Jérémie 15 - Ma Zhiklè

Zhiklè a mbeɗa na ma a Jérémie

¹ Ndo nzi pèc pècèk a ngaɗayè: Ko man nda Moise a Samuel ta shkè a sam ga, ndohi haha ta siyè te va azɓai. Dzam ta auda a sam ga, do do ta!

² Aman ta da dzhaɗ ka: Nga dè ma? Mbeda ta a ma: Ndo nzi pèc pècèk a goɗ ar haha: Di man a gidiɓèr, a gidiɓèr; di man a tsakwal, a tsakwal; di man a mai, a mai; di man a dangai, a dangai:

³ I da baha ta géɗ matakwan faɗ a géɗ tengaʼa, Ndo nzi pèc pècèk a gaɗa: Tsakwal a nda bazl ta. Kdadihai ta da cizl ta. Ɗiakihai a skwi dak ta da nde ta ma, a ta ndev ta.

⁴ Aranta i da ga ta matakwan man kokwar-bihi tèlèba a géɗ herkeda ta gi zlau te riaʼa; a géɗ skwi tèlèba man Manassé, kra Ezéchias, bi Juda, a gu te Jérusalem.

⁵ Jérusalem, ka si te va wa? Nlèy ka wa? A dè a sam ngaya a ndzhaɗ ka: ka nza genè dè, wa?

⁶ Ka nkwolyè a ri ngaya, Ndo nzi pèc pècèk a gaɗa. Ka ngwoday deɓa! Gar haha i torko ri ga, a i gedas ka, i kéɗè gèɗ ndav ga a hi asaɓai.

⁷ I pav ta ndohi ara dau a ntamagi kokwar. I ge ta ndohi ga a delai. I zede ta, te man ta jè-keɗa civèɗ mali ta ɓai.

⁸ Ngwozi tengaʼa man ta nde ta a ngwozi mazai, ta fena wyak a ma woyam. I zlinde ta ndo ngedassa ndo a gèɗ a mam wudahai, a wudahai, a géɗ pats. A nasa nasa i pra ta zlau a va, a ta gudzai.

⁹ Ngwoz man a myu wud 7, ani nhom na, nshèffè na a ndiv na, a metsi ara delai, hori a dai, mphomda. Njèkèdiaʼa i da pe ta a ri a mayamhi tengaʼa, tsakwal a bazl ta, Ndo nzi pèc pècèk a gaɗa.

Zhiklè a takaha Jérémie

¹⁰ Mam ga, wobayè, a géɗ man ka ye-kayè! I nde ga a ndo ngi ma, a ndo ngi ndzoan a ndohi herkeda tèlèba. Dua ndo ngiɗè az a géɗ ga ɓai, dua ga az a gèɗ ndo ngiɗè ɓai, a ta derdyè tèlèba.

¹¹ Ndo nzi pèc pècèk a gaɗa: A vava i pre ka auda, a ka da nzi amba amba. A vava i takaha ka te ri matakwan, a pats mwuɗitpa. Ka mandai ga.

¹² Ndo a slaha a mpasla züdo, züdo te man a géɗèʼa dè?

¹³ Suli ngaya a skwi mèshèlè ngaya, i va ta ndohi ngiɗè, ambalai, a géɗ mali ngaya tèlèba man ta gu te kokwar ngaya.

¹⁴ A ka gi a ɓèl ndohi mayamhi ngaya te kokwar man ka sun ɓai, te man ndav ga nvatsa ara vogwa, a nde kinè a ma.

¹⁵ Ndo nzi pèc pècèk, ka suna. Heryè! Heryè! Ndohi mparahayè da pul gèɗ! Ka zhor a ma ma ɓai, gedas ta! Huro! Ta pay hori a dai a géɗ ngaya!

¹⁶ Aman ka gu ara man ka goɗo, ambahayè. I wuffè a géɗ ma ngaya. I wuffè te ndav ga, a géɗ man i ngots nzlembaɗ ngaya, Ndo nzi pèc pè-cèk, Zhiklè bi mbiaʼa.

¹⁷ I nza a gaba a sam man ta pèr a ndo a pa ɓai, a i nza a géɗ ga. Ri ngaya a ngsyè a hai. Ka pay zlau a gèɗ.

¹⁸ Skwa a dzayè a mèdèp, matakwan ga a ndèlè azɓai èhèmè, i da mbélè a ngèmè? Ka a sam ga ara woyam man a ngwodyè, man i gaɗa: iyam te pa, njèkèm iyam a te pa ɓai.

¹⁹ Gar haha Ndo nzi pèc pècèk a gaɗa: Aman ka menkaɗa deɓa, ka slaha ka zlècè a sam ga zaʼa. Aman ka gèɗè ma mbelaʼa, ma ambaɓia ka ɓai, i va ka ma ga a ma ngaya zaʼa. Sèi ndohi haha ta shkè a sam ngaya; ko do a sam tengaʼa ɓai!

²⁰ I ge ka a zlazlar züdo man wuɗi na zhè, a géɗ ndohi haha; ta da gi var a ka, aman ta da fen ka azɓai. I zhè a nda ka, a i takaha ka, a i mbel ka, Ndo nzi pèc pècèk a gaɗa.

²¹ I mbel ka auda te ri ndohi ambaɓihiaʼa, te ri ngelɓats ndohi wuɗai.