ Ndo nzi pèc pècèk a goɗ ar haha: Va-gu maya nshèffè kinè, kin zuɓ skwi a gèɗ a pats nshèk va ɓai, kin shkè a vna a ntamagi Jérusalem ɓai!

²² Kin do auda a skwi a gèɗ te gi kinè a pats nshèk va ɓai! Kin gu mizlinè ɓai, ko kèshkata! Va-kezla pats nshèk va ara man i njè ta a gèɗ a babhi kinè!

²³ Aman ta tsena ɓai, ta fa zlembaɗ ɓai, ta sassaya di ta, ta woy a ta tsena ɓai, ta woy a ta cè ma man i njè ta ɓai.

²⁴ Ndo nzi pèc pècèk a gaɗa: aman kin tsena ma ga mbelembela, a kin bizhè a skwi a gèɗ a ntamagi kokwar haha azɓai, a pats nshèk va, a kin kezla pats nshèk va, a kin gi mizlinè azɓai, ko kèshkata,

²⁵ te deɓaʼa bihai a wud bihai man ta nza a géɗ sam nʼnzi bi David ta da bizhè a ntamagi kokwar haha, ta nzi a kikai a ta nzi a deɓ plèsh, tengaʼa a wud bihi tengaʼa, ndohi Juda a ndohi Jérusalem; a ndohi ta da nzi te kokwar haha a mèdèp.

²⁶ Ta da shkè te kokwar Juda, a tsagi Jérusalem, te kokwar Benjamin, te Shephela, te za, te dukwaɗ, a ta ndara na skwi a ta zla na skwi a ta va na movar a ta ndara na ɓurdi a ta shida na gèɗ a Zhiklè a vna, te gi Ndo nzi pèc pècèk.

²⁷ Aman kin da tsena ma ga ɓai, kin kezla pats nshèk va ɓai, a kin zhɗɓ skwi a gèɗ, a kin bizhè a ntamagi Jérusalem a pats nshèk va a vna, i da fa na vogwa a ntamagi nengaʼa, a da ndeda gihi bi te Jérusalem a ma, a mbècè azɓai.