Jérémie 16 - Ma Zhiklè

Te ɓèlè

¹ Ndo nzi pèc pècèk a ngaɗayè:

² Ka co ngwoz te va dalahi kokwar haha ɓai, ka yu wudahi a dalahi a sam haha ɓai!

³ Aman Ndo nzi pèc pècèk a goɗ a géɗ wudahi a dalahi man ta yia te kokwar haha, a géɗ mam ta, man ta yaka ta, a bab ta, man ta yu wudahi te kokwar haha:

⁴ Sèi gidiɓèr da hel ta ma, ndo nda kuɗ ta, ndo nda re ta azɓai. Sèi ta ndi a mogoɓa te gi dau. Tsakwal a da bazl ta, mi a da bazl ta, a ɗiakihai a skwi dak ta da nde ta ma.

⁵ Aman Ndo nzi pèc pècèk a gaɗa: Ko do a gi man ta gi ngolala te pa ɓai! Ko do a sam kuɗ ta ɓai! Aman i ceda gumi ga a pombi ga auda a sam ndohi haha, ta siyè te va asaɓai.

⁶ Mbibihiaʼa a nkèshkèshè-hiaʼa ta da bazl ta te kokwar haha, ndo nda re ta asaɓai, ndo nda kuɗ ta asaɓai, ta hi a verzi mbav a gèɗ kinè asaɓai, ta shè kinè gèɗ a verzia asaɓai.

⁷ Ndo a da ti ɗaf a sam kuɗa azɓai, aman a ndè bidè ndo a vna, a géɗ ndo nengaʼa, man a mʼmets na. Ndo a da va ta cil zom, a bid ta a vna, azɓai, ko man bab na a mʼmets na, ko mam na.

⁸ Ko do a gi man ta gi ngolala te pa ɓai, ka nza a ka ndau skwai a ka sau skwai a nda tenga a ɓai!

⁹ Aman Zhiklè bi mbiaʼa, Zhiklè Israel, a gada: Na haha, a sam kinè tèlèba, i gedassa dimèsh mwuffe, a dimèsh ngolala, a dimèsh mwoy ngwoz.

¹⁰ Aman ka da njè ta ma haha tèlèba a ndohi haha, ta da gada ka: Ndo nzi pèc pècèk a ga nga matakwan mbiaʼa haha èhèmè? Nga ga mali mè, nga ge skwi ambaɓiaʼa a sam Ndo nzi pèc pècèk, Zhiklè nga, mè?

¹¹ Ka da menda ta: A géɗ man babhi kinè ta kwolyè, Ndo nzi pèc pècèk a gada, a to do a verzi zhiklèhi ngidè, a ta gu mizlinè ta, a ta tsu ri a tengaʼa, a ta jèkyè a ta dzodzor ma kita ga bai.

¹² Kinè, kin gu skwi ambaɓiaʼa holholaʼa, a fena babhi kinè. Na haha, staɗ staɗ te ndev kinè a jèjèr ndav nengaʼa man nsassaya, man ambaɓai, a tsena ma ga bai.

¹³ Gar haha i woya a i dzam kinè auda te kokwar haha, a kokwar ngidè, man kin sun bai, kinè a babhi kinè. Te pa sèi kin gi mizlinè zhiklèhi ngidè tsaɗ, a pats ba a vad ba. Aman kin da siyè te va asabai.

¹⁴ Gar haha, patsa a di a shkè, Ndo nzi pèc pècèk a gada, ta da gèdè azɓai: ara man Ndo nzi pèc pècèk, man a nhelka ta ndohi Israel auda te kokwar Egypte, a zhè.

¹⁵ Aman ta gada: ara man Ndo nzi pèc pècèk a zhè, man a nhelka ta ndohi Israel a deɓa te kokwar te man a gédèʼa, tʼherkeda tèlèba man a ndzam ta a pa zlèzlèʼa. I da helka ta a deɓa a kokwar ta, man i va na babhi ta.

¹⁶ Na haha, i baha ta ndohi mpèr klèf kumba, Ndo nzi pèc pècèk a gada; sèi ta da par ta. Te deɓaʼa i da baha ta ndohi lèkèɗ kumba; sèi ta da woy ta te pa, te za tèlèba, te ngègèdhai, te slrats tèlèba.

¹⁷ Aman i pi di a civèd tengaʼa tèlèba, ta slaha ta ngheda va a sam di ga bai, mali tengaʼa a nghédè a sam di ga azɓai.

¹⁸ Gar haha i jhèɗè skwi mpil gèɗ sak cèw a géɗ mali ta a mphömè ta, a gèɗ man ta derde kokwar ga, a skwi hori tengaʼa man nhusla sa.

¹⁹ Ndo nzi pèc pècèk, ka wuɗi ga, sam man i ngheda va ga a pa, sam ga nlèaʼa a pats matakwan. Ngul ndohai ta da shkè a sam ngaya te verzi herkeda, a ta gada: Babhi nga ta ngots skwi ncèkèlma genè, skwi mbèh skwi man ambalai, man a takaha ndo azɓai.

²⁰ Ndo a slaha a nrèm zhiklèhi na ɗè? Ta Zhiklè ka ɓai!

²¹ Gar haha, antanta i woya aman ta sun ri ga man a lama ta, a ta sun wuɗi ga, a ta da suna, nzlembaɗ ga ‘Ndo nzi pèc pècèk’.